Azərbaycan Milli Mətbuatının 137-ci ildönümü qeyd edildi

İyulun 22-də Milli Mətbuat Günü münasibəti ilə Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) icraçı direktoru Vüqar Səfərli, Azərbaycan Mətbuat Şurasının sədri Əflatun Amaşov və bir qrup media təmsilçisi Fəxri Xiyabana gələrək öncə müstəqil mətbuatımızın inkişafında müstəsna xidmətləri olan ümummilli liderimiz Heydər Əliyevin məzarını ziyarət edib, önünə çələng qoyublar.

Sonra qəzet redaktorları, media rəhbərləri və jurnalistlər Fəxri Xiyabanda Həsən bəy Zərdabinin qəbrini ziyarət edib, böyük mütəfəkkirin ruhunu ehtiramla yad ediblər. Həsən bəy Zərdabinin məzarı başında çıxış edən Fondun icraçı direktoru Vüqar Səfərli və Mətbuat Şurasının sədri Əflatun Amaşov “Əkinçi” qəzetinin yaradıcısı və baş mühərriri Azərbaycan xalqının tanınmış simalarından olan böyük maarifpərvər, ziyalı Həsən bəy Zərdabinin həyat və fəaliyyətindən danışıblar. Onlar bildiriblər ki, “Əkinçi” qəzetinin ömrü çox uzun çəkməsə də o, Azərbaycan Milli Mətbuatının, Azərbaycan xalqının tarixində, onun maariflənməsində böyük rol oynayıb. Vüqar Səfərli bildirib ki, Azərbaycan mətbuatının keçdiyi 137 illik yol keşməkeşli, əziyyətli, lakin şərəfli olub: “Azərbaycan ikinci dəfə müstəqillik əldə etdikdə ölkədə mətbuat azadlığının təmin olunması istiqamətində bir sıra addımlar atılıb. 1998-ci ildə Azərbaycan Prezidenti Heydər Əliyevin sərəncamı ilə ölkədə senzura tam ləğv olundu. Yəni, “Kütləvi informasiya vasitələri haqqında” qanun qəbul edilib, Mətbuat Şurası formalaşdırılıb, Prezident yanında Kütləvi İnformasiya Vasitələrinin İnkişafına Dövlət Dəstəyi Fondu yaradılıb. Hazırda ölkədə 500-dən artıq mətbuat orqanı fəaliyyət göstərir ki, onların da 40-a yaxını gündəlik nəşrlərdir”.

Bundan sonra tədbir geniş heyətlə “1001 gecə” istirahət mərkəzində davam etdirilib. Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) və Azərbaycan Mətbuat Şurasının birgə təşkilatçılığı ilə keçirilən tədbirdə çıxış edən Prezident Administrasiyasının ictimai-siyasi məsələlər şöbəsinin müdiri Əli Həsənov Azərbaycan mediasının nümayəndələrini, jurnalistika sahəsində çalışan bütün mətbuat işçilərini Milli Mətbuatımızın 137-cı ildönümü münasibətilə təbrik etmiş, onlara işlərində uğurlar arzulayıb.

Əli Həsənov bildirib ki, Azərbaycanda Milli Mətbuat gününün geniş təntənə ilə qeyd edilməsi artıq xoş bir ənənəyə çevrilib: “Bu ənənənin əsası ümummilli lider Heydər Əliyevin Milli Mətbuatımızın 125 illiyinin keçirilməsi haqqında imzadaldığı müvafiq Fərmanı ilə qoyulub. O vaxtdan qeyd olunan mətbuat günlərində ölkəmizin ictimai-siyasi həyatının müxtəlif sahələrində dəyərli yazıları ilə fərqlənmiş və dövlətçilik ənənələrimizə xidmət edən media mənsubları mükafatlandırılıblar”.

Prezident Administrasiyasının ictimai-siyasi məsələlər şöbəsinin müdiri qeyd edib ki, Azərbaycan milli mətbuatı çox çətin, eyni zamanda, zəngin və şərəfli inkişaf yolu keçib: “ 1875-ci ildə maarifçi və publisist Həsən bəy Zərdabi tərəfindən nəşr olunmağa başlayan “Əkinçi” qəzeti iki ilə yaxın fəaliyyəti dövründə mütərəqqi fikirli ziyalıları ətrafında birləşdirib. Qəzetdə elm, maarif, mədəniyyət, incəsənət və kənd təsərrüfatının inkişafı ilə bağlı məqalələr dərc olunmuş, dini mövhumata və cəhalətə qarşı kəskin çıxışlar edilib, bu mətbu orqan vasitəsilə xalqın mədəni tərəqqisi uğrunda mübarizə aparılıb. Maarifçilik xüsusiyyətləri ilə seçilən bu qəzet milli mətbuatın müasirləşmə, məfkurə saflığı, ümummilli məqsədlərin təbliği, ədəbi dilin zənginləşməsi, hadisələrin obyektiv işıqlandırılması kimi təməl yaradıcılıq prinsiplərini təcəssüm etdirən məktəb səviyyəsinə yüksəlib”.

