Bolşevik
Rusiyasının Azərbaycan siyasətinə Türkiyənin
münasibəti (1920-1923)
1920-ci il aprelin 28-də bolşevik
Rusiyası Azərbaycanı işğal etdi. Bu işğala
beynəlxalq şərait, Rusiyanın Azərbaycan neftinə və
əlverişli strateji mövqelərə yiyələnmək
niyyətləri, Antanta dövlətlərinin Rusiya və
Türkiyəyə qarşı apardıqları müharibədə
hər iki ölkənin düşdüyü ağır vəziyyətdə
müttəfiqliyinin zərurətə çevrilməsi,
ingilisləri Qafqazdan, Yaxın və Orta Şərqdən
qovmaq niyyətləri, geosiyasi şərait və s. təsir
etdi.
Bolşevik Rusiyasının Azərbaycanı
işğal etməsi ilə 1918-1920-ci illərdə mövcud
olmuş Azərbaycan Xalq Cümhuriyyətinin
varlığına son qoyuldu. Azərbaycan Sovet Sosialist
Respublikası quruldu. Azərbaycan xalqının tarixində
yeni bir dövr başladı.
Bundan sonra bolşevik hökuməti Azərbaycanda
amansız bir siyasət yürütməyə başladı.
Azərbaycan dövlətçiliyi məqsədli şəkildə
məhv edilir, yenicə qurulmuş Azərbaycan sovet hökumətinin
səlahiyyətləri əlində alınır, əhalinin
malı və mülkü müsadirə edilir və ölkənin
təbii sərvətləri mərkəzə
daşınırdı. Aprel işğalından sonra kommunist
adı altında Azərbaycana gələn ermənilər əksinqilabi
ünsürlərlə mübarizə adı altında Azərbaycan
xalqına, xüsusən milli ziyalılara divan tutur, repressiyaya
məruz qoyurdular. Bolşevik Rusiyasının Azərbaycanı
işğal etməsi ilə milli ruhlu şəxslərin
xarici ölkələrə mühacirəti də
başladı. Onlar əsasən Türkiyədə yerləşdilər.
Soruşulur: Bu məsələlər o
zaman müttəfiq olan Rusiya ilə Türkiyə arasında
münasibətlərdə müzakirə olunubmu? Mustafa Kamal
Paşa başda olmaqla yeni Türkiyənin Azərbaycanda
yürüdülən bu siyasətə münasibəti necə
olmuşdur?
Qeyd etmək lazımdır ki, bu məsələlərə
dair arxivlərdə kifayət qədər materiallar vardır.
Azərbaycan və Rusiya arxivlərində uzun illər boyu
sovet dövründə “məxfi” və “tam məxfi”
saxlanılmış sənədlər əsasında məsələlərə
aydınlıq gətirməyə çalışaq.
***
Məlum olduğu kimi, Türkiyə ərazilərinə
sahib olmağa və Rusiyada bolşevizmi beşiyində
boğmağa çalışan Antanta ölkələrinə
qarşı mübarizə Rusiya və Türkiyəni müttəfiqə
çevirmişdi. Bu müttəfiqlik isə bütün Cənubi
Qafqazda geosiyasi vəziyyəti dəyişdirdi. Bolşevik
Rusiyasının işğalına məruz qalan Azərbaycan
sovetləşdirildi. Rusiyanın Azərbaycanda siyasətini izləyən
Türkiyə hökuməti həyata keçirilən
amansız tədbirlərə qarşı qəti mövqeyini
daim nümayiş etdirirdi. Azərbaycan və Rusiya arxiv sənədləri
bir daha sübut edir ki, Türkiyə hətta sovet sistemi şəraitində
Azərbaycanın müstəqil olmasına tərəfdar
olmuş və bu məsələni dəfələrlə
danışıqlarda qaldırmışdır.
