“Diasporumuzun güclü olması üçün birgə fəaliyyət göstərməliyik”

AYXAN DƏMİRÇİ: “HAMIMIZ HƏMRƏY OLUB AZƏRBAYCAN ÜÇÜN ÇALIŞMALIYIQ”

Azərbaycan Belçika Dostluq Cəmiyyəti (ABDC) Avropada fəaliyyət göstərən aktiv diaspor qurumlarımızdan biridir. Bu təşkilat həm də çoxşaxəli fəaliyyəti ilə diqqəti çəkir. ABCD-nin sədri Ayxan Dəmirçinin sözlərinə görə, Avropadakı Azərbaycan diaspor təşkilatları ümumilikdə aktiv olsalar da, onlar ayrılıqda çalışdıqları üçün fəaliyyətləri o qədər də nəzərə çarpmır:

–Bu səbəbdən də diaspor işində birgə fəaliyyət əsasdır. Artıq biz bu birliyi yaratmaq üçün bir sıra maraqlı layihələr icra edirik. Məsələn, İzmir Mədəniyyət Mərkəzi (İMM) ilə birgə layihə kimi Türkiyədə yaşayan azərbaycanlıların birinci qurultayını keçirəcəyik. Onu da qeyd edim ki, biz birdən –birə bu qurultayı keçirməyi qərara almadıq. Türkiyə, Azərbaycan üçün birliyin və həmrəyliyin əsas olduğunun vacibliyini düşünərək bu birlik qurultayını həyata keçirməyə qərar vermişik. Sevindirici hal odur ki, bu gün ətrafımızda dəyərli dost və qardaşlarımız var, onların dəstəyi ilə bu qurultayı keçirməyi qərara aldıq. Diasporumuzun güclənməsi üçün ilk görəcəyimiz iş aradakı bütün ayrılıqları, bölünmələri aradan qaldıraraq birliyimizi hər zaman qoruyub saxlamaqdır. Hamımız həmrəy olaraq Azərbaycan üçün çalışmalıyıq. Dövlət qurumları, diaspor təşkilatları olaraq daha aktiv çalışmalı, daima qarşılıqlı dialoq qurulmalı və güclü azərbaycanlı diasporu yaradılmalıdır. Bir məsələni də xüsusi olaraq vurğulayım ki, diaspor təşkilatlarının Azərbaycanın təbliği istiqamətində həyata keçirəcəyi beynəlxalq layihələri dövlət adamları və iş adamları dəstəkləməlidir.

–Belçikada Azərbaycan diasporunun mövqeyini necə qiymətləndirmək olar?

– Səmimi olaraq qeyd edim ki, Belçikada çox da güclü təşkilatımız yoxdur. Güclü olmaq üçün maddi və mənəvi baxımdan geniş imkanlara sahib olmaq lazımdır. Bu cür imkanlar da bizlərdə çox olmadığına görə güclü sayılmırıq. Bu cür dəstəyin olmaması da bizim fəaliyyətimizi məhdudlaşdırır, gücümüzü azaldır və həyata keçirəcəyimiz layihələrin icra olunmasına mane olur. Ancaq öz imkanlarımız daxilində nələrsə etməyə çalışırıq.

–Belçikada azərbaycanlılarla bağlı hər hansı bir mətbu orqan varmı?

– Belçikada yaşayan azərbaycanlıların sayı o qədər də çox deyil , həmçinin toplu olaraq eyni bölgələrdə yaşamırlar. Bu səbəbdən də qəzet, telekanal və radiomuz yoxdur. Ancaq Belçikada nəşr edilən türk qəzetləri və həmin mətbu orqanlarda çalışan türk jurnalistləri tərəfindən Azərbaycanla bağlı məqalələr nəşr edilir və yayımlanır. Bu sırada “Yeni habər”, “Gündem”, “Belçika habər” və başqa bir sıra qəzet və jurnalların adını çəkmək olar. Bundan başqa Almaniyada yayımlanan Avropa türk kanalına mütəmadi olaraq dəvət olunuruq və Azərbaycanla bağlı müvafiq məlumatları veriririk. Onu da xüsusi olaraq vurğulayım ki, keçən il sözügedən kanalda Xocalı soyqırımı ilə bağlı məlumatlar verdik.

