ORALARDA
KİMLƏR VAR: YAZAR AİLƏLƏR
Şair-publisist: Kənan Hacı – Jurnalist:
İlhamə Dağlı –2
Bu işin
müxtəlif tərəfləri var.Bir ailədə eyni sənət
və eyni iş adamlarının öz aralarında dil
tapması və sakit günlər yaşaması məncə
bir o qədər də asan iş deyil.Çünki
ayrı-ayrı sənət sahibləri olanda yanlışlar o
saat aradan götürülə bilir.Vay o gündən ki, bizim
bu günlərin yazar ailələri kimi olasan və işlərin
də yağ kimi gedə.Ən azından mənəvi təsəlli
tapmasanız da, maddi durum heç zaman yetər dərəcədə
ola bilməyib məncə. Bunu mən apaydın bilirəm.Amma
bir-birini başa düşmək baxımından bunun həm
də zor tərəfləri də var.Xatırlayıram
: dünyaca məhşur yazarlardan birindən
soruşublar ki,sizin üçün ən acı,ən
ağır olan nədir? Deyib : ən
çox ona yanıram ki, mənim bu uzun ömrüm boyu nə
işlə məşğul olduğumu anam bilmədi.Soruşublar
niyə? Deyib : çünki mən ingilis
dilində yazdım anam isə ingilis dilində heç bilmədi.
Şükürlər
Allaha ki, mənim bu proyektimin insanları nə işlə məşğuldular
özləri də bilirlər.Və düşünürəm
ki, bu yazar ailələr həm də mehriban ailələrdi.Amma
bunların da ən qorxulu tərəfi, birinin
yazısını o birisi bəyənməməsi və
inkarlığıdı.
Ailədə
bir uşaq var.
–İlk
uşağınız olana qədərki dövrlə uşaq
doğulandan sonrakı vaxt nə ilə fərqlənir?
K.Hacı:-
Abi, biz hələ uşaq olana qədərki dövrü
yaşamaqdayıq. Hər ikimiz o vaxtı səbirsizliklə
gözləyirik, ikimizdən birimiz hələ yol gələn
o uşağı müvəqqəti olaraq əvəz edirik.
Bu da bir məşqdir. Pis
alınmır. O mənim ərköyünlüyümə
dözür, mən də onun şıltaqlığına.
İ.Dağlı:-Bu
dövr bir növ subaylığa bənzəyir. Uşaq ailənin
təməlini daha da möhkəmləndirir, uşaqsız ev susuz dəyirman kimidir. İnşallah,
inanırıq ki, tezliklə evimizdə çağa səsi
eşidiləcək. Hər dəfə
şopinqə çıxanda çoxlu uşaq paltarları
alıram. Əsas odur ki, ailədə
sağlam aura hökm sürür, bir-birimizi anlayırıq.
Yəqin ki, Allah qismət edərsə, arzumuz
yerinə yetsə bütün vaxtımı körpəmə
həsr edəcəyəm.
– Çox
vaxt siz ikiniz də evdə olmursunuz. Belə vaxtlarda
uşağınıza kim baxır və
ya baxardı, vaxtı necə bölürsünüz?
K.Hacı:-
İlhamə xanım Bakı Dövlət Universitetində
çalışır, günün çox hissəsini
işdə olur, mən də həmçinin. Evdən
səhər çıxıb axşam qayıdırıq.
Nə qədər çətin olsa da o, ev
işlərinin öhdəsindən gəlir, üstəlik,
yataq xəstəsi olan qayınanama, anasına qulluq edir, yəni
vaxtı düzgün bölə bilir. O yaşlı, xəstə
qadın da elə uşaq kimidir. Yəqin ki,
uşağa baxmaq da problem olmaz. O baxımdan elə indidən
arxayınam.
İ.Dağlı:-
Əgər bu xoşbəxtlik mənə üz versə,
analıq məzuniyyətindən istifadə edəcəyəm.
İşə çıxarkən isə onu uşaq
bağçasına verəcəyimi düşünürəm.
Çünki uşağa evdə baxa biləcək
başqa bir şəxs yoxdur. Anam
ağır yataq xəstəsidir, qayınanam isə rəhmətə
gedib. Yəqin ki, uşağın tərbiyəsiylə
birbaşa özüm məşğul olacağam. Kənan da bəri başdan bu vəzifəni mənə
həvalə edib.
–Ən
çox incik gününüz nə vaxt olub? Nə üstündə?
Küsəndə necə
barışırsınız?