Türkiyənin rəsmi adamları aprel
işğalından sonra ermənilərin bolşevik adı
altında Azərbaycana gəlmələrindən və
düşünülmüş şəkildə azərbaycanlıları
qırmalarından narahatlıq keçirirdilər. Məsələn,
Sovet İnformasiya bürosunun Türkiyədəki rəhbəri
Astaxov 1921-ci il yanvarın 8-də RSFSR xalq xarici işlər
komissarı Georgi Çiçerinə göndərdiyi “tam məxfi”
teleqramında yazırdı ki, Trapezunddan (Trabzon) Millət Məclisinin
üzvü məşhur kamalçı Şükrü bəy
onunla söhbətində Azərbaycanda baş verən
çevrilişin səmimi olmadığına
inandığını bildirmişdi. Şükrü bəy
belə hesab edirdi ki, Antanta ölkələrinin əlində
alət olan ermənilər əksinqilaba qarşı
mübarizə adı altında azərbaycanlıları
qırmağa qadirdirlər. Şükrü bəy sovet
nümayəndəsindən bu fikirlərini çap etməyi
xahiş etmiş və bunun türk xalqının əhval-
ruhiyyəsi olduğunu bildirmişdi.
Qeyd etmək lazımdır ki, Azərbaycanda
bolşeviklərin yürütdüyü siyasətə
Türkiyədən edilən etirazlar bəzi ölkələrin
rəsmi dairələri tərəfindən Rusiya ilə
Türkiyə arasında ixtilafların olması kimi qiymətləndirilirdi.
Məsələn, Parisdə nəşr edilən “Tan” qəzeti
1921-ci il yanvarın 20-də bolşevik Rusiyası ilə
Anadolu hökuməti arasında fikir
ayrılıqlarının, şübhələrin, hətta
Azərbaycanın Türkiyəyə birləşməsi istəyinin
olduğunu yazırdı. Bu yazıya cavab olaraq Türkiyənin
“ Hakimiyyet Milliye” qəzeti həmin ilin yanvarın 27-28-də
yazırdı ki, bizimlə bolşeviklər arasında Azərbaycan
üstündə heç bir mübahisə yoxdur. Onda nəyə
görə Avropa Anqora (o zaman Ankara belə
adlanırdı-M.Q.) ilə Azərbaycanı və bolşevikləri
bir-birinə vurmaq üçün çirkin niyyətlərindən
istifadə edir. Qəzet yazırdı ki, bizim
üçün qəti olan budur, istər Azərbaycan olsun,
istər Suriya, istərsə də digər torpaqlar – bu
qardaşlarımız azad yaşasınlar.
Türkiyə bolşevik
Rusiyasının müsəlmanlara qarşı
yürütdüyü siyasətini iki ölkə arasında
münasibətlərdə mühüm amil sayır və bu
barədə sovet xadimlərini daim xəbərdar edirdi. Belə
ki, bolşevik Rusiyasının müsəlman xalqlarına
münasibəti və Azərbaycanda yürütdüyü
siyasət 1921-ci ilin yanvarında Ankaraya səfər edən
Şərq xalqlarının təbliğatı və fəaliyyəti
şurasının səlahiyyətli nümayəndəsi
Eşba ilə görüşdə Türkiyənin xarici
işlər naziri Bəkir Sami bəy tərəfindən
qaldırıldı. Bəkir Sami bəy ona açıq şəkildə
dedi ki, indiyədək Rusiya müsəlmanları nəinki
müstəqillik, hətta heç münasib bir muxtariyyət
də almayıblar. Başqırdıstan, Tatar Respublikası,
Şimali Qafqaz – bütün bunlar uydurma respublikalardır.
Muxtar respublikaların əsas idarəçiliyi mərkəzi
hökumətin əlindədir. Şimali Qafqazı
götürək. Nəyə gərə Dağıstan və
Terek dağlıları ayrılmışlar? Nəyə
görə Ufa Başqırd Respublikasından
alınmışdır?
Söhbətdə Bəkir Sami bəy
daha sonra bolşevik Rusiyasının Azərbaycanda
yürütdüyü siyasətə etiraz edərək qəti
şəkildə dedi: “Azərbaycanı götürək.
