"Təhsil sistemindəki yeniliklərin ictimaiyyətə vaxtında və qərəzsiz çatdırılmasında "525-ci qəzet"in müstəsna rolu var"

Pərvinin həmsöhbəti təhsil naziri Misir Mərdanovdur.

(XI söhbət)

Pərvin: Misir müəllim, sizinlə müxtəlif mövzularda 10 söhbətimiz arxada qalıb. Hesab edirəm ki, bu aylar ərzində oxucular həyatınız və fəaliyyətinizlə bağlı kifayət qədər məlumat ala bildilər. Bəlkə, söhbətimizin yekununda bu günə kimi nail ola bilmədiyiniz arzularınızdan, görüləsi işlərdən və gələcək planlarınızdan danışasınız?

Misir Mərdanov: Arzularım, həyata keçirmək istədiyim planlarım həddən artıq çoxdur. Bəlkə də, yaşıma uyğun olmayan miqdardadır. Bunların hamısından danışsaq, daha on söhbət etməyimiz lazım gələr (gülür).

Pərvin: Amma hər halda suallarıma səmimi cavablar alacağıma əmin olduğumdan həyatınızın müxtəlif tərəflərinə aid arzu və planlarınızı öyrənməyə cəhd edəcəyəm. İlk öncə soruşmaq istərdim ki, bir övlad kimi valideynlərinizə ürəyiniz istəyən qayğı və diqqəti göstərə bilmisinizmi?

Misir Mərdanov: Yəqin ki, tam yox... Hamı kimi mən də valideynlərimə çox bağlı olmuşam. Orta məktəbi bitirənə qədər onlarla birlikdə yaşamış, himayələri altında böyümüşəm. Tələbəlikdə isə ata-anamdan istər-istəməz uzaq düşsəm də, yenə onların köməyinə, maddi və mənəvi qayğısına ehtiyac duymuşam. Hətta ailə qurub oğul-uşaq sahibi olduqdan sonra da qarşılıqlı bağlılığımız azalmayıb. Maraqlı məqam budur ki, müəyyən imkanlarım yarandıqdan sonra mən valideynlərimdən deyil onlar məndən özlərinə və kiçik qardaş-bacılarıma diqqət, qayğı umurdular.

Pərvin: Bu mərhələni yeniyetmə duyğularına vida hesab etmək olar... Yəni artıq məsuliyyət artır və insan valideynlərinə həm də övladı kimi baxır...

Misir Mərdanov: Əlbəttə... Bu duyğuları təbii hesab edirəm və düşünürəm ki, hər bir övladın müqəddəs borcu imkanları daxilində valideynlərinin qayğısına qalmaqdır. Mən bu məsuliyyəti həmişə dərk etmişəm və övladlıq borcumu yerinə yetirməyə çalışmışam. Amma etiraf edim ki, ürəyimdə bir nisgil də qalıb. Yaxşı xatırlayıram, 2006-ci ildə Şimali İrlandiyaya rəsmi səfərdən əvvəl həmişə olduğu kimi valideynlərimlə görüşdüm və atama söz verdim ki (o ərəfələrdə atamın səhhəti ilə bağlı problemləri var idi), səfərdən qayıdandan sonra onu həkimə göstərəcəyəm. Ancaq təəssüf ki, səfərim bitənə kimi atam xəstəxanaya düşmüşdü və mən ona heç bir kömək edə bilmədim. O, dünyasını dəyişəndə 88 yaşı var idi. Ömrünü mərd-mərdanə, qürurlu, əsl kişi kimi yaşamışdı. Amma yenə də bunlar təsəlli deyil. Hər dəfə onun məzarını ziyarət edəndə özümü günahkar hiss edirəm və düşünürəm ki, bəlkə də ona vaxtında kömək edə bilsəydim, daha çox yaşayardı. Bütün bunlarla yanaşı, Allahıma şükür edirəm ki, atamın ən qiymətli yadigarı olan anam bu gün yaşayır. Tez-tez qardaş və bacılarımla ətrafına toplaşır, nəslimizin keçmişi haqqında bilmədiklərimizi ondan öyrənir, müdrik nəsihətlərini dinləyir, atamın əziz xatirəsini yad edirik.

