"Qarabağdan Anadoluya könül körpüsü" bölgələrimizdə

Millət vəkili Qənirə Paşayevanın təşəbbüsü ilə “Qarabağdan Anadoluya könül körpüsü” adlı proqram çərçivəsində Tərtər, Bərdə, Şamaxıda silsilə tədbirlər keçirib. Lent.az-ın məlumatına görə, əvvəlcə Tərtərdə, ön cəbhədə qulluq edən əsgərlər üçün tədbir və konsert proqramı təşkil olunub. Qənirə Paşayevanın rəhbərlik etdiyi “Avrasiya Beynəlxalq Araşdırmalar İnstitutu” İctimai Birliyinin və Umud Rəhimoğlunun rəhbərlik etdiyi Beynəlxalq Avrasiya Mətbuat Fondunun təşkilatçılığı ilə baş tutan tədbirdə çıxış edən Qənirə Paşayeva əsgərləri mübariz və vətənpərvər olmağa səsləyib. Daha sonra əsgərlərimiz üçün əməkdar artisti Tünzalə Ağayeva və Türkiyənin tanınmış sənətçisi Nursaç Doğanişıq mahnılar səsləndirib, əsgərlərlə birlikdə rəqs ediblər. Sonda xidmətində fərqlənən əsgərlərə hədiyyələr təqdim edilib.

Eyni adlı tədbir Bərdədə davam etdirilib. Məcburi köçkünlərin sıx məskunlaşdığı Bərdənin mərkəzi parkında keçirilən proqrama Bərdə, Ağdam və Kəlbəcərdən qaçqın və köçkün düşmüş insanlar, onların ailələri qatılıb. Tədbirdə çıxış edən Qənirə Paşayeva Bərdədə 50 mindən artıq məcburi köçkünün yaşadığını qeyd edərək, onların öz yurdlarına qayıdacağı günün uzaqda olmadığını deyib. Konsertdə Təbriz-Qarabağ aşıqları, Türkiyəli sənətçisi Nursaç Doğaniık, əməkdar artist Tünzalə Ağayeva ifalar səsləndiriblər.

Daha sonra qonaqlar Şamaxıya yollanaraq, burada “Tarixin yaddaşı: Şamaxı” sənədli filminin təqdimat mərasiminə qatılıblar. Rayondakı Mədəniyyət Mərkəzində “Avrasiya Beynəlxalq Araşdırmalar İnstitutu” İctimai Birliyinin və Azərbaycan Vətəndaş Cəmiyyətinin İnkişafına Yardım Assosiasiyasının təşkilatçılığı ilə 1918-ci il 18 mart tarixdə ermənilər tərəfindən dinc azərbaycanlılara qarşı Şamaxıda törədilən soyqırıma həsr olunan “Tarixin yaddaşı: Şamaxı” sənədli filminin təqdimat mərasimi keçirilib. İdeya müəllifi Qənirə Paşayevaya, baş məsləhətçisi isə millət vəkili Elxan Süleymanova məxsus olan filmin təqdimat mərasimində millət vəkilləri Fazil Mustafa, Qüdrət Həsənquliyev, ziyalılar və elm adamları iştirak edib.

Daha sonra millət vəkilləri Qüdrət Həsənquliyev, Fazil Mustafa, Avropa Qəzetçilər Birliyinin rəhbəri Adnan Fişəng və digər qonaqlar çıxış edərək ermənilər törətdiyi soyqırım haqqında öz fikirlərini səsləndiriblər. Tədbirdən sonra qonaqlar və Türkiyədən gələn nümayəndə heyyəti Şamaxı şəhərində yerləşən “Şaxəndan” qəbristanlığını və türk şəhidinin abidəsini ziyarət edib.

525-ci qəzet.-2012.-1 avqust.-S.2.