“Yahu” demək yaddan çıxıb, Bu yerlərdə “yar, yar” deyirlər

Şuşaya məktublar

Birinci məktub

Sevdam, nəşəm, ələmim!

Səfam, cəfam, qəhərim!

Şah şəhrim, Xan şəhrim!

Sənsiz ölüm yalan oldu.

Halım yaman, halım xəstə,

Dərdim zildə-səsim pəsdə,

Qərənfillər dəstə-dəstə

Şəhid yola salan oldu.

Kimdi yağı, biləmmədim,

Kimsəylə dərd böləmmədim,

Öz evimə gələmmədim,

Satan satdı, alan aldı.

Mən səndən başlayan yolam,

Sənə qayıdacaq balam,

Yolu bağlı viran Qalam.

Demə, daha olan oldu.

2002

İkinci məktub

Salam, dumanlı Şuşam,

Dönməyə gümanlı Şuşam,

Sən bir Hacsan, Haca

Xaç suyu neylər, Şuşam?!

İllər ayrısı, zəvvaram,

Qovuşunca dinclik haram,

Dəxil düşüb yalvarıram,

Canım səndə, sınma, Şüşəm.

Uluca yaşın haqqı,

Torpağın-daşın haqqı,

Qaraca başım haqqın,

Haqqını gözlə, Şuşam.

2012

Üçüncü məktub

Rəşad Məcidə

Bir dəfə qələm dostum “Şuşanı görmədən Şuşa yanğısıyla necə yazırsan?”- deyə soruşdu.

Görsəm, külə dönərdim,

Gündə yüz yol ölərdim.

Mənim yanğım “Şuşa!”- deyib

Ölənlərin yanğısı.

Hardan qaynar “İsa bulaq”?

“Saxsı bulaq”, ” Karvan bulaq”?

Sönərmi düşsə qonaq

Karvanların yanğısı?

Çoxmu uzaq Ərimgəldi?

Bəlkə ərə kərəm gəldi,

Bəlkə öləziyib sindi

Sənəmlərin yanğısı.

Nə düşüb, yalan fırlayam?

Yaylaqda qarı xarlayan,

Aranda canı şorlayan

Pərənlərin yanğısı.

Səslənsəm “ünüm yetəndi”,

Bəsləsəm, “gülü bitəndi”,

Tovuz da, Şuşa da Vətəndi,

Vətənimin yanğısı.

Şuşa gedib, Şuşa gəlsin,

Huşa gedən huşa gəlsin,

Yazmıram ki xoşa gəlsin,

Ürəyimin yanğısı.

2012

Ünlü türk şairi Əli Ağbaşa

“Yahu” demək yaddan cıxıb,

Bu yerlərdə “yar, yar” deyirlər.

Qanlar tökülür,

Canlar yaxılır

vəsli-yar uğrunda.

Yarından bir xal qalır

hər sevənin bağrında.

Keçib əzmdən-dözümdən,

Yar deyib, gedir özündən,

Aşiqin naləsi üzündən

Abidin duası yetişmir.

Dağında qarım qalır,

Bağında barım qalır,

Sağım qalır, solum qalır.

Divanələr mülkündə

Dünya işi,

Tanrı işi,

Bəndə işi,

yarım qalır.

“Yahu” demək yaddan cıxıb,

Bu yerlərdə

“yar, yar” deyirlər.

Bir yerlərə götür məni,

Sevgili Rəbbim-

O yerə ki,

Elçilər

“var” deyirlər.

Son

Kimi Allahla,

kimi şeytanla

yoluna qoyur işini;

ağırlıq

yolun boynuna düşür.

Fərman padşahdan gəlir,

cəza günahdan;

ağırlıq

əlin boynuna düşür.

Kəbə quran da insan,

Könül yıxan da;

Ağırlıq

dilin boynuna düşür.

Kimi sidqi-imanla,

kimi şübhə-gümanla

yürüyür SONa;

Ağırlıq

SONun boynuna düşür...

Qəsd

Uzaqlar sevinsin deyə,

Qəsd ilə uzağa düşdüm.

Tuzaqlar sevinsin deyə,

Qəsd ilə tuzağa düşdüm.

Rəqibləri, əğyarları sevdim,

Sevdim ki, dəyişsin fitrəti.

Qəsd ilə “duymadım” nifrəti,

Sevgili çağları sevdim.

Qeylü-qalına varmadım,

Qəsd ilə qəzaları sevdim.