Uydurma bir şişman adam Nərimanov vardır. Fövqəladə
Komissiyanın sədri, hətta Qırmızı ordu hissəsinin
yefreytoru ona nəyi deyirsə, onu da edir. Faktiki olaraq Azərbaycanın
bütün siyasətinə Azərbaycanı tanımayan, bilməyən,
onunla heç bir ümumi bir bağlılığı olmayan
Orconikidze ( Serqo Orconikidze Azərbaycan Xalq Cümhuriyyətinin
devrilməsində bilavasitə iştirak etmiş sovet və
Kommunist Partiyası xadimi – M.Q.) rəhbərlik edir. Azərbaycanda
bütün sərvətlər Rusiyaya daşınır. Nəticəsi
budur ki, Azərbaycan fəhlə və kəndliləri
ağır ehtiyac içərisindədirlər. Soruşulur:
bu sərvətlər hara itdi?” Bəkir Sami bəy birmənalı
olaraq Eşbaya dedi: “Bunu ona görə sizə söyləyirəm
ki, müsəlmanlara münasibətdə siyasət Rusiya ilə
Türkiyə arasında böyük amildir. Moskvanın yeni
siyasətinin çar hökuməti zamanındakı kimi
müsəlman xalqlarına qarşı olan ikinci faciə
olduğuna dair hər hansı şübhələri aradan
qaldırmaq lazımdır”. Eşba Bəkir Sami bəyin
Rusiyanın milli siyasətinə dair söylədiklərinə
etiraz etmək istəsə də, Türkiyənin xarici
işlər naziri “açıq danışmaq ümumi
işimizə xidmət edər” dedi.
Bəkir Sami bəy ilə
görüşdən sonra Eşba yanvarın 29-da Mustafa Kamal
Paşanın qəbulunda oldu. Söhbət zamanı Eşba
sovet respublikaları arasında mübahisələrə səbəb
olan sərhədlərin artıq əhəmiyyətini
itirdiyini bildirərək dedi ki, məsələn, kommunist Azərbaycanı
öz ərazisinin bir hissəsini könüllü olaraq
kommunist Ermənistanına vermişdir.
Rusiya ilə münasibətlərin təməllərinin
möhkəm olmasını arzulayan Mustafa Kamal Paşa
bolşevik Rusiyasının müsəlman xalqlarına
münasibətdə yürütdüyü siyasətə
dair məsələ üzərində durdu. O, Rusiyadan gələn
şəxslərin məruzələrindən və digər
mənbələrdən bəzi təfərrüatların
aydın olduğunu təəssüflə bildirərək
“bu, türk xalqında şübhə doğurur, bizim
arzularımızı da çətinləşdirir ” dedi. Əlavə
etdi: məsələn, şayiələr gəzir ki, ruslar
Bakını tutarkən orada həbslər aparıblar və
adamları edam ediblər, Azərbaycanın sərvətləri
Rusiyaya daşınmışdır. Türküstanda da
müsəlmanların qırğınına bənzər bir
şey baş vermişdir. Atatürk bundan başqa Moskvanın
bəzi addımlarının da şübhələr
doğurduğunu bildirdi. Bununla bağlı olaraq Ermənistan
ilə imzalanan 1920-ci il 2 dekabr tarixli Gümrü sülh
müqaviləsinin yerinə yetirilməsinə Rusiyanın mane
olduğunu açıq şəkildə söylədi.
Türkiyənin bu mövqeyi digər
ölkələrin diplomatik dairələrinin də diqqətindən
kənarda qalmırdı. Ukraynanın Qafqazdakı diplomatik
missiyasısının rəhbəri İvan Kraskovski 1921-ci il
yanvarın 20-də mərkəzə yazdığı məxfi
qrifli “Ukrayna. Qafqaz. Müsəlmanlar” adlı əsas tezislərində
qeyd edirdi: “Kamalizm və Türkiyə, Qafqaz və Orta Asiya
müsəlmanları yaxşı bilirlər ki, bolşevizmin
siyasəti Rusiya imperiyasının siyasətidir, onun qələbəsi
onların sakit yaşamasını təhdid edir”.
