Yazıçı Günel Anarqızı Almaniya və Yunanıstanda keçirilən beynəlxalq tədbirlərdə iştirak edib

“AZƏRBAYCAN MƏDƏNİYYƏTİNİN TƏBLİĞİ, AVROPA VƏ DÜNYA MƏDƏNİYYƏTİNƏ İNTEQRASİYASI ÜÇÜN BELƏ TƏDBİRLƏRDƏ FƏAL İŞTİRAK ETMƏK VACİBDİR”

Bugünlərdə Almaniyadakı Azərbaycan diasporunun təşkilatçılığı ilə “Qadınlar ənənə və emansipasiya arasında” adlı tədbir keçirilib. Tədbirdə Azərbaycanın Almaniyadakı səfirliyinin əməkdaşları, Azərbaycan diasporunun nümayəndələri, Azərbaycan Evinin sədri Tofiq Qarayev, Almaniyada təhsil alan azərbaycanlı tələbələr və alman ictimaiyyətinin nümayəndələri, eləcə də incəsənət və ədəbiyyat sahəsinin təmsilçiləri iştirak ediblər.

Berlin-Bakı Qalereyasında Almaniyadakı Azərbaycanlıların Koordinasiya Mərkəzi (AAKM) ilə birgə keçirilən tədbirin qonağı “Ölkəm” və “Pəncərə (mədəniyyətə baxış)” jurnallarının baş redaktoru, yazıçı-publisist Günel Anarqızı olub.

Görüşü Berlin-Bakı Qalereyasının direktoru İbrahim Ehrari giriş sözü ilə açaraq, qonaqları salamlayıb və Günel Anarqızını tədbir iştirakçılarına təqdim edib. AAKM-in icraçı direktoru xanım Samira Patzer-İsmailova tədbiri idarə edərək yüksək texniki inkişaf dövründə qadının cəmiyyətdəki yerindən və rolundan qısa söhbət açıb və Azərbaycan qadınının keçdiyi mübarizə və inkişaf yolundan danışmaq üçün sözü Günel Anarqızına verib.

Günel Anarqızı Azərbaycan qadınının ədəbiyyatda təsvir edilən obrazı, tarixi inkişaf dövründə bu obrazın dəyişməsi haqda məlumat verib. G.Anarqızı bildirib ki, müasir Azərbaycan qadını – iki böyük sivilizasiyanın məhsuludur. Kökləri şərq mədəniyyətinə bağlı olan Azərbaycan qadını intellektual cəhətdən Avropa mədəniyyəti ilə tərbiyələnmişdir. Azərbaycan mədəniyyəti və tarixi, Azərbaycan qadını təsəvvürünün formalaşması qədim köklərə malikdir. Azıx mağarası və Qobustan qayaüstü şəkilləri buna sübutdur.

Azərbaycanda sovet hakimiyyətinin qurulmasından və ondan əvvəlki dövrdə qadınların savadlanması, cəmiyyətdə və ailədə tutduğu mövqe barədə məruzəni tədbir iştirakçıları maraqla dinləyib və müasir Azərbaycan qadınının indiki dövrdə cəmiyyətdə tutduğu yer, Azərbaycanda qadınların peşə seçimi barədə G.Anarqızına suallar veriblər. Əsasən diskussiya şəklində keçən görüşün sonunda AAKM-nin əməkdaşı Naibə Hantel G.Anarqızının “Ağac” adlı hekayəsindən parçalar oxuyaraq Günel xanımın əsərini alman dilində tədbir iştirakçılarına təqdim edib. Berlin-Bakı Qalereyasının icraçı direktoru İbrahim Ehrari Azərbaycanı, Azərbaycan qadınını və ədəbiyyatını Almaniyada tanıtdığı üçün Günel Anarqızına öz təşəkkürünü bildirib. Sonra qonaqlar G.Anarqızının kitabları və baş redaktoru olduğu jurnallarla tanış olub və onunla söhbəti masa arxasında davam etdiriblər.

G.Anarqızı bizimlə söhbətində bildirdi ki, bugünədək Berlin-Bakı Qalereyasında bir-birindən gözəl sənət əsərləri nümayiş olunub: “Berlin-Bakı Qalereyası Almaniyada yaşayan həmvətənimiz, rəssam İbrahim Əhrari və azərbaycanlı incəsənət xadimi Emil Məmmədovun təşəbbüsü ilə yaradılıb. 2007-ci ildən fəaliyyət göstərən bu qalereya Bakıdakı “Qız qalası” rəsm qalereyasının Berlindəki filialıdır. İndiyədək burada 62 Azərbaycan, 46 alman rəssamının sərgisi keçirilmişdir. Açılışından bəri qalereyada 43 sərgi, bu ilin ötən dövründə isə 12 sərgi təşkil olunub. Hazırda qalereyada alman rəssamı İnqa Şmitin və Azərbaycan rəssamı Əli İbadullayevin rəsm əsərləri sərgilənir. Bir neçə gün sonra Azərbaycanın birinci xanımı Mehriban Əliyeva Almaniyaya səfəri çərçivəsində bu qalereyada oldu. Bakıdakı “Qız qalası” rəsm qalereyasının direktoru Emin Məmmədov Berlin-Bakı Qalereyasının fəaliyyəti barədə Mehriban Əliyevaya məlumat verdi. Azərbaycanın birinci xanımı Berlin-Bakı Qalereyasının rəhbəri, tanınmış rəssam İbrahim Əhrari ilə görüşdü. Bu qalereya Azərbaycan mədəniyyətinin təbliği baxımından mühüm əhəmiyyət kəsb edir. Fikrimcə, burada belə görüşlərin təşkili Azərbaycanın müsbət imicinin formalaşmasına müsbət təsir göstərir”.