Pərvin: Xatırlayıram ki, ilk söhbətimizdə ailənizdən, övladlarınızdan danışmışdıq. Və demişdiniz ki, bəlkə də övladlarınızın atası Misir Mərdanov olmasaydı, onlar daha çox inkişaf edib irəli gedərdilər. Necə düşünürsünüz, bir ailə başçısı kimi razıdılarmı sizdən?

Misir Mərdanov: Bu sualınıza onlar özləri daha dəqiq cavab verərdilər. Əvvəlki söhbətlərimizdən bilirsiniz ki, bir oğul, iki qız atasıyam. Oğlumun bu yaxınlarda 40 yaşı tamam olacaq, övladlarım hər biri ailə qurub, hərəsinin iki uşağı var, böyük nəvəm ali məktəb tələbəsidir, digər nəvələrim məktəbdə oxuyurlar.

Pərvin: Ailə genişləndikcə məsuliyyət, bəzən çətinliklər də artır. Hətta belə bir deyim də var: Uşaqlar böyüdükcə problemlərdə böyüyür...

Misir Mərdanov: Bu, həyatın qanunudur. İnsan böyüdükcə qayğıları da çoxalır. Ümumiyyətlə, övladlarımın ailə işlərinə müdaxilə etməməyə çalışıram. Ancaq əlbəttə, yeri gələndə, ehtiyacları olanda zəruri köməklik göstərir və məsləhətlər verirəm. Məncə, valideyn üçün övladının xoş sədasını eşitməkdən böyük xoşbəxtlik ola bilməz. Allaha şükür edirəm ki, indiyədək onlardan özümə və başqalarına qarşı heç bir hörmətsizlik hiss etməmiş, haqlarında həmişə müsbət rəylər eşidərək sevinmişəm.

Pərvin: Sizcə, bu kimin xidmətidir?

Misir Mərdanov: (gülür) Maraqlı və qadın həmrəyliyindən irəli gələn sualdır. Əlbəttə ki, həyat yoldaşımın xidmətidir. Mənim başım elmə, adminstrativ işlərə qarışanda, xalqın balalarının təhsilini düşünəndə o evdə uşaqlarımızın tərbiyəsiylə məşğul olub. Buna görə də həyat yoldaşıma minnətdarlığım sonsuzdur.

Övladlarımın karyerasına gəldikdə isə, başqalarından fərqli olaraq, mən onları öz nüfuzum, imkanlarım hesabına alim və ya vəzifə sahibi etməyə çalışmamışam. "Kölgədə bitən ağacın kölgəsi olmaz." - deyirlər. Mən istəmişəm ki, onların hər birinin öz kölgəsi olsun.

Pərvin: Misir müəllim, hər kəsə məlumdur ki, vəzifə və elm bir-birinin əksi olan sahələrdir. Ömrünüzün lap gənc çağlarından müxtəlif vəzifələrdə çalışmısınız. Adminstrativ işlər riyazi araşdırmalarınıza mane ola bildimi?

Misir Mərdanov: Dediklərinizlə tamamilə razıyam. Vəzifəm böyüdükcə, səlahiyyətlərim çoxaldıqca məsuliyyətim də artırdı və əvvəllər elmə ayırdığım vaxtın daha çox hissəsini təhsilin idarəsinə, daha doğrusu vəzifə səlahiyyətlərimi yerinə yetirməyə sərf etməli olurdum. Dəfələrlə demişəm və bir daha vurğulamaq istəyirəm - indi biz elə bir dövrdə yaşayırıq ki, insan bir vəzifəni çox çətinliklə icra edə bilir, bu baxımdan, eyni zamanda bir neçə vəzifə tutanları başa düşə bilmirəm. Bu vəzifəyə təyin olunduqdan sonra demək olar ki, uzun illər məşğul olduğum və keçmiş SSRİ miqyasında uğurlu nəticələr qazandığım elm sahəsindən uzaqlaşıb bütün enerjimi, ruhumu, düşüncələrimi müstəqil Azərbaycanın təhsil quruculuğuna həsr etdim. Bəlkə də bu, alnıma yazılmış yazıdı, qismətdir.

Pərvin: Bütün bunları düşünəndə peşmançılıq hissi keçirmirsiniz ki?

Misir Mərdanov: Qətiyyən. Bu illər ərzində bütün imkanlarım və səlahiyyətlərimdən istifadə edərək, ölkəmizin təhsil sisteminin dünya təhsil sisteminə inteqrasiyası istiqamətində uğurlu nəticələr qazanmasına çalışmışam. Görüləsi işlərimiz isə hələ çoxdur. Ona görə də pessimistləşmək olmaz.

