“Azərbaycan mətbuatının
gələcək inkişafı üçün
kadr hazırlığına xüsusi diqqət yetirilməlidir”
Müsahibimiz
Naxçıvan Dövlət Universitetinin “Jurnalistika və
dünya ədəbiyyatı” kafedrasının müdiri,
filologiya üzrə fəlsəfə doktoru Surə Seyiddir.
–
İnformasiyalı cəmiyyətə keçid şəraitində
mətbuatın rolunu necə qiymətləndirirsiniz?
–
Bütün sivil xalqların tarixində mətbuat önəmli
rol oynayır. Azad və demokratik mətbuatın mövcud
olduğu ölkələrdə fikir və düşüncə
plüralizmi, hadisələrə obyektiv və qərəzsiz
yanaşma tərzi onun xalq və hakimiyyət arasında
körpü rolunu oynamasına kömək olur. Mətbuatın
hakimiyyət üçün əvəzedilməz qüvvə
olduğunu anlayan uzaqgörən liderlər onun
inkişafına şərait yaratmaqla, eyni zamanda dövlətin
inkişafının da təminatçısına çevrilirlər.
Kütləvi İnformasiya Vasitələrini gücləndirmək
dövlətin gücünü artırmaq deməkdir-prinsipinin
öz fəaliyyətində uğurlu tətbiqinə nail olan
dahi öndər Heydər Əliyevin bu sahəyə
ardıcıl diqqət və qayğısının nəticəsidir
ki, bu gün Azərbaycanda 4 mindən artıq KİV qeydə
alınıb, mətbuatın inkişafı dövlətin
strateji məqsədlərindən birinə çevrilib.
İnformasiyalı
cəmiyyətə keçid şəraitində yaşayan məmləkətimizdə,
qələm sahiblərinə yaradılan azad söz və
plüralizm dövlətimizin bu sahəyə nə qədər
önəm verdiyini bir daha təsdiqləyir. Naxçıvan
isə həmişəki kimi Azərbaycanda gedən
ictimai-siyasi proseslərin önündə dayanmaqla mətbuatın
bayraqdarı missiyasını şərəflə yerinə
yetirir. Güclü mətbuatın yaranması isə peşəkar
jurnalist ordusunun formalaşması ilə bağlıdır. Jurnalist
hazırlığı ilə məşğul olan ali təhsil
ocaqları, məhz bu sahəyə önəm verməli və
Azərbaycan mətbuatının gələcək
inkişafını təmin etmək üçün kadr
hazırlığına xüsusi diqqət yetirməlidirlər.
–
Jurnalist hazırlığından söz
düşmüşkən, deyə bilərsinizmi muxtar
respublikanın ən böyük ali təhsil müəssisəsi
sayılan Naxçıvan Dövlət Universitetində mətbuat
işinin yaranması hansı dövrə təsadüf edir?
–
Naxçıvan Dövlət Universitetində mətbuat
işinin yaranması Azərbaycanın müstəqillik ərəfəsində
keçdiyi tarixi dövrlə üst-üstə
düşür. 15 oktyabr 1991-ci ildə Naxçıvan
Dövlət Universitetində nəşrə başlayan
“Fikir” adlı universitet qəzeti milli-tarixi proseslərin
işığında meydana çıxan, Azərbaycan ali təhsil
sistemində çap olunan ilk mətbuat orqanı kimi xüsusi
əhəmiyyət kəsb edir. Azərbaycan SSR Dövlət Mətbuat
Komitəsinin 5 sentyabr 1991-ci il tarixdə verilmiş 330
saylı qeydə alınma şəhadətnaməsi əsasında
nəşrinə icazə alınmış “Fikir” qəzeti Azərbaycan
ali təhsil sistemində region universitetində çap olunan
ilk mətbuat orqanı idi. Azərbaycan SSR Nazirlər Sovetinin
29 dekabr 1990-cı il tarixli qərarı ilə Yusif Məmmədəliyev
adına Naxçıvan Dövlət Pedaqoji İnstitutunun əsasında
Naxçıvan Dövlət Universitetinin yaradılması da
“Fikir” qəzetinin meydana çıxmasında mühüm rol
oynamışdır. Universitet statusu qazanması ali məktəbin
çoxtirajlı qəzetinin çıxmasına təminat
verən əsas faktorlardan biri idi. O zaman Naxçıvan
Dövlət Universitetinin mətbuu orqanının “Fikir”
adlandırılması vaxtilə Qori Müəllimlər
Seminariyasının Azərbaycan şöbəsinin inspektoru
Aleksey Osipoviç Çernyayevskinin həmin seminariyanın
Naxçıvandan olan məzunu Əliməmməd Xəlilovla
birlikdə Tiflisdə nəşr etdirmək istədikləri,
lakin çapına nail ola bilmədikləri “Fikir” adlı
maarifçi qəzetin adını yaşatmaq, ənənəsini
davam etdirmək məramı ilə əlaqələndirilmişdi.
