Əli Əmirlinin “İki aktrisa üçün baş rol”u

Yazıçı-dramaturq Əli Əmirlinin aprel ayında anonsunu verdiyi və yay aylarında yazacağını söylədiyi “İki aktrisa üçün baş rol” pyesi artıq hazırdır. Bu barədə dramaturqun qəzetimizə verdiyi məlumatda deyilir. Müəllifin teatral komediya kimi təqdim etdiyi, amma daha çox gərgin dramatizmi ilə seçilən bu əsər, adından göründüyü kimi, teatr həyatı ilə bağlıdır. Cəmi dörd personajın iştirak etdiyi səhnə əsərində teatr adlı sehrli bir sənətin əsas yaradıcıları – aktyor (indiki halda iki aktrisa), dramaturq və rejissor arasında baş verən mürəkkəb psixoloji münasibətlər əksini tapır. Bu dörd nəfəri çox şey birləşdirir, amma ən vacibi və daimi olanı məhz sənət, teatr yanğısı və böyük səhnəyə məhəbbətdir.

Dramaturq teatr haqqında teatr yaratmaq istəyi haqqında danışıb: “İyirmi ildən çoxdur mənim ədəbi yaradıcılığım birbaşa teatrla bağlıdır. Bu böyük vaxt ərzində bir çox teatr kollektivləri ilə işbirliyim olub. Teatr həyatını, aktyorluğu, səhnəni özünə peşə və həyat tərzi kimi seçən insanları, konkret desəm, aktyorları öyrənmək, müşahidə etmək imkanım çox olub. Təəssüratlarım birmənalı deyil. Bu insanlar, Stanislavskinin ifadəsi ilə desək “uşaqdırlar”, amma xeyli mürəkkəb, xeyli gözlənilməz, xeyli sevimli, bəzən qəddar, bəzən fədakar, bəzən ərköyün, hərdən çox sədaqətli, hərdən də çox unutqan və vəfasız. Əlbəttə, saydığım bu keyfiyyətlər, peşəsindən, sənətindən və mövqeyindən asılı olmayaraq, bütün insanlarda var, amma bir fərqlə, aktyor neynirsə eləsin onu teatrallaşdırır, bəzəyir, kiçik bir tamaşa kimi təqdim edir. Bir sözlə, hesab edirəm ki, teatr adlı sehrli məkanın, sənət məbədinin əsas aparıcı qüvvəsi və tamaşaçı sevgisinin əsas obyekti ilk növbədə məhz aktyordur. Təbiidir ki, bu əsrarəngiz və spesifik dünyaya bələd olub, onu qələmə almamaq çətindir. Onu da deyim ki, bu pyesi mən Azərbaycan teatrının var olmasında, inkişafında xidməti olmuş bütün aktyorların, xüsusilə adları çoxdan əfsanəyə, rəvayətə çevrilmiş korifey sənətkarlarımızın xatirəsinə həsr etmişəm”.

HÜSNİYYƏ

525-ci qəzet.- 2011.- 17 sentyabr.- S.32.