Pərvin: Elmdən danışmışkən, sizin təhsilin tarixinə aid apardığınız araşdırmaları vurğulamaq istərdim. “Azərbaycan təhsil tarixi" adlı çoxcildliyin müəllifisiniz. Sizcə, xalqa məlum olmayan çoxmu faktlar qalır? Ümumiyyətlə, bu istiqamətdə tədqiqatlarınız davam edəcəkmi?

Misir Mərdanov: Düşünürəm ki, “Azərbaycan təhsil tarixi" kitabının birinci cildi üzərində yenidən işləməli olacağıq. II, III və IV cildlərdə təsvir olunan dövrdə təhsil sahəsində baş vermiş hadisələr barəsində ətraflı məlumat versək də, Sovet dövrünə qədərki zamanla bağlı məlumat tam və geniş deyil. Son vaxtlarda daha bir araşdırma aparıb çox dəyərli arxiv materialları əldə etmişik. İnşallah birinci cildin təkrar nəşri zamanı bütün bunlar nəzərə alınacaq. Bundan əlavə haqqında danışdığımız dördcildlik əsasında “Azərbaycan Təhsil Tarixi" kitabının rus və ingilis dillərində çap olunması barədə də düşünürəm.

Pərvin: Misir müəllim, istər Sovet dövründə Xalq Maarifi Nazirliyində çalışanda, istərsə də müstəqil ölkəmizin təhsil naziri kimi fəaliyyətinizdə təhsilimizin inkişafı naminə bir çox işlər görmüş, xeyli uğurlara imza atmısınız. Bu sahədə hələlik həyata keçirə bilmədiyiniz və planlaşdırdığınız işlər barədə məlumat verməyinizi istərdim...

Misir Mərdanov: Hesab edirəm ki, son illərdə ölkəmizdə təhsilin inkişafı ilə bağlı çoxsaylı uğurlu nəticələrin səbəbi ölkə rəhbərliyinin diqqət və qayğısı və fədakar təhsil işçilərinin yorulmazlığı, səyləridir. Mən də bu işlərin iştirakçılarından olmuşam. Lakin təhsil elə geniş sahədir ki, burada həmişə müəyyən problemlər ortaya çıxır. Hətta dünyanın inkişaf etmiş ölkələrinin təhsil sistemində də çatışmazlıqlar mövcuddur və bunların aradan qaldırılması üçün islahatlara ehtiyac olur. Cəmi 20 yaşı olan müstəqil Azərbaycanın təhsil sisteminin dünya təhsil sisteminə inteqrasiyasına nail olmaq üçün fikrimcə, hələ çox işlər görülməlidir.

Təhsil naziri olaraq hal-hazırda əsas narahatlıqlarımdan biri məktəbəqədər təhsillə bağlıdır. Müstəqillik illərində ölkə rəhbərliyinin təsdiq etdiyi proqramlara, Heydər Əliyev Fondunun layihələri çərçivəsində yeni uşaq bağçalarının inşa edilməsinə, mövcud müəssisələrin əsaslı təmir olunmasına, son model avadanlıq və təlim vasitələri ilə təchizatına, ilk dəfə olaraq təhsilin bu pilləsi üçün müasir tələblərə cavab verən kurikulumun hazırlanmasına baxmayaraq, görülməli işlər daha çoxdur.

Təsəvvür edin ki, hazırda 600 mindən çox məktəbəqədər yaşlı uşağın yalnız 113 minini, başqa sözlə cəmi 17 faizini uşaq bağçalarına cəlb edə bilmişik, dünyanın inkişaf etmiş ölkələrində isə bu rəqəm 80-90 faizə çatır.

Pərvin: Yəqin ki, bunun bir səbəbi də milli mentalitetimizə görə uşaqların ailələrdə tərbiyə olunmasıdır.

Misir Mərdanov: Doğrudur. Ona görə də heç Sovet dövründə də bu sahədəki vəziyyət ürəkaçan deyildi.

Pərvin: Əvvəlki söhbətlərimizdə qeyd etmişdik ki, son illərdə ölkəmizin təhsil sisteminin digər pillə və səviyyələrinə nisbətən ümumi təhsil sahəsində nailiyyətlər daha çoxdur. Bu sahədə həyata keçirilməsi vacib olan məsələlər barədə fikirlərinizi bilmək istərdim...