Qəzetin 12 noyabr 1991-ci il tarixli ikinci sayında dərc
edilmiş “Fikir” qəzeti – 98 il sonra” adlı məqalədə
eyni zamanda bu mətbuat orqanı “fikirləşməyi,
düşünüb müqayisə etməyi, nəticə
çıxarmağı bacaranlar üçün söz kürsüsü”
kimi də səciyyələndirilmişdi. “Fikir” qəzeti
Naxçıvan Muxtar Respublikasında ali məktəb müəllimləri
və tələbələrinin mətbuat tribunası kimi
1997-ci ilədək fəaliyyətini davam etdirərək
maarifçi düşüncənin inkişafına kömək
etmiş, universitet həyatının salnaməsini
yaratmışdır.
Sonrakı
illərdə Avropa universitetlərinə inteqrasiya sayəsində
Qərb ali məktəblərində qəzetlərin deyil,
informasiya bülleteni tipli jurnalların nəşr edilməsi
təcrübəsinə istinad edilərək Naxçıvan
Dövlət Universitetində “Fikir” qəzetinin bazasında
eyni adlı informasiya bülleteninin çap edilməsi qərara
alınmışdır. Ötən illər ərzində
“Fikir” informasiya bülleteni uğurla Naxçıvanda ali məktəbin
elmi-maarifçi mühitinin gedişatını
işıqlandırmaqda davam etməkdədir. Naxçıvan
Dövlət Universitetinin keçdiyi inkişaf yolunu, bu ali təhsil
ocağında gedən yeniləşmə proseslərini
öyrənmək istəyənlər üçün “Fikir”
informasiya bülleteni mühüm əhəmiyyətə malik
olan mənbədir.
– Bəs,
Naxçıvan Dövlət Universitetində “Fikir” informasiya
bülleteninə əlavə kimi “Yeni fikir” adlı ali məktəb
qəzetinin nəşri hansı zərurətdən
yaranıb?
–“Fikir”
informasiya bülleteni universitet mühitində meydana
çıxan elmi, yaxud ədəbi düşüncənin məhsulu
olan əsərlərin və ya publisistika nümunələrinin
geniş mənada ali məktəb auditoriyasına
çatdırılmasına xidmət etmək imkanlarına
malik deyildir. Doğrudur, Naxçıvan Dövlət
Universitetinin Azərbaycan Respublikasının Prezidenti
yanında Ali Attestasiya Komissiyasının Respublika səviyyəli
elmi nəşrlərin siyahısına daxil etdiyi “Elmi əsərlər”
jurnalı da mövcuddur. Ancaq digər ali məktəblərdə
olduğu kimi, Naxçıvan Dövlət Universitetində də
“Elmi əsərlər” jurnalı əsasən alimlər
üçün nəzərdə tutulduğundan bəlli bir
tirajla nəşr olunur və ədəbi-publisistik fəaliyyəti
əks etdirmir. Beləliklə, Naxçıvan Dövlət
Universitetində çoxseriyalı “Elmi əsərlər”
jurnalı və “Fikir” informasiya bülleteni ilə
yanaşı, ali məktəb qəzetinin də fəaliyyətinə
ehtiyac yaranmışdır. Xüsusən də universitetdə
“Jurnalistika” ixtisası istiqamətində bakalavr və magistr
pillələri üzrə kadr hazırlığının
mövcud olması da gələcəkdə həm də qəzet
nəşri sahəsində çalışacaq yeni nəsil
mətbuat işçiləri üçün tələbəlik
illərində ilkin təcrübə qazanmaq baxımından
da qəzetin çap edilməsi zəruri bir amil kimi meydana
çıxır. Bütün bunlara görə
Naxçıvan Dövlət Universitetində “Fikir” informasiya
bülleteninə əlavə kimi “Yeni fikir” adlı ali məktəb
qəzetinin nəşri məqsədəuyğun
sayılmışdır.
