Behbud ağa Şahtaxtinski AMEA Naxçıvan Bölməsində
yad edilib
AMEA Naxçıvan Bölməsində Naxçıvan Dövlət Universiteti ilə birgə “Nəsillərə nümunə: görkəmli dövlət xadimi və diplomat Behbud ağa Şahtaxtinski” başlıqlı elmi konfrans təşkil edilib.
Elmi konfransı AMEA Naxçıvan Bölməsinin sədri, akademik İsmayıl Hacıyev açaraq Naxçıvan Muxtar Respublikası Ali Məclisi Sədrinin “Görkəmli dövlət xadimi və diplomat Behbud ağa Şahtaxtinskinin 130 illik yubileyinin keçirilməsi haqqında” 2011-ci il 21 fevral tarixli Sərəncamın mühüm əhəmiyyətindən danışıb. Akademik tariximizdə, taleyimizdə, elm, təhsil, mədəniyyət, diplomatiya və dövlət quruculuğu sahələrinin inkişafında mühüm rol oynayan Şahtaxtinskilərdən bəhs edərək qeyd etmişdir ki, Şahtaxtinskilərin fəaliyyətləri ilə bağlı son illərdə imzalanan tarixi sərəncamlar dövlətimizin onlara göstərdiyi qayğının ən yaxşı ifadəsidir.
Tədbirdə mürəkkəb, çətin, ziddiyyətli bir dövrdə yaşayan, cəmi 43 il ömür sürən maarifçi, publisistik, siyasi xadim, diplomat Behbud ağa Şahtaxtinskinin həyat yolu, siyasi və diplomatik fəaliyyətindən ətraflı danışan akademik Azərbaycanın ayrılmaz hissəsi olan Naxçıvana muxtariyyət statusunun verilməsində bu görkəmli şəxsiyyətin çox böyük xidmətləri olduğunu xüsusi vurğulayıb. O, bildirib ki, Behbud ağa Şahtaxtinski Bakı Soveti İcraiyyə Komitəsinin, “Hümmət” təşkilatı Mərkəzi Komitəsinin sədri, Bakı Xalq Komissarları Soveti fövqəladə komissiyasının üzvü, habelə Azərbaycanda sovet hakimiyyəti qurulandan sonra xalq ədliyyə komissarı, eyni zamanda Azərbaycan SSR-in RSFSR-də fövqəladə nümayəndəsi və başqa vəzifələrdə çalışıb. Akademik çıxışında onu da qeyd edib ki, görkəmli dövlət xadimi və diplomat Behbud ağa Şahtaxtinski hansı sahədə fəaliyyət göstərməyinə baxmayaraq həmişə Vətənə xidmət edib və onun həyatı bu günkü nəsillərə bir nümunədir.
Konfransda Naxçıvan Dövlət Universitetinin rektoru, akademik İsa Həbibbəylinin “Behbud ağa Şahtaxtinskinin V.İ.Leninə məktubları”, AMEA Naxçıvan Bölməsinin Tarix, Etnoqrafiya və Arxeologiya İnstitutunun direktoru, professor Hacıfəxrəddin Səfərlinin “Behbud ağa Şahtaxtinski görkəmli siyasi və dövlət xadimi kimi”, İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyevin “Behbud ağa Şahtaxtinskinin jurnalistlik fəaliyyəti”, NDU-nun elmi katibi, dosent Elçin Zamanovun “Behbud ağa Şahtaxtinskinin diplomatik fəaliyyəti”, Tarix, Etnoqrafiya və Arxeologiya İnstitutunun şöbə müdiri, t.ü.f.d. Emin Şıxəliyevin “Behbud ağa Şahtaxtinskinin həyat və faciəli taleyi”, Tarix, Etnoqrafiya və Arxeologiya İnstitutunun elmi işçisi Musa Quliyevin “Behbud ağa Şahtaxtinski haqqında yeni faktlar” mövzusunda məruzələri dinlənilib.
525-ci qəzet.-
2011.- 29 sentyabr.- S.7.