Türkiyə rəhbərlərinin
bolşevik Rusiyasının Azərbaycanda siyasətinə belə
münasibətinin böyük əhəmiyyətli var idi. Bu,
hər şeydən əvvəl, bolşeviklərin Azərbaycanda
daha qəddar siyasət yürütməsinin
qarşısını alırdı.
Bolşevik hökuməti tərəfindən
Azərbaycanda əhalinin malı və mülkünün
müsadirə edilməsi Türkiyənin etirazlarına səbəb
olurdu. 1921-ci il fevralın 3-də TBMM-in Tiflisdəki nümayəndəsi
Kazım bəy sovet nümayəndəsi Şeynman ilə
görüşərək Azərbaycanda sovet hakimiyyətinin
azərbaycanlı kəndlilərin mülklərini müsadirə
etməsinə Ankara hökumətinin etirazını Moskvaya və
Orconikidzeyə çatdırmağı rəsmi şəkildə
bildirdi. Bunun Türkiyənin qəti mövqeyi olduğunu
söylədi.
Sovet tərəfi isə bu mövqeyə
fərqli yanaşdı. Fevralın 8-də Şeynman Türkiyə
tərəfinin müvafiq müraciətini Azərbaycan SSR Xalq
Komissarları Sovetinin sədri Nəriman Nərimanova və Azərbaycan
SSR xalq xarici işlər komissarı Mirzədavud Hüseynova
göndərdi. O, Türkiyənin bu hərəkətini daxili
işlərə qarışmaq və kamalçıların
Azərbaycan əhalisi arasında nüfuz qazanmaq istəyi və
Azərbaycan hakimiyyətinə qarşı çıxmaq kimi
qiymətləndirdi.
Belə bir şəraitdə Türkiyə
Rusiyanı daha dərindən tanımaq, öyrənmək istəyirdi.
Buna görə də Türkiyədə Rusiyanı təhqiq
edən, öyrənən bir komissiya quruldu. Bu komissiyanın
üzvü İsmayıl Sübhi Soysallı Azərbaycana səfər
edərək çoxlu görüşlər keçirdi, vəziyyəti
öyrəndi və bir məruzə hazırladı. Onun
1921-ci ildə TBMM sədri Mustafa Kamal Paşaya göndərdiyi
məruzəsi bolşeviklərin Azərbaycanda
yürütdüyü siyasəti və Türkiyənin bu
siyasətə münasibətini aydın şəkildə
göstərir. İsmayıl Sübhi Soysallı
yazırdı ki, həqiqətən Azərbaycanda bolşeviklər
hökmranlıq edirlər. Ordunun Azərbaycana daxil olması
ilə üsyanlar başlamışdır. Bolşeviklər
yüzlərlə kəndi yandırmışlar. Bəzi yerlərdə
yalnız türklərin əhalini sakitləşdirməsi
hesabına müqavimət göstərilməmişdir. Azərbaycan
əsgəri üçün İtaliyadan alınan mundirlər
bolşeviklər tərəfindən - Qırmızı ordu tərəfindən
müsadirə edilmişdir. Xalq isə zorakılığa
dözmür, silahı vermir və üsyan üçün məqam
gözləyir. Məruzədə Azərbaycanda hakimiyyətin
təşkili barədə də məlumat verilirdi. Deyilirdi
ki, Bakıda sovet hakimiyyəti yalnız Moskvanın
hökmü ilə hərəkət edir. Xalqın aclıq
çəkdiyi, ordunun isə xalqın malı və
mülkünü müsadirə etməsi nəticəsində
rifah içində olduğu qeyd edilirdi. Ermənilərin
Fövqəladə Komissiyada hökmranlıq etdikləri,
köhnə ədavətə görə azərbaycanlılardan
qisas aldıqları yazılırdı. Bolşeviklər
varlıların evlərini əlində almışdı. Kəndlilər
də hakimiyyətə nifrət edirdilər.