Sonku halıma varmadım,

Sevdim, fəzaları sevdim.

lll

Yağış göz yaşıyla yarışa bilmir,

Gülür bu yarışı udan çiçəklər.

Biri göylərin rəhməti,

Biri könül möhnəti;

Bu qoşa yağmurdan

odam çiçəklər.

“Qızılgül oyum-oyum,

Dərim, sinəmə qoyum”,

Bir zaman südüm-soyum,

anam-atam çiçəklər.

Alışır ürəyim, alışa bilmir

Olub-bitənlərlə barışa bilmir,

O çiçək tənlərə qarışa bilmir,

Yarı torpaq, yarı su,

yarı adam çiçəklər...

Antifəlsəfə

Ceyran oldum, ovlandım,

Aslan oldum, ac qaldım.

Gah ayaqlarımda aradım suçu,

gah dişlərimdə.

Ədalət soraqladım

dünyanın işlərində.

Az getdim-üz getdim,

Elə bir məkana yetdim;

Ceyranlar aslan pəncəli,

Aslanlar incə, işvəli.

Nə ayaq kara gəlir,

Nə diş,

Təkcə qanun köhnədi;

İş, iş, yenə iş.

İş, nə iş!!!

Qafa yorma, şikar olma,

Sadəcə, bekar olma;

Çalış, vuruş

ayaqla diş arasında.

Nə ceyran ölməsin,

Nə aslan ac qalmasın.

Fəlsəfə də burasında!

Hava durumu

–Gün aydın, sevdiyim, necəsən?

–Belə də, hamı kimi,

Şükr ki, sən varsan,

Həyatın tamı kimi.

Daha dadlı, daha şirin

deyəcəklərim var sənə,

fəqət, sözlər yetərli deyil.

Göz havasına,

nəfəs havasına,

əl havasına

anlatmam gərəkir incəlikləri.

–Harda, nə vaxt?

–Vaxt tapılar, yer tapılsa.

Bilirsən də,

Bakının havası fərli deyil...

Bu nədi, bilmirsən?

Sənsiz canım sıxılır;

Yadımdan çıxmırsan,

Dilimdən düşmürsən.

Sənsiz hər yan bomboş;

Gözümdə səhralıq,

Könlümdə tənhalıq.

Sənsiz yürümür zaman;

Sürünür günlər-aylar,

Ömürdən uzun anlar.

Sənsiz azır yolunu-

İrmaq nəhrə qovuşmur,

Can köyə-şəhrə yovuşmur.

Sənsiz canım sıxılır,

Yadımdan çıxmırsan,

Dilimdən düşmürsən.

Bu nədi, bilmirsən?

Elegiyalar

Yosungözlü qar(a)daşa

Gün vardı;

Uzaqda günəş,

yaxında sən vardın.

Günəşi içirdim

Sənin şərəfinə.

Gün var;

Yaxında günəş,

uzaqda sən varsan;

Günləri içirəm

zülmətin şərəfinə...

lll

Yadındamı, Kislovodskda rus

şəkilçinin bizi qardaş-bacı yox,

nişanlı bilib baş-başa qoyduğu və əlimizə bir qızılgül verdiyi?

Müdam dolaşıram ötələrdə-

Dəmət kimi

dərləyirəm sənli günləri.

Gülləri tək-tək yığıram,

Cüt-cüt qucuram günləri.

Müdam dolaşıram ötələrdə-

Yerdən Göyə durmadan

Dua-səna göndərirəm.

Ötüb-keçər deyə, bəlanı

min qılıqla dindirirəm.

...Gələcək ötüb-keçdi səndən,

Gələcək olub-bitir məndə...

Ömrümün ötəri qonağı,

Könlümün əbədi sahibi,

Sən məndə qal, mən səndə.

Gülləri cüt-cüt səpir kimsə;

Bir cüt sənin yoxluğuna,

Bir cüt mənim varlığıma.

...Müdam dolaşıram ötələrdə...

Kölgə

Varlığında da,

Yoxluğunda da

VAR olmaq hünər!

Dost-doğmaya kölgə salıb,

İqtidar olmaq zəfər!

Qismətində o da varmış,

bu da var...

...Şükr, lütfünə göylərin!-

Özün yoxsan, kölgən var...

Sənsiz olmasın günüm-anım,

Bala-bala dolanıram sayəndə,

Kölgən qalın olsun, sultanım

Əlibəyli, Bəsti.

525-ci qəzet.- 2012.- 15 iyun.- S.29.