“Azərbaycan” jurnalının noyabr sayı çapdan çıxıb

“Azərbaycan” ədəbi-bədii jurnalın növbəti sayı oxuculara təqdim olunub. Jurnalın “Poeziya” guşəsində Firuzə Məmmədlinin, Rəşid Faxralının, Ramiz Kərəmin, Bilal Alarlının, Əhməd Qəşəmoğlunun, Nuranə Nurun, Ramiz Orsərin, Günel Şamilqızının, Bəhlul Ataxanlının və Vahid Aslanın şeirləri yer alıb. “Yeni tərcümələr” bölməsinə Fidan Rzayevanın tərcüməsində Xalidə Ədib Adıvarın “Atəşdən köynək” romanı daxil edilib. Teyyub Qurbanın “Niyazi və Mir Cəfər Bağırov” başlıqlı məqaləsi jurnalın “Publisistika” guşəsində verilib. Jurnalın “Nəsr” bölümündə Nigar Nağıyevanın “Sınaq” hekayəsi öz əksini tapıb. “Cənubdan səslər” rubrikasında Pərvanə Məmmədlinin “Duyğu və iztirabları əks etdirən yazıçı” başlıqlı məqaləsi və Qulamhüseyn Saidin “Fəqir” hekayəsi yer alıb. Nəzmiyyə Şiriyevanın “Tənqid və ədəbiyyatşünaslıq” bölməsindəki “Fantasmaqor gerçəklər və ya Vaqif Səmədoğlu dramaturgiyası” başlıqlı məqaləsində Vaqif Səmədoğlu dramaturgiyasına nəzər salınıb, dramaturqun üslubundakı fərqli cəhətlər əks etdirilib. Jurnalın “Müzakirə edirik” adlı bölümündə İradə Musayevanın “Yeni romanlar – mənzərə, yoxsa görüntü” başlıqlı yazısı dərc edilib. Əlisəftər Hüseynovun “Səhnədən o yana və ya sözün “şəkli” yazısı “Polemika” bölməsində verilib. Jurnalın “El sənətkarı” səhifəsində Arzu Bayramlı şair Nəbidən bəhs edib.

GÜNEL

525-ci qəzet.- 2011.- 23 noyabr.- S.7.