Məruzədə yazılırdı
ki, sözdə müstəqil olan Azərbaycan əslində
Rusiya Kommunist Bolşevik Partiyasına tabedir. Bu respublika sovet
quruluşu tərəfindən dağıdılmış və
qarət edilmişdir. Məruzədə Azərbaycandakı
bütün köhnə qüvvələrin məhv edildiyi
vurğulanırdı. Müəllif yazırdı ki, Azərbaycanda
hakimiyyət əvvəlcə ermənilərin əlinə
keçdi və müsəlmanların qırılması qəddarlıqla
həyata keçirildi. Bu siyasət həqiqi rus kommunistləri
tərəfindən deyil, kommunist adı altında ermənilər
və digərləri tərəfindən edilir. Rus millətçilərinin
hərəkətlərindən hətta yaxşı rus
kommunistləri şikayət edirdilər. Məruzədə
Fövqəladə Komissiyanın tamamilə azərbaycanlılara
qarşı olduğu, sovet hakimiyyətinin qurulduğu 10-11 ay ərzində
8 min nəfərin güllələndiyi, onların 2 min nəfərinin
ziyalı olduğu vurğulanırdı. Hətta Bakıya gələn
Stalin də bütün bunlara görə millətçilərin
qarşısında qızarmışdı. Azərbaycanın
idarəçilik aparatı rus, erməni və gürcülərdən
ibarət idi. Bu aparat müsəlmanların deyildi. Azərbaycan
kommunistləri Azərbaycana gəlməkdə bolşeviklərə
kömək etdikləri üçün peşman
olmuşdular. Şəhər
dağıdılmışdı. Bakının nəhəng
anbarlarının malları tamamilə bolşeviklər tərəfindən
daşınmışdı. 100-150 min türk lirəsi dəyərində
zinət əşyaları və xalça
daşınmışdı. Kəndlilərdən hər
şey, hətta sonuncu at müsadirə edilsə də, kənd
əhalisi şəhər əhalisindən yaxşı
yaşayırdı. Məruzədən məlum olurdu ki, Azərbaycan
cəmi 10 min nəfər kommunist var idi. Onları da heç
kim sevmirdi. İsmayıl Sübhi Soysallı yazırdı ki,
ümumiyyətlə, sovet Rusiyası indi Azərbaycan
üçün tərbiyəçi, öyüd-nəsihət
verən deyil, qarətçidir.
Məruzədə Azərbaycanın gələcəyinə
də münasibət bildirilirdi. Yazılırdı ki, əhali
ümidsizliyə qapılmışdır. Xalq belə bir sual
verirdi: nə zaman türklər gələcək və bizi
xilas edəcəklər. Hətta milli hisslərdən uzaq olan
Azərbaycan ziyalıları da belə bir ağır şəraitdə
milli ideyalar axtarırdılar. Məruzədə deyilirdi ki,
tacirlər və sənətkarlar öz ruhları ilə əsl
müsəlman və türkdürlər. Kəndlilərdə
də milli hisslər oyanır. Yerli burjuaziya iflas etmişdir və
ümidlərini Türkiyəyə bağlayır. İnsanlar
deyirlər: qoy bolşeviklər nefti götürsünlər,
ancaq bizim ölkəmizi versinlər. Məruzədə Nəriman
Nərimanovun millətçi olduğu qeyd edilir və
vurğulanırdı ki, əvvəlcə onlar kommunizmin nə
olduğunu anlamamışdılar, indi isə
peşmançılıq hissi keçirirlər. Moskvaya səfərdən
qayıdan Nərimanov əleyhdarlarına Leninə istinadən
demişdi ki, Şərq mövcuddur, mövcuddur, onun
xüsusi adət-ənənələri də. Kim başqa
cür düşünürsə, qoy buradan çıxıb
getsin və başqa bir yerdə işləsin.