Misir Mərdanov: Qarşıda duran əsas məsələlərdən biri ümumtəhsil məktəblərinin rasionallaşdırılmasıdır. Ölkə başçısı tərəfindən 1999-cu ildə təsdiq olunmuş islahat proqramında prioritetlərdən biri də məktəb şəbəkəsinin rasionallaşdırılması məsələsi idi.

Pərvin: Bununla bağlı mətbuatda bir neçə çıxışınıza rast gəlmişəm. Amma bunun mahiyyəti və faydası barədə daha aydın məlumatımız yoxdur...

Misir Mərdanov: Sadə dildə desəm, burada əsas problem məktəblərdə müəllim şagird nisbətinin az olmasıdır. Yəni ölkəmizdə elə məktəblər var ki, (şübhəsiz, söhbət rayon və kənd məktəblərindən gedir) orada şagird sayı çox azdır, bəzən heç 100-ə çatmır. Dünya bankının dəstəyi ilə həyata keçirdiyimiz təhsil sektorunun inkişafı layihəsi çərçivəsində beynəlxalq və milli ekspertlərin ciddi araşdırmaları nəticəsində müəyyən etdik ki, ölkəmizdə fəaliyyət göstərən 4522 dövlət ümumtəhsil məktəbindən 1336-da şagirdlərin sayı 100-dən azdır. Hətta 432 məktəbdə şagirdlərin sayı 30 nəfərdən azdır. Ümumtəhsil məktəblərinin rasionallaşdırılması proqramı məhz həmin problemi həll etmək məqsədilə həyata keçirilir.

Bu sahədə əsas məsələlərdən biri də adambaşına maliyələşmə sisteminə keçməkdən ibarətdir. Bununla bağlı tədbirlər dünyanın əksər ölkələrində uğurla həyata keçirilib və həmin ölkələrdə təhsilin keyfiyyətinin yüksəlməsinə öz müsbət təsirini göstərmişdir. Təhsildə adambaşına maliyyələşmə prosesinin əsas mahiyyəti ondan ibarətdir ki, təhsil müəssisəsinin illik maliyyə smetası onun bütün zəruri ehtiyacları və perspektivləri nəzərə alınaraq məktəb şurası tərəfindən tərtib olunur və idarə edilir. Bundan əlavə hər il hökümət tərəfindən bir şagirdə sərf olunacaq büdcə vəsaiti müəyyənləşdirilir və məktəbə maliyyə vəsaiti oradakı şagirdlərin sayına uyğun olaraq yönəldilir. Başqa sözlə bir tərəfdən məktəb və onun kolletivi maraqlı olur ki, məktəbdə şagirdlərin sayı çox olsun, digər tərəfdən isə məktəblər arasında sağlam rəqabət mühiti yaranır.

Dünya bankının dəstəyi ilə həyata keçirdiyimiz layihə çərçivəsində İsmayıllı, Ucar rayonlarında və Şirvan şəhərindəki 59 məktəbdə pilot olaraq həm məktəb şəbəkəsinin rasionallaşdırılması, həm də adambaşına maliyyələşmə sahəsində tədbirlərin həyata keçirilməsinə başladıq və deyim ki, qısa müddət ərzində müəyyən müsbət nəticələr qazanıldı. Dövlət büdcəsindən məktəbə ayrılması nəzərdə tutulan vəsaitdən daha səmərəli istifadəyə məktəb rəhbərliyinin və yeni məzmunda təşkil edilmiş məktəb şurasının bu prosesdə rolunun artırılmasına nail olundu

Pərvin: Həmin layihələrin başqa məktəblərdə də həyata keçirilməsi nəzərdə tutulurmu?

Misir Mərdanov: Nəzərdə tutulur. Ancaq təəssüf ki, müxtəlif səbəblərdən bu layihələrin ölkənin bütün ümumtəhsil məktəblərində tətbiqinə nail ola bilmədik. Yeri gəlmişkən qeyd edim ki, bu gün cəmiyyət məktəbdən və müəllimdən yüksək keyfiyyətli təhsil gözləyir, lakin məktəbə və onun idarə olunmasında əsas şəxsə - məktəb direktoruna ondan tələb edilən yüksək nəticəyə adekvat səlahiyyətlər verilirmi? Məktəb direktoru və şurası məktəbin illik smetasının tərtib olunmasında və onun idarəsində iştirak etmirsə, həmin məktəbdə təhsilin keyfiyyətindən danışmaq olarmı? Dünya təcrübəsində geniş tətbiq olunan şagirdlərin daşınmasını, bu məqsədlə nəqliyyat vasitələrinin ayrılmasını həyata keçirmədən məktəb şəbəkəsini rasionallaşdırmaq mükündürmü? Əlbəttə ki, yox. Yaxın gələcəkdə bütün bu məsələlərin öz müsbət həllini tapacağına inanıram.

