BSU-nun 150 cildlik “Dünya ədəbiyyatı” seriyası üzrə hazırladığı yeni nəşrlərin təqdimatı olub

TƏQDİMAT MƏRASİMİ İKİNCİ BAKI BEYNƏLXALQ KİTAB SƏRGİ-YARMARKASI ÇƏRÇİVƏSİNDƏ GERÇƏKLƏŞİB

Əl Oyunları İdman Sarayında Mədəniyyət və Turizm Nazirliyinin təşkilatçılığı ilə Azərbaycan Respublikasının dövlət müstəqilliyinin bərpasının iyirminci ildönümünə həsr olunan İkinci Beynəlxalq Kitab Sərgi-Yarmarkası işini davam etdirir. Ötən gün prezident İlham Əliyevin müvafiq sərəncamına əsasən nəşri nəzərdə tutulan 150 cildlik “Dünya ədəbiyyatı” seriyası üzrə hazırlanmış bir sıra kitabın təqdimat mərasimi gerçəkləşib. Bakı Slavyan Universitetinin prorektoru Asif Hacıyev giriş sözü ilə çıxış edərək ölkə başçısının sərəncamına əsasən işıq üzü görən dünya ədəbiyyatı incilərinin tədris prosesi ilə yanaşı, ümumilikdə bütün yaş dövrlərini əhatə edən insanların dünyagörüşünün inkişafındakı müstəsna rolunu diqqətə çatdırıb: “Kitabların nəşr olunmasında Bakı Slavyan Universitetinin xidmətləri danılmazdır. Bu təhsil müəssisəsi əsərlərin tərcüməsi, tərtibatı, korrekturasını həyata keçirib. Filologiya elmləri doktoru, professor, Bakı Slavyan Universitetinin rektoru Kamal Abdullanın rəhbəri olduğu redaksiya heyətinə təkcə BSU-nun əməkdaşları, nümayəndələri deyil, tərcüməçilik, korrektura və bu kimi sahələrlə məşğul olan qələm sahibləri, şairlər, yazarlar da cəlb edilib. Artıq bu seriyadan 52 kitab ictimaiyyətə təqdim olunub. 80-ə yaxın kitab isə tərcümə, tərtibat və ya korrektura mərhələsindədir. Kitablar “Şərq Qərb” nəşriyyat evinin məhsullarıdır”.

“Şərq-Qərb”in nümayəndəsi Əlişirin Şükürlü, yazıçı-dramaturq və tərcüməçi Kamran Nəzirli, Kitab Klubunun rəhbəri Elxan Rzayev ictimai-mədəni həyatımızda xüsusi yerə malik İkinci Beynəlxalq Kitab Sərgi-Yarmarkasının ölkəmiz üçün böyük nailiyyət olduğunu, İnternetdən istifadənin kütləviləşməsi dövründə kitaba qarşı laqeydliyin qarşısının alınmasının vacibliyini və bu işdə belə tədbirlərin rolunu vurğulayıblar. “Sərgilənən kitablara, stendlərə hər yaş dövründə olan insanların yaxınlaşmaları, nəşrlərlə maraqlanmaları kitaba olan marağın artmasının göstəricisidir”.

Qeyd edək ki, seriya üzrə təqdim olunan nəşrlər arasında dünya ədəbiyyatının görkəmli nümayəndələrindən Luis Sinkler, Viktor Hüqo, Stiven Kinq, Con Qolsuorsi, Aleksandr Puşkin, Corc Oruell və digər böyük ədiblərin əsərləri var.

Hüsniyyə İSMƏTQIZI

525-ci qəzet.- 2011.- 30 sentyabr.- S.4.