Məruzədə bolşeviklər əleyhinə
hər yerdə üsyana hazırlıq işləri getdiyi
yazılır və tövsiyə edilirdi: “Mən Avropa əleyhinə
olanlar arasında və inqilabı Rusiya ilə mübahisə
yaratmaq istəmirəm. Lakin o, çətin vəziyyətdədir.
Azərbaycan milli dirçəlişə möhtacdır, biz
ona kömək əlimizi uzatmalıyıq”.
Türkiyə hökuməti Azərbaycanın
Rusiyadan asılı vəziyyətə salınmasından
narazılıq edirdi. Bununla bağlı olaraq Rusiyanın Cənubi
Qafqazdakı nümayəndəsi Leqran 1921-ci il iyunun 29-da
Orconikidzeyə və Çiçerinə məktubunda
yazırdı: “Türklər Azərbaycanın Rusiyadan
asılı olmasından narazıdırlar. Onun
yazdığına görə, Türkiyənin Qafqaz siyasətində
birinci element Azərbaycanın müstəqil siyasət
yürütməsini istəməsidir”. Leqran daha sonra Bəkir
Sami bəyin “heç bir Azərbaycan Respublikası yoxdur,
şişman adam Nərimanov vardır. Azərbaycanın
müstəqilliyindən yalnız Nərimanov
qalmışdır, o da cümə günü” fikirlərini
də yazırdı.
Türkiyə hökuməti Cənubi
Qafqaz respublikalarının Zaqafqaziya Federasiyasında birləşdirilməsi
məsələsinə diqqət ayırırdı. 1921-ci
ilin dekabr ayında qəbul edilən bu qərara görə,
Azərbaycan, Ermənistan və Gürcüstan öz
aralarına olan sərhədləri ləğv edərək mərkəzi
Tiflis olmaqla federasiyada birləşirdilər. Bu hadisəyə
diqqət ayıran Türkiyənin “Axşam” qəzeti 2 dekabr
tarixli sayında yazırdı ki, bununla da Azərbaycan, Ermənistan
və Gürcüstan öz müstəqilliklərindən məhrum
olurlar
Türk mətbuatında çap edilən
məqalələrdə yazılırdı ki, Azərbaycan
Rusiyanın təsiri altına düşdükdən sonra
müstəqilliyi boş bir şeydir. Bu gün Qafqazda 600 min nəfər
rus əsgəri vardır. Yalnız onların sayəsində
bolşevizm ayaqda durur. Azərbaycan çox varlı bir ölkədir.
Aydındır ki, Azərbaycan olmadan Rusiya əvvəlki kimi ola
bilməz. Məlumdur ki, çarizm dövründə Azərbaycan
təkcə nefti ilə Rusiya xəzinəsinə ildə 100
milyon qızıl rubl verirdi. Məgər Rusiya belə bir
ölkədən imtina edə bilərmi?
Türkiyə tərəfi Rusiyanın
Azərbaycanda yürütdüyü siyasətə
etirazlarını demək olar ki, bütün rəsmi
görüşlərdə də bildirirdi. Məsələn,
Lozan konfransı zamanı, 1922-ci il dekabrın 23-də
Türkiyə nümayəndə heyətinin rəhbəri
İsmət İnönü RSFSR xalq xarici işlər
komissarı Georgi Çiçerin ilə keçirdiyi
görüşdə Rusiyanı Azərbaycanı
ruslaşdırmaqda ittiham etdi. İsmət İnönü ilə
keçirdiyi növbəti görüşlərin biri
haqqında müavini Litvinova məlumat verən Georgi
Çiçerin yazırdı ki, türklər özlərini
bütün müsəlmanların təmsilçisi hesab edirlər
Türkiyə tərəfi SSRİ
qurulduqdan sonra da müsəlmanların istismarından
narahatlığını bildirirdi. Azərbaycanda və
Qafqazda olan türk təbəələrinin zorakı yolla
çıxarılması üçün sovet hakimiyyətini
ittiham edirdi. Rusiyanın Azərbaycanda yürütdüyü
siyasətə Türkiyənin münasibəti digər bir
formada da özünü göstərdi.1923-cü il aprelin 28-də
Azərbaycanda sovet hakimiyyətinin qurulması münasibətilə
Ankarada Azərbaycan nümayəndəliyinin keçirdiyi rəsmi
qəbula Türkiyə tərəfindən heç bir
nümayəndə gəlmədi. Azərbaycan nümayəndəliyinin
əməkdaşı Zeynalov xalq xarici işlər
komissarı Mirzədavud Hüseynova göndərdiyi teleqramda
yazırdı ki, bu, türklərin bizə münasibətini
qiymətləndirmək üçün göstəricidir
Aprelin 29-da Türkiyənin “Axşam” qəzetində
dərc edilmiş bir məqalədə Azərbaycanda sovet
hakimiyyətinin qurulması bütün Azərbaycan türkləri
üçün matəm günü kimi təqdim edilirdi.
