Azərbaycan və Macarıstan Milli Kitabxanaları arasında Memorandum imzalanıb

M.F.Axundzadə adına Azərbaycan Milli Kitabxanasında Macarıstan Milli Kitabxanası ilə ikitərəfli Əməkdaşlıq haqqında Memorandumun imzalanması mərasimi keçirilib.

Azərbaycan Milli Kitabxanasının direktoru Kərim Tahirov mərasimdə çıxış etmişdir. O, qonağı – Macarıstan Milli Kitabxanasının direktoru xanım Andrea Sajonu səmimi salamlayaraq, bu yaxınlarda Macarıstana səfər etdiyini, burada qiymətli Azərbaycan əlyazmalarının saxlandığı Milli Kitabxananın işi ilə tanış olduğunu qeyd edib.

K.Tahirov bildirib ki, Azərbaycan Milli Kitabxanası bu günə qədər dünyanın 27 ölkəsi ilə ikitərəfli əməkdaşlıq haqqında müqavilələr imzalayıb.

Macarıstan Milli Kitabxanasının direktoru Andrea Sajo Azərbaycanda ilk dəfə olduğunu bildirərək, artıq Milli Kitabxana və onun əməkdaşları ilə tanış olmağa macal tapdığını qeyd edib.

O, Budapeştin ən gözəl tarixi binalarından birində - Kral Matias Sarayında yerləşən Milli Kitabxananın strukturu və fəaliyyəti barədə söhbət açmış, kitabxana haqqında videoçarxı şərh etmişdir.

Mədəniyyət və Turizm Nazirliyinin Nəşriyyatlar, reklamın təşkili və informasiya şöbəsinin müdiri Vaqif Bəhmənli Azərbaycan – Macarıstan ədəbi əlaqələri barədə məlumat vermiş, xalqlar arasında qarşılıqlı anlaşma və dostluq münasibətləri yaranmasında kitabın rolu haqqında danışmışdır.

Sonra M.F.Axundzadə adına Azərbaycan Milli Kitabxanası ilə Macarıstan Milli Kitabxanası arasında Əməkdaşlıq haqqında Memorandum imzalanıb.

Memorandumu Azərbaycan Milli Kitabxanasının direktoru Kərim Tahirov və Macarıstan Milli Kitabxanasının direktoru Andrea Sajo imzalamışlar.

Memoranduma əsasən, kitab, mətbu nəşrlər, biblioqrafik siyahılar və digər çap məhsulları mübadiləsi, müştərək tədris kursları və seminarlar keçirilməsi, fondların qorunub saxlanması və kitabxanaların rəqəmsal formata çevrilməsi sahəsində əməkdaşlıq nəzərdə tutulur.

525-ci qəzet.- 2012.- 20 iyun.- S.7.