Mətbuat Şurasının sədri Əflatun Amaşov da çıxışında Azərbaycan mətbuatının keçdiyi şərəfli tarixi yola nəzər salıb, “Əkinçi” qəzetinin xalqımızın həyatında oynadığı rolu xüsusi qeyd edib. O deyib ki, Azərbaycan Prezidenti İlham Əliyevin “Həsən bəy Zərdabinin 170 illik yubileyinin keçirilməsi haqqında” 2012–ci il 4 iyun tarixli Sərəncamına uyğun olaraq Zərdab və Gəncədə də tədbirlər keçirilib və bu istiqamətdə işlər davam etdiriləcək.

Sonra Mətbuat Şurasının təsis etdiyi “Ali media mükafatı”nın təqdimetmə mərasimi olub. Mükafatın birinci dərəcəsinə Bakı Dövlət Universitetinin jurnalistika fakültəsinin professoru Nəsir Əhmədli layiq görülüb. Ali Media Mükafatının müasir mətbuatın inkişafına görə olan ikinci dərəsində isə APA-nın baş direktoru Vüsalə Mahirqızı, “Ayna-Zerkalo” qəzetinin baş redaktoru Elçin Şıxlı və “525-ci qəzet”in baş redaktoru Rəşad Məcid layiq görülüblər. Mükafatın üçüncü dərəcəsi üzrə 5 media nümayəndəsi təltif olunub. Bunlar “Yeni Azərbaycan” qəzetinin baş redaktoru Hikmət Babaoğlu, “Şərq” qəzetinin baş redaktoru Akif Aşırlı, “Kaspi” qəzetinin baş redaktoru Natiq Məmmədli, “Kür” qəzetinin baş redaktoru Əminə Yusifqızı olub.

Tədbir iştirakçılarını salamlayan Azərbaycan Respublikası Prezidenti yanında Kütləvi İnformasiya Vasitələrinə Dövlət Dəstəyi Fondunun (KİVDF) icraçı direktoru Vüqar Səfərli son illər ölkəmizdə medianın inkişafı naminə görülmüş işlərdən danışıb. İcraçı direktor çıxışında milli mətbuatın inkişaf taixindən və onun keçdiyi çətin və şərəfli yoldan söz açıb. Vüqar Səfərli söz azadlığının qorunması və mətbuatın inkişafının dövlətin daim diqqət mərkəzində olduğunu deyib: “Bu gün media işçilərinin bayramıdır. Bu bayram ölkənin hər yerində qeyd edilir. Bayramın qeyd olunmasının əsas səbəbkarı Həsən bəy Zərdabinin “Əkinçi” qəzetini təsis etməsidir”. Milli Mətbuata dövlət qayğısından danışan icraçı direktor “Əkinçi” qəzetinin də maliyyə çətinliyi üzündən nəşrinin dayandırıldığını xatırladıb: “Maliyyə qəzetlərə hər zaman lazımdır. Elə bu səbəbdəndir ki, ölkə başçısının sərəncamı ilə Azərbaycan Respublikası Prezidenti yanında Kütləvi İnformasiya Vasitələrinə Dövlət Dəstəyi Fondu yaradılıb. Artıq Fond 3 ildir fəaliyyət göstərir. Bu illər ərzində Fonda dövlət büdcəsindən artan templə külli miqdarda vəsait ayrılıb. Ayrılan vəsait hesabına KİV-lərə maliyyə dəstəyi göstərilmiş, jurnalist peşəkarlığının artırılması məqsədi ilə treninq və fərdi yazı müsabiqələri keçirilmişdir”. Vüqar Səfərli qeyd edib ki, Milli Mətbuatın 137-ci ildönümü ilə əlaqədar keçirilən jurnalistlərin fərdi yazı müsabiqəsinə 10 istiqamət üzrə ümumilikdə 77 yazı təqdim olunub və yazılar Fondun 9 ekspertləri tərəfindən araşdırılaraq qiymətləndirilib: “Ayrı-ayrı istiqamətlər üzrə ən yüksək balları toplamış 30 yazının müsabiqənin qalibləri elan edilib”.

Mərasimdə jurnalistlərə KİVDF-nin mükafatları təqdim edilib. Sonda Milli Mətbuatımızın 137-ci ildönümü ilə bağlı “Bakcell” şirkətinin mükafatları da təqdim olunub. Mükafat alanlar sırasında Prezident Administrasiyasının ictimai-siyasi məsələlər şöbəsinin müdiri Əli Həsənov, Fondun icraçı drektoru Vüqar Səfərli və Mətbuat Şurasının sədri Əflatun Amaşovda var.

525-ci qəzet.-2012.-24 iyul.-S.4.