1
aprel 2011-ci il tarixdə nəşrə başlayan “Yeni fikir” qəzeti
20 il əvvəl Naxçıvan Dövlət Universitetində
nəşrə başlamış “Fikir” qəzetinin
davamıdır, yeni mərhələnin “Fikir” qəzetidir. Bu
qəzet zəruri məlumatlarla yanaşı xarakterinə
görə “Fikir” informasiya bülletenində gedə bilməyən
bədii-publisist yazılara da meydan açan mətbuat
orqanıdır. “Yeni fikir” eyni zamanda “Jurnalistika”
ixtisasının müəllimləri və tələbələri,
habelə taleyini mətbuatla bağlamaq istəyən hər kəs
üçün peşə məktəbi funksiyasını
da həyata keçirəcəkdir. Gələcək jurnalistlər
bu qəzetin nəşri vasitəsilə publisistika sənətkarlığının
xüsusiyyətlərini öyrənməklə
yanaşı, həm də mətbəə ilə əlaqəli
çalışmaq vərdişlərinə yiyələnmək,
maket qurmaq, fotojurnalistikanı mənimsəmək
baxımından münasib imkanlar qazana biləcəklər.
“Yeni fikir” universitet mühitindəki elmi-maarifçi
baxışların ədəbi-publisist düşüncə
ilə zənginləşdirilməsinə də xidmət edəcəkdir.
–
Müasir dövrdə NDU-da jurnalistika istiqaməti üzrə
kadr hazırlığının vəziyyəti nə yerdədir?
–
İnformasiya və multimedia əsri sayılan XXI əsr öz
gəlişi ilə universitetdə mətbuatın da
inkişafını sürətləndirərək onu operativ
və dinamik bir sahəyə çevirdi. 2000-ci ildə
universitetdə mətbuat xidmətinin yaradılması ilə
ali təhsil ocağının ictimaiyyətlə əlaqələri
quruldu. 2001-ci ildən NDU-da Jurnalistika ixtisasının fəaliyyətə
başlaması, 2002-ci ildə “Jurnalistika və dünya ədəbiyyatı”
kafedrasının açılması isə bu sahə üzrə
kadr hazırlığının sistemli və mütəşəkkil
aparılmasına kömək etdi. 2006-cı ildən
Universitet nəzdində ayrıca kanalda yayımlanması nəzərdə
tutulan Universitet Televiziyasının (UTV) yaradılması nəzəri
biliklərin informasiya-kommunikasiya texnologiyalarının köməyi
ilə tədrisinə təkan vermiş oldu. Müasir şəraitdə
kabel televiziyası anlayışını gündəmə gətirən
universitet televiziyası ali təhsil ocağının 110
hektarlıq ərazisində yerləşən tədris korpuslarının
böyük auditoriyalarında qurulmuş monitorlar vasitəsilə
bütün universitet ərazisində yayımlanır. Studiya,
rejissor və montaj otaqları, redaksiya otağı,
auditoriyalardan ibarət olan televiziya Naxçıvan MR Ali Məclisinin
sədri Vasif Talıbovun diqqət və qayğısı ilə
ən son texniki avadanlıqlarla da təchiz edilib. Texnologiya əsrinin
müasir tələblərini gerçəyə çevirməklə
tələbələrə tədris prosesində öyrəndikləri
nəzəri biliklərin praktikada tətbiqinə nail
olmağı və onlara yaradıcılıq imkanları
açmağı qarşıya məqsəd qoyan televiziya,
eyni zamanda, Azərbaycanda və dünyada baş verən elm və
təhsil sahəsindəki yeniliklər, informasiya
texnologiyalarının bugünkü vəziyyəti, Azərbaycan
gəncliyini düşündürən məsələləri
mavi ekran vasitəsilə akademik auditoriyaya çatdırmaq
gücünə malikdir.
