II Bakı Beynəlxalq Kitab Sərgi-Yarmarkası açıldı

Ötən gün Əl Oyunları İdman Sarayında II Bakı Beynəlxalq Kitab Sərgi-Yarmarkasının təntənəli açılış mərasimi gerçəkləşib. Mədəniyyət və Turizm Nazirliyinin təşkilatçılığı ilə keçirilən, Azərbaycan Respublikasının dövlət müstəqilliyinin bərpasının 20-ci ildönümünə həsr olunan sərgini giriş sözü ilə baş nazirin müavini, xalq yazıçısı Elçin Əfəndiyev açıb. Hər kəsi bu möhtəşəm kitab bayramı münasibətilə təbrik edən E. Əfəndiyev sərgi-yarmarkanın Azərbaycanda kitab işinin təbliğindəki əhəmiyyətini diqqətə çatdırıb: “Yarmarkada sərgilənən kitablar Azərbaycan xalqının tarixi, mədəniyyəti, ədəbiyyatı və bugünkü durumu ilə tanış olmaq baxımından mühüm əhəmiyyətə malikdir. Sərgi həmçinin, naşirlərimizə əcnəbi həmkarlarının bu sahədəki təcrübələri ilə yaxından tanış olmaq imkanı verərək, bundan sonra birgə layihələrin həyata keçirilməsinə şərait yaradacaq”.

Mədəniyyət və turizm naziri Əbülfəs Qarayev açılış mərasimində çıxış edərək kitab sərgi-yarmarkasına qatılan müəssisə və qurumlar haqqında məlumat verib: “25 ölkəni əhatə edən tədbirdə 121 Azərbaycan, 35 xarici çap və poliqrafiya müəssisəsi, çap işi ilə məşğul olan qurumların təmsilçiləri iştirak edirlər. Bu tipli yarmarkalar Bakıda iki ildən bir keçirilməklə, ölkədə poliqrafiya işinin təkmilləşdirilməsinə və kitabsevərlərin sayının artmasına yardımçı olacaq. Ölkənin bir neçə regionunda da kitab sərgi-yarmarkalarının keçirilməsi də nəzərdə tutulur. 3 gün davam edəcək bu sərgi-yarmarka çərçivəsində kitab təqdimatları, tanınmış yazarlarla görüşlər, ədəbi-bədii gecələr, simpoziumlar və müzakirələr həyata keçiriləcək”.

Ə. Qarayev onu da deyib ki, Azərbaycan bir il ərzində 20 beynəlxalq kitab sərgi-yarmarkasında təmsil olunub. Kitablarımız birinci, ikinci, üçüncü mükafatla yanaşı, “Qran-pri”yə də layiq görülüb.

Sərgi-yarmarkada son üç ildə ölkə nəşriyyatlarında, eləcə də ABŞ, Rusiya, İran, Türkiyə, Macarıstan, Makedoniya, Slovakiya, Belarus, Latviya, Moldova, Özbəkistan, Qırğızıstan, Tacikistan və digər xarici ölkələrdə çıxan kitablar, nəşr məhsulları nümayiş etdirilir.

Rəsmi açılış mərasiminin ardınca, saat 12-dən başlayaraq sərginin proqramına daxil edilən tədbirlərə start verilib. Sərgi çərçivəsində prezident İlham Əliyevin sərəncamı ilə təmir edilən mədəniyyət ocaqlarına aid “Heydər Əliyev Sarayı”, “Azərbaycan Dövlət Gənc Tamaşaçılar Teatrı”, “Azərbaycan Dövlət Kukla Teatrı”, “Azərbaycan Dövlət Film Fondu”, “Azərbaycan Dövlət Rus Dram Teatrı” kitablarının təqdimat mərasimi keçirilib. “Yeniləşən mədəniyyət, yeniləşən məkan” adlı layihəsi çərçivəsi əsasında nəşr olunan kitabların təqdimat mərasimində Mədəniyyət və Turizm Nazirliyinin Nəşriyyat və Reklamın Təşkili və İnformasiya şöbəsinin müdiri Vaqif Bəhmənli giriş sözü ilə çıxış edib: “Maraqlı dizaynı, nəfis tərtibatı, bədii tərtibatı baxımından, yeniləşən müasir mədəniyyəti əks etdirən bu nəşrlər “Təhsil” nəşriyyatının məhsullarıdır. Təmir olunan mədəniyyət ocaqlarının tarixi, teatr salnaməmizdəki əhəmiyyətli mövqeyini nəşr olunan bu kitablar vasitəsilə aydın görmək mümkündür”.