Pərvin: Haqqında danışdığımız pillənin inkişafı müəllimlərdən daha çox asılıdır. Müəllim hazırlığı sahəsində çatışmazlıqlarımız varmı? Ümumiyyətlə, bu istiqamətdə hansı işlərə ehtiyac var?

Misir Mərdanov: Müəllim hazırlama sahəsində beynəlxalq təcrübədə geniş tətbiq edilən mərhələli hazırlıq sisteminin, o cümlədən praktik hazırlığa təminat verən internatura modelinin tətbiqi, hazırda ümumtəhsil məktəblərində işləyən müəllimlərin peşəkar inkişafı üçün yeni ixtisasartırma modelinə keçilməsi, müəllimlərin fəaliyyətinin sertifikatlaşdırılması, təhsil alanların bilik və bacarıqlarının qiymətləndirilməsi sahəsində atılmış addımların daha da təkmilləşdirilməsi həllini gözləyən zəruri məsələlərdir.

Qeyd olunan problemlərin dövlət səviyyəsində həlli ümumi təhsilin keyfiyyətinin yüksəlməsinə əhəmiyyətli təsir göstərə bilər.

Pərvin: Misir müəllim, çıxışlarınızda peşə təhsili ilə bağlı problemləri, bu sahədə qarşıda duran vəzifələri vurğulayırsınız. Ötən söhbətlərimizdə Sovet dövründə peşə təhsilinin inkişafı mövzusunda danışmışdıq və peşə-ixtisas təhsilini ölkə iqtisadiyyatının inkişafında mühüm vasitələrdən biri hesab etdiyinizi demişdiniz...

Misir Mərdanov: Bu sahənin inkişafı naminə Dövlət Proqramına əsasən müəyyən addımlar atılıb, bir neçə yeni peşə-tədris mərkəzi yaradılıb, dərsliklər hazırlanıb, beynəlxalq təşkilatlarla birlikdə layihələrin həyata keçirilməsinə başlanıb. Lakin müəssisələrin böyük əksəriyyətinin maddi-texniki bazası, təchizatı müasir tələblərə cavab vermir, özəl sektorla, işə götürənlərlə səmərəli əlaqələr qurulmamışdır. İnkişaf etmiş ölkələrdə ümumi təhsil məzunlarının 60 faizi peşə təhsilinə yönəldiyi halda, ölkəmizdə bu cəmisi 11 faiz təşkil edir. Lakin biz bu vacib sahənin inkişafı istiqamətində müəyyən işlər görməyə çalışırıq. Cənubi Koreyanın Daevo İnterneyşenel şirkəti ilə Bakı şəhərində ali peşə təlimi mərkəzinin yaradılmasıyla bağlı kredit sazişi hazırlanaraq təsdiq üçün Nazirlər Kabinetinə təqdim edilmişdir. Bundan əlavə Avropa Birliyinin tvininq layihəsi çərçivəsində ayrılmış vəsait hesabına ölkənin peşə təhsilinin bu günkü vəziyyəti Təhsil Nazirliyinin əməkdaşları ilə birlikdə araşdırılmış, Ağstafa və Göyçay rayonlarında kənd təsərrüfatı ilə bağlı müasir tipli peşə məktəblərinin layihəsi hazırlanaraq respublika hökumətinə təqdim edilmişdir. Alman mütəxəssislərinin rəyinə görə ölkədə texniki-peşə təhsilini inkişaf etdirmək üçün birdəfəlik 200 milyon manatdan çox vəsait tələb olunur

Düşünürəm ki, regionların sosial-iqtisadi inkişaf perspektivlərinə uyğun olaraq müasir təminatlı peşə-tədris mərkəzlərinin və komplekslərinin yaradılması, istehsal və xidmət sektorlarının, işə götürənlərin ehtiyac və tələbatlarına uyğun çevik təhsil proqramları vasitəsilə kadr hazırlığının həyata keçirilməsi yaxın gələcəyin əsas prioritetlərdəndir.

