“Göylərdən enəsən, yerə – yanıma...”

Şairə Afaq Şıxlının “Səni düşünürəm” şeirlər kitabı işıq üzü görüb. Bu, istedadlı şairənin dördüncü kitabıdır. Kitaba Afaq Şıxlının bu günə kimi dövrü mətbuatda işıq üzü görməyən şeirləri toplanıb. Bundan əvvəlki kitablarında olduğu kimi, müəllif yenə də ən ali hiss olan sevgi və onun yaratdığı ürək çırpıntılarını özünəməxsus şəkildə ifadə edən şeirlər qələmə alıb. Şeirlər axıcılığı və oxunaqlı olması ilə də diqqəti cəlb edir. Şairə “Dostlarım mənə də bahar göndərin” şeirində vətən həsrətini belə bəyan edir:

Çox uzaq düşmüşəm isti yuvadan,

Danışın siz mənə eldən-obadan,

Qurtulsun yurdumuz qandan-davadan,

Evlərdə səadət bərqərar olsun.

Qürbətdə ömürdən ömür azalır,

Bənizin açılmır, canın sozalır,

Yazanda qisməti elə yazalar,

Hər insan elində bəxtiyar olsun.

Bülbüllər verəndə yenə səs-səsə,

Qayıda biləydim lap son nəfəsə.

Salamlar söyləyin məndən hər kəsə,

Afaqın sevdiyi Vətən var olsun

Afaq Şıxlının yaradıcılığında ədəbi ruhumuzun və xalq ədəbiyyatımızın laylası sayılan qoşma janrı üstünlük təşkil edir. Şairənin bu qəbildən olan şeirlərindən biri “Əzizim” başlıqlı şeiridir:

Sanma ki, eşqinə vermirəm dəyər,

Sanma ki, mənsizlik qəddini əyər,

Səndən uzaq olmaq lazımsa əgər,

Bir daha qapımı çalma, əzizim.

Uzaqdan uzağa sənə yoldaşam,

Düşüncəm qoyarmı düz yolu çaşam.

Afaqam, sanma ki, soyuğam, daşam,

Mənim günahımı alma, əzizim.

Şairə uzun müddət Azərbaycandan kənarda yaşamasına baxmayaraq, onun şeirlərindəki milli kolorit, işlənən sözün məna çaları, poetik yükü əslində kökə bağlılıqdan xəbər verir. Afaq Şıxlının şeirlərinin mayasını sevgi təşkil edir. Müəllifin bu səpkidə olan şeirləri özünəməxsusluğu, bədii tərənnüm xarakterinə görə seçilir.

Göylərdən enəsən, yerə – yanıma

“Mələk” olduğunu danasan görüm!

Sevgisiz dünyanın qaranlığında

Özünü tək-tənha sanasan görüm!

Sən mənə biganə qaldın deməli

Qəlbimi yerlərə çaldın deməli

Görüb görməzliyə saldın deməli

Gecə yuxunda da anasan görüm!

Afaq Şıxlı sərbəst vəzndə də qələmini sınayıb və gözəl şeir nümunələri yarada bilib. Onun bu qəbildən olan “Özün söylə”, “Qoyma gedəm”, “Mənə sevgilim demə”, “Yollar uzaq”, “Minnətdaram” və sairə şeriləri də kitaba daxil edilib.

GÜNEL

525-ci qəzet.- 2011.- 26 noyabr.- S.31.