G.Anarqızı bildirib ki, Yunanıstanın Rodos adasında “Sivilizasiyaların dialoqu” adlı növbəti mötəbər forum keçirilib. Forum artıq doqquz ildir ki, hər ilin oktyabr ayında Rodosda təşkil olunur. Foruma hər il dünyanın müxtəlif ölkələrindən çox sayda nümayəndə qatılır: “Sivilizasiyaların dialoqu” adlı bu forum Rusiya prezidentinin patronajı altında keçirilir. Forumun prezidenti Rusiyanın nüfuzlu və məşhur simalarından olan Vladimir Yakunindir. Tədbirdə iştirak üçün hər il mənə təşkilatçılar tərəfindən dəvət göndərilir. Mən ilk dəfə 2008-ci ildə bu forumda iştirak etmişəm. 2009-cu ildə də təşkilatçılar tərəfindən mənə dəvət göndərilmişdi. Ancaq müəyyən səbəblərdən mən 2009-cu ildə keçirilən foruma qatıla bilmədim. Ancaq ötən il il böyük məmnuniyyətlə gedib forumda iştirak etdim. Bu il də mənə dəvət gəldi və mən dəvəti qəbul edib tədbirə qatıldım”. G.Anarqızı deyir ki, forumda MDB ölkələrindən çoxlu nümayəndə iştirak edib: “Çox sevindirici haldır ki, bu il Azərbaycan də geniş bir heyətlə tədbirə qatılmışdı. Məndən başqa alim Zaur Həsənov, AAKM-in icraçı direktoru xanım Samira Patzer-İsmailova və digər ictimaiyyət nümayəndələri, gənclər nümayəndə heyətinin tərkibinə daxil idi. Biz, Azərbaycandan olan nümayəndələr bacardığımız qədər ölkəmizi forumda fəal təmsil etməyə çalışdıq. Müxtəlif seksiyalarda iştirak etdik. Əvvəlki illərdə forumda Gürcüstan, Ermənistan və digər ölkələr daha geniş tərkibdə iştirak edirdilərsə bu il Azərbaycanın nümayəndə heyəti daha geniş tərkibdə idi. Bu da məni doğrudan da çox sevindirir. Ümid edirəm ki, gələn il bizim nümayəndə heyətinin tərkibi daha da genişlənəcək”. Baş redaktorun dediyinə görə, forumda əsasən müxtəlif sivilizasiyalar arasında münasibətlər qurulmasından və ünsiyyətin inkişafından bəhs olunub. Mədəni, iqtisadi, siyasi, sosial və başqa sahələr üzrə fəaliyyət göstərən cəmiyyətlərin üzvləri forumda iştirak ediblər. Forum çərçivəsində sözügedən sahələr üzrə çalışan insanların qarşılıqlı dialoqu qurulub. Tərəflər arasında fikir və təcrübə mübadiləsi aparılıb: “Forumda çox maraqlı mövzular müzakirə olunurdu, dəyərli təkliflər irəli sürülürdü. Məruzələrin mövzuları da çox maraqlı idi. Cənab Yakuninə sual verəndə ki, artıq neçə ildir bu forum təşkil olunur, bəs bu forumun məqsədi, məramı, əldə olunan nəticələr nədən ibarətdir, o, cavabında bildirdi ki, bu illər ərzində forumda müzakirə olunan əksər məsələlər öz həllini tapıb, irəli sürülən təkliflər həyata keçirilib. Bu bir daha onu göstərir ki, forum əbəs yerə təşkil olunmayıb, çəkilən zəhmət hədər getməyib. Foruma hər il dünyanın bütün ölkələrindən çoxlu sayda nümayəndənin qatılması bu tədbirə insanlar tərəfindən böyük maraq göstərildiyini sübut edir. Tədbir zamanı müxtəlif sahələrin təmsilçilərin arasında ünsiyyət, əlaqələr qurulur və gələcəkdə onların işbirliyi yaranır. Biz də forumda bir sıra insanlarla ünsiyyətdə olduq. Onlar arasında elələri var idi ki, Azərbaycan haqqında az məlumatlıydı və bizdən ölkəmiz haqda ətraflı məlumat verməyi istəyirdi. Biz də, təbii ki, Azərbaycan haqda onları maraqlandıran bütün suallara ətraflı və dolğun cavab verdik. Biz həmçinin forumda iştirak edən digər ölkələrin nümayəndələrinə də Azərbaycan, onun qədim tarixi və zəngin mədəniyyəti barədə geniş danışdıq”.