K.Hacı:-Bilirsiniz,
mən bir az hövsələsiz adamam, bu
hövsələsizlik bəzən onun əsəbləşməsinə
səbəb olur. Bir məsələ də var
ki, müəyyən məsələlərdə təsadüfi
hallarda bir-birimizə kompromisə gedirik. Nə
o dediyindən dönür, nə də mən. Və inciklik yaranır. Amma
çox tez barışırıq. Çox
vaxt ilk təşəbbüsü mən edirəm. Kimin haqlı-haqsız olmasından asılı
olmayaraq o, həmişə gözləyir ki, mən gəlib
barışım. Mənim küsü
saxlamağa da hövsələm çatmır. Hövsələsizliyim belə məsələdə
işimə yarayır.
İ.Dağlı:-Gündəlik
küsüb-barışmaları nəzərə almasaq,
böyük mənada skandal yaşamamışıq. Bir də deyirlər, ər-arvadın savaşı
yaz yağışı kimidir. Kənanın
hövsələsizliyi mənim kimi səbirli adamı hövsələdən
çıxarır. Bu, yazı-pozu
adamlarının əksəriyyətinə xas olan bir
xüsusiyyətdir. Mən çox kinliyəm,
bunu bildiyindən çox vaxt özü barışır.
Elə bil heç nə olmayıb. Mən uşaqlıqdan evin ərköyünü
olmuşam, bu ərköyünlük hələ də məndə
qalır. Bəzən o, mənim ərköyünlüyümə
dözmür. Amma küsəndə də
ilk addımı Kənan atır. Əlbəttə,
böyük mənada xəyanət olarsa, onu heç vaxt
bağışlamaram.
–
Yaradıcılıq və uşağınızın tərbiyə
məsələsini necə qurmusuz? Uşağınızla
çoxmu vaxt keçirirsiniz?
K.Hacı:-Bu
suala yuxarıda cavab vermişəm.
İ.
Dağlı:-Yaradıcılıq ən çox vaxt aparan bir
işdir. Mən heç vaxt
uşağımın tərbiyəsini
yaradıcılığıma qurban vermərəm. Əksinə, yaradıcılığımı
qurban verərəm. Çünki o
uşağın gələcəyi mənim üçün
həyati bir məsələdir. Vaxtımın
çoxunu uşağıma həsr edəcəyəm.
–Həyat yoldaşınızdan
bir valideyn və bir qələm sahibi kimi
razısınızmı?
K.Hacı:-Mən
inanıram ki, o yaxşı valideyn olacaq. Yaradıcılıq
baxımından baxışlarımız fərqlidir, bəzən
ədəbi yöndə mübahisələr edirik. Əlbəttə, hər kəs yenə öz fikrində
qalır. Amma o, öz sahəsini çox
gözəl bilən bir mütəxəssisdir. Bu, tərif deyil, real faktdır. Dilçiliklə
məşğuldur, dialektləri araşdırır, xeyli
sayda elmi məqalələri çap olunub. Eyni zamanda bədii yaradıcılıqla da məşğul
olur. Mən çox vaxt öz
yazılarımda dillə bağlı məsələlərdə
onun fikriylə hesablaşıram. İlhamə
xanım üç kitabıma redaktorluq edib.Ümumən,
razıyam.
İ.Dağlı:-O,
öz üzərində həddən çox
çalışır, Kənanın mütaliəsi çox
zəngindir. Antik dövrdən tutmuş
müasir dünya ədəbiyyatına qədər demək
olar ki, bütün müəllifləri oxuyub. Klassik ədəbiyyatı da yaxşı bilir. Fəlsəfi, dini, tarixi kitablar onun stolüstü
kitablarıdır. Mən onunla tanış
olanda onun mütaliə dairəsinin genişliyi məni heyrətləndirmişdi.
Tərcüməylə məşğul olur,
reportajlar yazır, roman üzərində işləyir, arada
şeir, hekayə də yazır, üstəlik, ədəbi tənqidlə
də məşğul olur. Onun xeyli sayda ədəbi
tənqidi yazıları var, tərcümələri var.
Çox məhsuldardır. Hərdən mən
onun səhhətinə görə çox narahat oluram,
axı səhhəti qaydasında deyil, qara ciyərində
ciddi problemlər var. Mümkün qədər onu qorumağa
çalışıram.
–Ailə
qayğılarınızı necə
bölüşürsünüz?
K.Hacı:-
Bizim ailədə konkret bölgü yoxdur. O, əksər
hallarda çalışır ki, problemlər məni
yormasın. Bu, onun xarakterindən gələn bir şeydir,
heç vaxt fikirləşmir ki, bu kişi
işidir, qoy özü həll eləsin. Bütün
məişət problemlərini birlikdə həll etməyə
cəhd edirik, hər ikimiz ailənin rifahı
üçün çalışırıq. O,həm də bir yazar kimi mənim
qayğımı çəkir, çalışır ki,
yaradıcılığa daha çox vaxt sərf edim. Bir yaradıcı insan olaraq da məni dəyərləndirdiyi
üçün ona minnətdaram.