Nazir Əbülfəs Qarayev çıxışında incəsənətin müxtəlif nümayəndələrinin iştirakı ilə həyata keçirilən sərgi-yarmarkada təqdimatı baş tutan kitabların teatr tariximizdəki yerindən danışıb. Nazirin sözlərinə görə, bu kitablar gənclərin gələcəyinə nikbin baxmağa əsas verir: “XXI əsrdə müasir Azərbaycanın görüntüsü nəşr olunan kitablarda ətraflı verilib. Kitablarda güclü maddi-texniki bazaya məxsus Azərbaycan peşəkar teatrının tarixi dolğun faktlarla göstərilib”.

Sənətşünaslıq doktoru, professor Məryəm Əlizadə kitab bayramının təkcə yazıçı, şairlər üçün deyil, mədəniyyət və teatr nümayəndələri üçün əhəmiyyətli olduğunu deyib. Qeyd edib ki, uşaqların mənəvi-estetik tərbiyəsində əvəzsiz xidmətləri olan Kukla Teatrı, dünya ədəbiyyatı ilə teatrlarımızı yaxından tanış edən Rus Dram Teatrı, Azərbaycanın panoramını nümayiş etdirən Heydər Əliyev Sarayı, dünya standartlarına uyğun aparatlarla təchiz edilmiş Film Fondu, teatrların birləşməsi nəticəsində daha maraqlı repertuar siyasəti, müasir səhnə texnikası ilə təsdiqini tapmış Gənc Tamaşaçılar Teatrı nəşr olunan kitablarda öz əksini tapıb.

Nəşrlərin müəllifi sənətşünaslıq doktoru, professor İlham Rəhimli və “Təhsil” nəşriyyatının direktoru Bəhruz Axundov çıxışlarında bu kitabların qədim köklərə malik Azərbaycan teatrının günümüzün reallığını əks etdirdiyini, mədəniyyət ocaqlarının mənəvi varlığına çıraq tutmaq vəzifəsini yerinə yetirdiyini diqqətə çatdırıblar.

Qeyd edək ki, sərgi-yarmarka çərçivəsində 150 cildlik “Dünya ədəbiyyatı” seriyasından nəşri başa çatmış kitabların, Timuçin Əfəndiyevin “Mədəniyyətdə tarixilik və müasirlik” kitabının təqdimat mərasimləri, “Azərbaycanın dövlət müstəqilliyi və kitab sənətinin inkişafı” mövzusunda simpozium, “20 ilin ədəbi mənzərəsi” – Azərbaycanın dövlət müstəqilliyinin 20 illiyinə həsr olunmuş dəyirmi masa, Taras Şevçenko və Abdulla Tukaya həsr olunmuş ədəbi-bədii gecə, “Qızıl Kəlmə” Ədəbi Mükafatı laureatları və Gənc Ədiblər Məktəbinin üzvləri ilə görüşlər keçiriləcək. Bundan əlavə, müxtəlif nəşriyyatların təşkilatçılığı ilə kitab təqdimatları və müəllif görüşləri nəzərdə tutulub.

Sərgi üç gün davam edəcək və sentyabrın 30-da başa çatacaq. Həmin gün Təşkilat Komitəsi tərəfindən ən yaxşı nəşriyyat və ən yaxşı kitab mükafatlandırılacaq.

Hüsniyyə İSMƏTQIZI

525-ci qəzet.- 2011.- 29 sentyabr.- S.6.