G.Anarqızı qeyd edib ki, o, forum çərçivəsində müxtəlif seksiyalarda, dəyirmi masalarda iştirak edib, diskussiyalara qatılıb: “Mən forumun əksər iştirakçıları ilə sıx təmasda idim və biz tez-tez görüşür, müxtəlif mövzular ətrafında müzakirələr aparırdıq. Biz forum iştirakçılarına bildirdik ki, Qafqaz sıra dağları Xəzər dənizi arasında yerləşən Azərbaycan planetin nadir guşəsidir. Azərbaycan qədimdən “odlar ölkəsi” adlandırılır. Buna səbəb səthə yaxın yerləşən neft və qaz yataqları idi. Çatlardan yuxarı çıxan təbii qaz tez-tez ildırım və ya tonqalın pis yandırılması nəticəsində alışırdı. Torpaqdan qalxan bu alov məşəlləri qədimdə adamlara çox güclü təsir bağışlayırdı. Buraya XIX əsrin sonuna qədər Hindistandan atəşpərəstlər ziyarətə gəlirdilər. Onların məbədləri bu günə qədər Bakının yaxınlığında Abşeron yarımadasında qalmışdır. Buradan Bizans sirli “yunan alovu” üçün neft aparırdı. Bu gün də yeni müstəqil Azərbaycan dövləti bütün dünyada əsasən öz neft mədənlərinə görə məşhurdur. Lakin bu cavan ölkə zəngin və qədim tarixə malikdir. Onun ərazisində ibtidai insanın sakin olduğu ən qədim yerlərdən biri – Azıx mağarası – aşkar edilmişdir. Bakının yaxınlığında Qaradağ dağlarında yaşı təxminən 10 min il olan qaya üzərində həkk olunmuş şəkillər qalmışdır. Fikrimcə, Azərbaycanın zəngin mədəniyyətinin, adət-ənənələrinin təbliği, Avropa və dünya mədəniyyətinə inteqrasiyası üçün belə tədbirlərdə fəal iştirak vacibdir. Mən imkanım olduğu təqdirdə növbəti illərdə keçiriləcək forumlara da qatılmaq fikrindəyəm”.

G.Anarqızı vurğulayıb ki, forum çox yüksək səviyyədə və gözəl bir məkanda – Rodos adasında təşkil olunub: “Rodos Yunanıstana məxsus olan və ölkə paytaxtı Afinadan 270 dəniz mili aralıda, Egey dənizində yerləşən adadır. Adanın ərazisi 1398 kilometrdir. Böyüklüyünə görə Rodos adası Yunanıstan adaları arasında 4-cü yeri tutur. Adanın əhalisi 125 000 nəfərdir. Rodosun iqlimi Aralıq dənizi hövzəsi iqliminə uyğun olaraq mülayimdir. İlin 300 günü günəşli olur. Adanın uzunluğu 78 km, eni isə 38 km-dir. Sahillərini qərbdən Egey dənizinin, şərqdən Aralıq dənizinin suları yuyur. Egey dənizinin yuduğu sahil ərazilərdə bitki örtüyü daha zəngindir. Rodos Yunanıstanın ən əsas turizm mərkəzlərindən biridir. Adanın inzibati mərkəzi şimal-şərqdə yerləşən Rodos şəhəridir. 1912-ci ilə İtaliya-Osmanlı müharibəsinin nəticəsində İtaliya adanı ələ keçirib. 1948-ci ildə isə Rodos adası Yunanıstana birləşdirilib. Oranın gözəl iqlimi və yaradılan rahat şərait tədbirin yüksək səviyyədə keçməsinə böyük kömək etdi”.

Yaradıcılıq planlarından söz açan G.Anarqızı qeyd edib ki, “İbrus” teatrında onun əsəri səhnələşdiriləcək: “Artıq işin 90 faizi görülüb, kiçik bir hissəsi qalıb. Fikrimcə, çox maraqlı bir tamaşa alınacaq son nəticədə. Mənə elə gəlir ki, həm bizim teatr aləmi üçün həm də, kino aləmi üçün çox maraqlı bir yenilik olacaq. Mən novatorluğu xoşlayıram, çalışıram ki, daim çalışdığım sahəyə yenilik gətirim. Mənə elə gəlir ki, bizim bu son işimiz yeni ab-hava gətirəcək. Hazırda teatrda təmir işləri gedir. Deyilənlərə görə bu yaxınlarda təmir işləri başa çatacaq. İnanıram ki, bu ilin axırına kimi biz bu tamaşanı tamaşaçılara təqdim edəcəyik”.

Sevinc QARAYEVA

525-ci qəzet.- 2011.- 15 oktyabr.- S.11.