–Bəs, qurumun internet saytı varmı?

–Hazırda internet saytımız üzərində işlər davam etdirilir. Bilirsiniz bu gün saytlarda fransız dilində Azərbaycanla bağlı məlumatlar var. Ancaq flaman dilində isə demək olar ki, Azərbaycanla bağlı məlumat yoxdur. Bunun üçün də istifadəyə verəcəyimiz saytda flaman dilində gündəlik məsələlərlə yanaşı, Azərbaycanın tarixi, mədəniyyəti, iqtisadiyyatı ilə də bağlı yazılar yerləşdirəcəyik. Bu məlumatların bu qeyd etdiyim dilə tərcümə olunmasına müəyyən müddət vaxt ayırmalıyıq. Ancaq bu il saytımızı istifadəyə verəcəyik.

– Belçikada təhsil alan azərbaycanlı tələbələrin diaspor işində fəallığı necədir və təşkilatınızın gənc üzvü varmı?

– Qeyd etdiyim kimi Belçikada çoxlu sayda azərbaycanlı yaşamadığı üçün gənclərimiz çox deyil. Yəni bu gün Belçikada təhsil alan bir neçə azərbaycanlı gənc var. Keçirdiyimiz tədbirlərimizə gənclərimizi dəvət edirik və onların bu sahədə fəal olmasına çalışırıq.

–Bu ölkədə Azərbaycan tarixinin və mədəniyyətinin təbliği istiqamətində hansı işləri görürsünüz?

– İlk əvvəl onu xatırladım ki, 20 Yanvar faciəsi –hadisələri başlayanda Belçikada yaşayan azərbaycanlılar və türklər böyük mitinqlər edərək rusların törətmiş olduğu qırğına etiraz edərək, hər zaman Azərbaycanın yanında olduğumuzu bəyan etmişdik. Təbii ki, bizdə hər il Azərbaycanın Brüsseldəki səfirliyi ilə birlikdə 20 Yanvar faciəsinin anım mərasimini keçiririk. Bundan başqa Xocalı soyqırımı və 31 Mart soyqırımı ilə bağlı Belçikada müxtəlif adda tədbirlər keçiririk. Reallaşdırdığımız mitinq və konfranslarda belçikalılara və Belçikada yaşayan xalqlara broşür və bu faciələrlə bağlı olaraq müxtəlif məlumatların yer aldığı kitabçalar paylayırıq. Ən son olaraq 2010-cu ildə “Xocalıya ədalət” kampaniyası çərçivəsində digər diaspor təşkilatlarımızla birlikdə Brüsselin məşhur prospektlərində yürüşlər təşkil etmişdik. Eyni zamanda Avropa təşkilatlarının rəhbərlərinə və avropalı və belçikalı millət vəkillərinə etiraz məktubları göndərmişdik. Bundan başqa Avropada ayrıca yayımlanan Avropa televiziyasında cəmiyyət rəhbəri olaraq Qarabağ işğalı ilə bağlı proqramların yayımlanmasına nail olmuşuq. Təntənəli şəkildə Novruz bayramını qeyd etmişik. Azərbaycan poeziyasını Belçikada tanıtmaq məqsədiylə, səfirliyimizin dəstəyi ilə poeziya axşamı keçirdik. Ümumiyyətlə, qeyd edim ki, Azərbaycan mədəniyyətinin Belçikada tanıdılması ilə əlaqədar bir sıra tədbirlər həyata keçiririk. Bu tədbirlərimizdə hər zaman Azərbaycanın milli mətbəxinin nümunələrini təqdim edirik, eyni zamanda iştirakçılara Azərbaycan mədəniyyəti haqqında broşürlər veririk.

P.SULTANOVA

525-ci qəzet.- 2011.- 29 yanvar.- S.7.