Universitet
televiziyası qloballaşan dünyamızın tələblərindən
biri sayılan telekörpü vasitəsilə professor-müəllim
heyətinin aktuallıq kəsb edən mühazirələrini,
universitetə dəvət almış xarici qonaqların arzu və
tövsiyələrini televiziya vasitəsilə geniş dinləyici
kütləsinə çatdıraraq özündə yenilik,
inkişaf və inteqrasiya kimi anlayışları birləşdirir.
Dövlətçilik prinsiplərini özündə əks
etdirən televiziyada, ümummilli lider Heydər Əliyevin,
ölkə başçısı İlham Əliyevin
Naxçıvana, o cümlədən Naxçıvan Dövlət
Universitetinə səfərləri də videolentin tarixi
yaddaşına çevrilməklə televiziya arxivinin dövlətçilik
guşəsini bəzəməkdədir. Fəaliyyət
göstərdiyi müddətdə həm də sənədli
filmlərin çəkilişi və montajı ilə məşğul
olan televiziya universitet heyətini xarici səfərlərdə
müşayiət edən tələbə operator və
müxbirlər də yetişdirir. Universitet
televiziyasının 2010-cu ildə Kentavr beynəlxalq film
festivalında iştirakı və uğurlu təmsili tələbə
və müəllimlərimizin operator, rejissor və montaj
işinə, sənədli filmlər çəkilişi
üçün qoyulan tələblərə daha məsuliyyət
və həvəslə yanaşmasını tövsiyə
edir. Hazırda dövlətimizin qayğısı və
universitet rəhbərliyinin təşəbbüsü ilə
televiziyanın davamlı fəaliyyət göstərməsi
üçün lisenziya alınmış və universitet
televiziyasında hazırlanan verilişlərin şəhər
daxilində yayımlanması üçün tezlik
ayrılmışdır.
–
Müstəqilliyimizin 20 illiyinin qeyd olunduğu 2011-ci il
universitetin mətbuat tarixində hansı əlamətdar hadisə
ilə yaddaqalan olub?
– 2011-ci il universitetin
mətbuat tarixində
yaddaqalan illərdən
birinə çevrilmişdir.
Belə ki, aprel ayından nəşrə başlayan
“Yeni Fikir” qəzeti, daha sonra yeni yaradılan
universitetin “Nuhçıxan”
radiosu, yenidən qurulan universitet televiziyası, əyani vasitələr, multimedia və
audio-vizual texniki imkanlarla zəngin televiziya və radio tədris kabinələri,
mətbuat xidməti və jurnalistika kitabxanasını özündə
cəmləşdirən və
ən nəhayət bütün görülən
işlərin yekun zirvəsi sayılacaq Media
Mərkəzinin açılması,
məhz Naxçıvanda
mətbuatın yaranmasının
90 illik yubiley təntənələrinə ən
layiqli başlanğıc
olmuşdur. Azərbaycan
ali təhsil
sistemində analoqu olmayan media mərkəzində
tələbələrin peşəkar
jurnalist kimi yetişməsinə, nəzəri
biliklərin praktik tətbiqinə nail olmaları
üçün heç
bir meneə qalmamışdır. Milli Mətbuat
Günü ərəfəsində
açılışını qeyd etdiyimiz Media Mərkəzində geniş
toplantı keçirilmiş,
müxtəlif mövzularda
məruzələr dinlənilmişdir.
