“Azərbaycan”ın növbəti sayı

“Azərbaycan” ədəbi-bədii jurnalının daha bir sayı işıq üzü görüb. Jurnalın bu sayının ilk səhifələrində mərhum şair İsa İsmayılzadənin 70 illik yubileyinə həsr olunan, Arif Əmrahoğlunun qələmə aldığı “Qələmin altında ölüm titrəyir” başlıqlı məqaləsi və İ.İsmayılzadənin “Gözləyin, dünyaya qayıtmağım var” şeiri yer alıb. A.Əmrahoğlu məqaləsində qeyd edib ki, aradan keçən illər İsa İsmayılzadə şəxsiyyətinin və poeziyasının subyektiv insan amilindən asılı olmayan sınağına çevrilib: “Ədəbi prosesin gedişində real dünyasında necə idisə, ədəbiyyat tarixində, haqq dünyasında da elədir: sakit, təvazökar, ciddi, layiq olduğunu eşitməkdən ümidini kəsdiyinə görə bir azca küskün...”

Toplunun “Dramaturgiya” bölməsinə görkəmli Azərbaycan yazıçısı İsmayıl Şıxlının “Ölüləri qəbristanlıqda basdırın” adlı ikihissəli pyesi daxil edilib. Paşa Əlioğlu unudulmaz şairimiz Əli Kərimin 80 illiyinə həsr etdiyi “Təbəssümü başımız üstədir” başlıqlı məqaləsində atası ilə bağlı kövrək xatirələrə işıq salıb. Toplunun “Əlyazmalar yanmır” bölməsində xalq şairi Fikrət Qocanın şeirləri öz əksini tapıb. İsa Muğannanın şair Barat Vüsalın 60 yaşına ithaf etdiyi “Vətən, xalq, saz, şair haqqında” məqaləsi və B.Vüsalın şeirlərindən seçmələr də bu saydadır. “Nəsr” bölümündə Kamil Əfsəroğlunun “Daşlı qala” romanı, Xumar Ələkbərovanın “Parisin sirləri” və “Qara pencək” hekayələri verilib. Toplunun “Poeziya” bölməsinə Fəxrəddin Əsədin, İsa Sevərin, Mərkəz Qacarın, Nazir Rüstəmin, Fəxrəddin Ziyanın, Əbülfəz Ülvinin və Güləmail Muradın şeirləri daxil edilib. “Yaddaş” guşəsində Vilayət Quliyevin “Yol ayrıcındakı illərin anıları” və Mühitdin Birgenin “Azərbaycan 1922-1923-cü illərdə” məqalələri, “Yeni tərcümələr” bölməsində Əbdül Hüseynovun “Üsyankar xaqan” romanı, “Tənqid və ədəbiyyatşünaslıq”da Yeganə Mirzəyevanın “Mövt ararkən Cavid olan sənətkarın “İştə bir divanədən bir xatirə” şeirinə bir şərh dənəməsi”, Elməddin Əlibəyzadənin “Milli ruhumuzun qaynaqlarından “Kitabi-Dədə Qorqud”, “Klassiklərimizdən” guşəsində Təhminə Bədəlovanın Məhcur Şirvani barədə “Ağlar mənim əhvalimə qəbrimdə bitən gül” məqaləsi, “Naməlum yazılı abidələrimizdən soraqlar”da isə Paşa Kərimovun “Şükri və onun anadilli lirikası” yazısı yer alıb.

GÜNEL

525-ci qəzet.- 2011.- 25 may.- S.7.