Azərbaycanda ilk muzey elektron kataloqu və elektron kitabxana Tovuzda yaradılır

Tovuz rayon icra hakimiyyətinin təşəbbüsü ilə rayondakı Heydər Əliyev Muzeyinin kitabxanasında respublikada ilk muzey elektron kataloqu hazırlanır və elektron kitabxana təşkil edilir. Mədəniyyət və Turizm Nazirliyindən verilən məlumata görə, hazırda elektron bazada 4 məlumat bazası formalaşıb. Bu sırada muzey kitabları, rayon Mərkəzləşdirilmiş Kitabxana Sisteminin kitabları və 2 elektron kartoteka bazası da var. Sistem avtomatlaşdırılmış rejimdə tapılan sənədləri müəllif, sərlövhə, nəşr ili və sənəd növünə görə qruplaşdırır. Elektron kataloqun Tovuz rayon Mərkəzləşdirilmiş Kitabxana Sisteminin bazasında isə dövlət başçısının “Azərbaycan dilində latın qrafikası ilə kütləvi nəşrlərin həyata keçirilməsi haqqında” sərəncamı ilə nəşr edilmiş və kitabxanalara hədiyyə edilmiş kitablar yerləşdirilir. Bu elektron bazada kitabları 3-5 açar sözə görə axtarış imkanı yaradılıb. “Elektron kartoteka – 2010” bazasında isə Azərbaycan prezidenti tərəfindən 2010-cu ildə imzalanmış bütün sərəncamlar öz əksini tapıb. Bununla yanaşı, Tovuz rayonundakı Heydər Əliyev Muzeyinin kitabxanasında elektron kitabxana da yaradılıb”.

HÜSNİYYƏ

525-ci qəzet.- 2011.- 26 yanvar.- S.7.