İ.Dağlı:-
Ailəmiz o qədər də böyük deyil,
irili-xırdalı problemləri çalışıb birlikdə
aradan qaldırırıq.
–İkili
imza ilə yazınız çıxıbmı və bu
hansı yazıdır?
K.Hacı:-
Xeyir, ikili imza ilə yazımız çıxmayıb. Gələcəkdə bu olacaq, ya olmayacaq, deyə
bilmərəm.
İ.Dağlı:-
İkili imza ilə yazımız çıxmayıb və
belə bir ehtimal da yoxdur.Çünki mən onun
yazılarını ancaq çap olunandan sonra oxuyuram. Onun üç kitabının redaktoru olmuşam,
dillə bağlı məsələlərdə çox vaxt
mənimlə məsləhətləşir.
–Ailəvi
bayramlarınız hansılardı və bu əlamətdar
günləri kimlərlə keçirirsiniz?
K.Hacı:-
Bayaq qeyd etdiyim kimi biz ikimiz də eyni gündə anadan
olmuşuq, mart ayının üçü ikimiz
üçün də bayram hesab olunur və bu günü hər
il xüsusi olaraq qeyd edirik. Tanış
olduğumuz gün, toy günümüz əlamətdar
günlər sırasındadır. Bu
günlərdə dostları bir yerə toplayırıq, istəyirik
ki, onlar da sevincimizə şərik olsunlar.
İ.Dağlı:-
Bildiyiniz kimi, mayın 10-da tanış
olmuşuq. Bu gün həm də mənim
gül bayramım olur, Kənan həmin gün evə gül dəstəsiylə
gəlir. Bu, artıq ənənə şəklini
alıb. Bizim toyumuz sentyabrın 2-sinə təsadüf
edib. Evliliyimizin bir ili tamam olana qədər
hər ayın 2-sini təkcə ikimiz qeyd edirdik. Həmin günləri çox vaxt evdə, bəzi
hallarda isə restoranda keçirmişik. Bir də
anamın ad günləri olanda sevinirəm ki,
şükür, anam bu il də ad
gününü bizimlə birlikdə keçirdi.
–Bəy əfəndi,
siz xanımınızdan nə soruşmaq istərdiniz?
K.Hacı:-Biz
bəzən yorulana qədər bir-birimizi sorğu-suala çəkirik.
Məncə, sualımı qəzet vasitəsilə
deyil, birbaşa özünə versəm, daha yaxşı
olar.
–Xanım əfəndi,
siz həyat yoldaşınızdan nə soruşmaq istərdiniz?
İ.Dağlı:-
O məndən uzaqda deyil axı. Şükür,
özündən nəsə soruşa bilirəm.
lll
Kənan
Hacıdan bir şeir
tənha günlərimin şeirləri
nə dadır görən?
kədərin dozası bir az
çox olub,
bilirəm,
qanımı sıxmışam varağın üstə,
varaq qızardıqca
üzüm ağarıb,
bilirəm,
yenə ürəyim soyumayıb,
pəncərəmə üz söykəyib
sızlayan ayın işığına da
zülm eləmişəm,
sübhün gözü açılıncayadək
didərgin duyğuların əlində
çırpınıb, bilirəm,
əski günahlarımı
hər dəfə salır yadıma
tənha günlərimin şeirləri...
köçəri quşlar kimi
baş alıb gedir doğma yerlərə,
tənha günlərimin şeirləri,
burda köçəri quşlar
gözündən vurulurlar...
İlhamə
Dağlıdan bir esse
...Qəfildən
könlünə siqaret düşdü. Amma siqareti yox idi, on il idi ki, siqareti tərgitmişdi. Birdən yadına düşdü ki, iki gün əvvəl
dostlarından biri siqaretini oğlanın daxmasında
unutmuşdu. Oğlan tez siqareti tapıb
yandırdı, acgözlüklə tüstünü ciyərlərinə
çəkdi.
Siqaretin
tüstüsü burula-burula havaya qalxırdı. Oğlan siqaret
damağında çarpayıya uzandı və ona elə gəldi
ki, bu tüstü deyil, qızın saçlarıdır,
yavaş-yavaş onun üzünə dağılır.
NOT: “YAZAR
AİLƏLƏR” proyektimizdə,layihəmizdə
iştirak eləyən bütün qələm sahiblərinə
təşəkkürümü bildirir və onlara
cansağlığı, yaradıcılıq uğurları
arzu edirəm.
Tofiq ABDİN
525-ci qəzet.- 2011.- 8
oktyabr.- S.23.