Pərvin: Misir müəllim, ötən şənbə ali təhsil sistemi barədə ətraflı söhbətimiz oldu. Bu sahədə də düşüncələrinizin nikbinliyi hiss edilir. Təbii ki, bu, əldə olunan uğurlarla - dünya təcrübəsinə uyğun çoxpilləli ali təhsil sisteminə keçid, Boloniya prosesinə qoşulmaqla Avropa ali təhsil məkanına inteqrasiya imkanlarının genişlənməsi, tədrisdə kredit sisteminə keçilməsi, xaricdə təhsil ənənələri bərpası, ali təhsilin normativ-hüquqi bazasının tam yeniləşdirilməsi ilə bağlıdır. Lakin siz bütün bu işlərin mərkəzində olan şəxs kimi çatışmazlıqları, qarşıda duran problemləri də hər kəsdən yaxşı bilirsiz...

Misir Mərdanov: Bəli. Bütün bu sadaladıqlarınızla yanaşı, ali təhsil sahəsində həyata keçirilməsi vacib olan bir çox məsələlər məni daim düşündürür.

Ali təhsil müəssisələrinin təhsil-tədqiqat-innovasiya mərkəzlərinə çevrilməsinə dəstək verən və rəqabət qabiliyyətli mütəxəssis hazırlığını təmin edən standartların yaradılması, ali məktəblər üçün universitet şəhərciklərinin salınması, keyfiyyətin yaxşılaşdırılması naminə stimullaşdırma mexanizmlərinin, qrant sisteminin tətbiqi, iqtisadiyyatın diversifikasiyası və dayanıqlı iqtisadi inkişafın əsas şərtlərindən biri kimi ali təhsil sahəsində dövlət-biznes partnyorluğu sisteminin inkişaf etdirilməsi, ali təhsilin bütün səviyyələri arasında varisliyin gücləndirilməsi, elmi tədqiqatların stimullaşdırılması sahəsində beynəlxalq təcrübədə sınaqdan keçirilmiş mexanizmlərin tətbiqi, akkreditasiya mexanizminin təkmilləşdirilməsi qarşıda duran zəruri məsələlərdəndir.

Pərvin: Misir müəllim, hesab edirəm ki, təhsilimizdəki uğurlarla yanaşı, çatışmazlıqlar haqqında da danışmağınız sizin işinizə fərqli yanaşmanız və səmimiliyinizdən irəli gəlir. İndiyə kimi olan bütün söhbətlərimizdə bu özünü göstərib. Fürsətdən istifadə edib maraqlı həmsöhbət olduğunuza görə sizə öz minnətdarlığımızı bildirmək istəyirəm. Apardığım layihə çərçivəsində sizinlə söhbətlərdən bir çox məsələləri öyrəndim, xeyli zəngin təəssüratlarım yarandı və zənnimcə, bu, gələcək fəaliyyətimdə xeyli faydalı olacaq...

Misir Mərdanov: Təşəkkür edirəm, Pərvin xanım. Artıq üç aya yaxındır ki, "525-ci qəzet"in şənbə nömrələrində on söhbətimiz dərc olunub və bu, on birinci - sonuncu söhbətimizdir. Söhbətlərimiz zamanı uşaqlıq dövrümdən indiyə qədərki illərimi, həyat və karyera yolumu bir daha xatırladım, düşüncələrimi oxuculara əlavə, süni boyasız və səmimi şəkildə çatdırmağa çalışdım. Deyim ki, söhbətlərimiz mənim özümə də çox maraqlı və xoş oldu. Bütün bunlara görə uzun illərdir həmişə mənə dayaq olan və mətbuatımızda özünəməxsus nüfuza malik "525-ci qəzet"in baş redaktoru, çox hörmətli Rəşad Məcid başda olmaqla bütün yaradıcı heyətə və şəxsən sizə minnətdarlığımı bildirirəm. Qeyd etməliyəm ki, təhsil sistemindəki yeniliklərin ictimaiyyətə vaxtında və qərəzsiz çatdırılmasında "525-ci qəzet"in müstəsna rolu var. Mən bu qəzetə sonrakı fəaliyyətində də millətimizin intellektual potensialının inkişafı yolunda daha böyük nailiyyətlər arzulayır, uğurlar diləyirəm.

525-ci qəzet.-2012.-30 iyun.-S.10-11.