Daha sonra Media Mərkəzində yaradılan
qurumların fəaliyyəti
ilə tanış
olan qonaqlar universitet televiziyasının
5 illik fəaliyyətini
əks etdirən sənədli filmi izləmişlər. Canlı efiri
izləmək imkanı
qazanan qonaqlar UTV-nin hazırladığı
xəbərlər proqramına
baxmışlar. Daha sonra
Studiyada canlı yayımla hazırlanan dəyirmi masanın qonağı olan tədbir iştirakçıları
yaradılan şəraitdən
və mərkəzin fəaliyyətindən razılıqlarını
bildirmişlər. Göstərilən qayğının, yaradılan
şəraitin müqabilində
müəllim və tələbələrimizin üzərinə
bir vəzifə düşür – səy və əzmkarlıqla işləmək, fəaliyyət
göstərmək, yaradıcılıqla
məşğul olmaq.
Dahi öndərin uzaqgörən
və eyni zamanda humanist bir fikri isə qələm sahiblərinin
seçdikləri peşələrinə,
qələmə aldıqları
yazılara məsuliyyəti
ikiqat artırmaqla sözün əsl mənasında Heydər Əliyev jurnalistika məktəbinin məzunu olmaq şərəfini aşılayır: “Lap o qatı
yalan yazan jurnalistlər də jurnalistdir-qoy olsun. Azərbaycanda belə bir ifadə var: “Zaman hər
şeyi saf-çürük
edəcəkdir”. Kim bu imtahandan, rəqabətdən keçəcək,
həqiqətən hörmətli
bir jurnalist olacaqsa, olacaq. Kim bu yolu keçə
bilməyəcəksə,-
yəqin ki, o özünə başqa peşə axtarmalı olacaqdır”.
Dahi öndərin öz sağlığında reallaşdıra
bilmədiyi bir arzusu bu gün
hər birimiz üçün gələcək
fəaliyyətimizin istiqamətini
bildirməklə media mərkəzinin
gələcəkdə media institutuna çevrilə biləcəyi ideyasını
da nəzərdə saxlamağı tövsiyə
edir: “Bəlkə ayrıca bir jurnalistika institutu yaradaq... Xüsusi jurnalistika İnstitutu
yaradaq ki, oraya tələbə qəbul etmək üçün xüsusi
qanunlar, orda jurnalistikaya lazım olan fənlər olsun. Qoy, qəbul testlə
olsun, amma həmin test jurnalistika peşəsinin tələbələri
ilə olsun, qabiliyyət imtahanı keçirilsin. Onda doğurdan
da, jurnalistikaya həqiqətən jurnalist
istedadı olan adamlar gələcəklər.
Təbiidir ki, həmin
institutdan da keyfiyyətli jurnalistlər
çıxacaqdır”.
Mən əminəm
ki, universitet media mərkəzi dahi öndərin arzusunu reallığa çevirəcək
potensial, dövlətinə
və dövlətçiliyinə
sadiq, peşəsini layiqincə mənimsəyən
və əməli tətbiqinə nail olan dünyagörüşlü gənclər
formalaşdıracaqdır. Mən bu
işin davamçılarına
dövlətimizin onlara
diqqət və qayğısını dərindən
dərk etməyi və yaratdığı şəraiti qorumağı
arzulayıram. Əminəm ki, tələbə və müəllim kollektivimiz bundan sonra da öz
fəaliyyətlərində yeniliyi, inkişafı, Azərbaycanın ayrılmaz
parçası olan Naxçıvanı işıqlı
sabahlara aparan gələcəyi yaradacaq
və gələcək
nəsillərə ötürəcəkdir.
Rufik İSMAYILOV
525-ci qəzet.- 2011.- 25 oktyabr.-S.6.