Xalq yazıçısı İlyas Əfəndiyevin vəfatının 15 illiyilə bağlı anım mərasimi keçirilib

Ötən gün Fəxri Xiyabanda Xalq yazıçısı, görkəmli dramaturq İlyas Əfəndiyevin vəfatının 15-ci ildönümü ilə əlaqədar anım mərasimi olub. Əvvəlcə mərasimdə iştirak edən ziyalılar ədibin məzarüstü abidəsini ziyarət edərək, qəbri üzərinə gül dəstələri qoyublar. Daha sonra mərasimdə giriş sözü ilə çıxış edən mədəniyyət və turizm naziri Əbülfəs Qarayev Azərbaycan ədəbiyyatında və milli teatrımızın inkişafında əvəzsiz xidmətləri olan İ.Əfəndiyev haqqında fikirlərini diqqətə çatdırıb: “15 ildir bizi cismən tərk edən İlyas Əfəndiyev yaradıcılığı, dramaturgiyası hər gün bizimlədir. O, təkcə Azərbaycan ədəbiyyatında deyil, eləcə də milli teatr sənətimizdə yeni səhifə açan dəyərli qələm sahibidir. 60 ildən artıq davam edən yaradıcılıq yolunda İlyas Əfəndiyev çoxsaylı qiymətli ədəbi nümunələr qələmə alıb. Bu əsərlər təkcə kəmiyyət yox, həm də keyfiyyət etibarı ilə seçilir və ədəbiyyatımızı zənginləşdirməklə bərabər uzun illər yetişməkdə olan gənc nəslin mənəvi tərbiyəsində, dünyagörüşünün formalaşmasında müstəsna rol oynayıb”.

Teatr Xadimləri İttifaqının sədri, xalq artisti Azər Paşa Nemətov İ.Əfəndiyevin Azərbaycan teatrındakı xidmətlərindən danışıb: “İlyas Əfəndiyev Azərbaycan milli teatr sənətinin inkişafına böyük töhfələr verən sənətkardır. Ötən əsrin müxtəlif illərində İlyas Əfəndiyevin qələmə aldığı pyeslər ən müxtəlif teatrların səhnələrində uğurla nümayiş etdirilib. Dramaturqun səhnələşdirilən pyesləri həm də Azərbaycana görkəmli aktyor ordusu qazandırıb. Həmin aktyorlar bu gün Azərbaycan teatrında öz sözlərini demiş korifeylərə çevriliblər”.

“Şəxsiyyətlər bizdən uzaqlaşdıqca, onların əzəməti daha çox hiss olunur. İlyas Əfəndiyev şəxsiyyəti, milli ədəbiyyat və təfəkkürümüzdə qələmə aldığı əsərləri ilə yer eləyib. Qələmə aldığı “Boy çiçəyi”nin rayihəsi hələ də teatrlarımızın səhnələrindən duyulur. Hələ də “boy çiçəyi” səhnələrimizi təravətləndirir. Bu gün yenə “Mahnı dağlarda qalıb”. Bu mahnını geri qaytarmaq lazımdır. Bu mahnını Qarabağa qaytarmaq dazımdır”. Bu ifadələri mərasimdə filologiya elmləri doktoru, professor Nizaməddin Şəmsizadə səsləndirib.

Sənətşünaslıq doktoru, professor Məryəm Əlizadə İ.Əfəndiyevin ədəbiyyata, yaradıcılığa gəlişini ədəbi hadisə kimi qiymətləndirib: “1938-1939-cu illərdə yaradıcılığa gəlişi ədəbi mühitdə dönüş yaratdı. O insanla bağlı bütün mövzulara yaradıcılığında yer ayırıb. Bu sahə ilə məşğul olanlar onun ciddi niyyətini, qarşıya qoyduğu məqsədin şahidlərinə çevrildilər. Lirik-psixoloji janrın əsasını qoyan dramaturq teatrda lirik psixoloji təmayülün banisi oldu. İlyas Əfəndiyevin şəxsiyyəti, ədəbi və dramaturji yaradıcılığı, əsərlərinin teatr təcəssümü və onlardan qaynaqlanan hər şey İlyas Əfəndiyev dramaturgiyasına yeni elmi konsepsiyaların araşdırma üsulları ilə yanaşmaq imkanı verir. İlyas Əfəndiyevin zəngin bədii irsi hələ çox tədqiqat işlərinin mövzusudur”.

Bakı Bələdiyyə Teatrının rəhbəri, xalq artisti Amaliya Pənahova ömrünün böyük bir hissəsini teatra həsr etmiş İlyas Əfəndiyevin səhnə üçün yazdığı bir çox əsərdə iştirak etdiyini deyib. A.Pənahovanın sözlərinə görə, bütün dövrlər üçün aktual olan İlyas Əfəndiyev yaradıcılığı, nəsillər dəyişsə də, hər zaman yaşayacaq.

Xalq yazıçısı Elçin çıxışında İ.Əfəndiyevin hansısa ideologiyaya deyil, yaradıcılığı ilə ədəbiyyata və təbii ki, xalqa xidmət etdiyini vurğulayıb. Ulu öndər Heydər Əliyevin sərəncamı ilə İ.Əfəndiyevin xatirəsinin əbədiləşdirildiyini deyən yazıçının oğlu İçərişəhərdəki küçələrdən birinə, eləcə də Elitar Gimnaziyaya ədibin adının verildiyini deyib.

Tədbirdə Akademik Milli Dram Teatrında İ.Əfəndiyevin yarad0000000ıcılığını əks etdirən CD-nin təqdimatının keçiriləcəyi diqqətə çatdırılıb.

HÜSNİYYƏ

525-ci qəzet.- 2011.- 4 oktyabr.- S.7.