Yazılırdı ki, Türkiyə Azərbaycan
xalqını bolşevik şeytanlarına qarşı
üsyana çağırır. Məqalə belə fikirlərlə
bitirdi: “Mavi, yaşıl və qırmızı Azərbaycan
bayrağı Türkiyənin bayrağı kimi yenidən
dalğalanacaqdır”.
Bu məqaləyə cavab olaraq Azərbaycan
nümayəndəliyi Türkiyə Xarici İşlər
Nazirliyinə etiraz notası göndərərək Azərbaycanı
28 aprel münasibətilə təbrik etmədiyi
üçün Türkiyə tərəfinə
iradını bildirdi. Belə bir məqalənin
çapını dostluq və qardaşlıq haqqında
müqavilənin 10-cu maddəsinin pozulması kimi qiymətləndirdi.
Türkiyə xalqı və hökuməti
istiqlal uğrunda ağır müharibə aparmasına
baxmayaraq, daim Azərbaycandakı vəziyyətlə
maraqlanmış, konkret mövqeyini ortaya qoymuş, bolşevik
Rusiyasını qəddar siyasətdən çəkindirməyə,
Mustafa Kamal Atatürkün dediyi kimi, “bolşeviklərin Azərbaycanda
yürütdükləri siyasətin bütün müsəlman
dünyası üçün bir nümunə olduğunu
ehtiyatla başa salmağa çalışmışdır”.
Rusiya ilə müttəfiq olmasına
baxmayaraq, Türkiyə hökuməti bu ölkənin ərazisində
yaşayan türk və digər müsəlman xalqlarına
qarşı yürüdülən sərt siyasətə
etirazını bildirmişdir. Yaranmış mövcud vəziyyətdə
Rusiya bir çox hallarda bu etirazlarını dinləsə,
beynəlxalq şəraitin təsiri altında bəzən sərt
siyasət yürütməsini azaltsa da, sonrakı illərdə
Türkiyə Qərb ölkələri ilə
yaxınlaşdıqda sovet hökuməti də ölkə vətəndaşları
olan türk və müsəlman xalqlara qarşı qəddar
siyasəti həyata keçirdi. Azərbaycanda 20-ci illərin
sonları və 30-cu illərdə on minlərlə azərbaycanlı
türkçü, turançı, millətçi və
Türkiyə agenti adı altında repressiya edildi, həbsxanalara
atıldı, sürgün edildi və
öldürüldü. Sovet rəhbəri Stalinin hakimiyyəti
illərində mərkəzi hökumət SSRİ-nin türk
və müsəlman xalqlarına etibar etməyərək
onların nümayəndələrini ölkə rəhbərliyindən
daim uzaq tutmağa çalışdı. Hətta SSRİ-nin
Türkiyə ilə sərhədindəki türk və
müsəlman əhalinin yaşadığı kəndlər
köçürüldü.
Musa
QASIMLI
525-ci
qəzet.- 2011.- 3 sentyabr.- S.14-15.