Əli Əhmədov: “Azərbaycan obyektiv tənqidləri qəbul edir"

"AMMA TƏNQİDLƏR QƏRƏZLİ, QEYRİ-OBYEKTİV OLANDA ÖZ KƏSKİN MÖVQEYİNİ DƏ ORTAYA QOYUR”

Müsahibimiz millət vəkili, Yeni Azərbaycan Partiyasının (YAP) icra katibi Əli Əhmədovdur.

– Əli müəllim, ABŞ dövlət katibi Hillari Klintonun regiona və Azərbaycana səfərini necə qiymətləndirirsiniz? Səfər günlərində cəbhə və təmas xəttində atəşkəsin iri miqyasda pozulması sizcə, nədən xəbər verirdi?

– Təbii ki, bu səfəri yüksək qiymətləndirirəm. Bu, birincisi Amerika Birləşmiş Ştatlarının Cənubi Qafqaza marağını ifadə edir. Bu marağın yüksək olduğu bir daha bu səfərlə vurğulanır. Digər bir tərəfdən, hesab edirəm ki, bu səfər Cənubi Qafqaz, o cümlədən Azərbaycanla əlaqədar ABŞ-da kifayət qədər səhih və düzgün məlumatların, informasiyanın əldə edilməsi üçün əhəmiyyət daşıyır. Daha doğrusu, məlum səfər ABŞ-ın Cənubi Qafqazla , eləcə də Cənubi Qafqazın ən güclü dövləti olan Azərbaycanla bağlı siyasətinin dəqiqləşdirilməsi baxımından mühüm əhəmiyyət kəsb edir.

Bu səfərdə Amerikanın dövlət katibi Azərbaycanda cərəyan edən proseslərə, Azərbaycanın inkişafına, Azərbaycanın həyata keçirdiyi siyasətə və onun nəticələrinə kifayət qədər müsbət münasibət bildirib. Bütövlükdə Azərbaycanın həm regionda, həm də regiondan kənarda oynadığı rolu yüksək qiymətləndirib. Bütövlükdə qeyd etmək istəyirəm ki, xanım Klintonun Azərbaycana səfəri pozitiv məqamlarla yadda qalıb və ayrıca onu da vurğulamaq istəyirəm ki, bu səfər Amerika-Azərbaycan münasibətlərinin müsbət, pozitiv məqamlarda bundan sonra da inkişafına əhəmiyyətli təkan verəcək.

Amma təəssüf ki, Hillari Klintonun Cənubi Qafqaza və Azərbaycana səfəri Ermənistanla Azərbaycanın təmas nöqtələrində bir sıra gərginliklərlə müşayiət olundu və hesab edirəm ki, bunu təsadüfi saymaq olmaz. Yəqin ki, Ermənistan tərəfi və onu himayə edənlər bu gərginliyi yaratmaqla, ən azından provakasiya törətməklə günahı öz ənənələrinə sadiq olaraq Azərbaycan tərəfinin üzərinə yıxmağa çalışırdılar. Və beləliklə də sülhyaratma prosesinə əngəl törətmək istəyirdilər.

Amma hesab edirəm ki, təmas nöqtələrində son zamanlar baş verən gərginliyin həqiqi səbəblərinin, səbəbkarlarının nədən və kimlərdən ibarət olduğu haqqında maraqlı tərəflərdə, o cümlədən, fikrimcə, ABŞ-da kifayət qədər səhih məlumatlar var, Amerikadan gələn reaksiyalar da bunu söyləməyə əsas verir. Hesab edirəm ki, bu, ABŞ-ın Ermənistan-Azərbaycan münaqişəsinin nizama salınmasında yaxından iştirak etmək istəyinin ortaya qoyulması ilə bilavasitə əlaqədardır. Çox güman, hansısa maraqlı dairələr var ki, ABŞ-ın münaqişənin nizama salınmasında yaxından iştirak etməklə bağlı bəyanatlarını qıcıqla qarşılayıblar və Amerikanın bu münaqişənin nizama salınmasında maraqlı bəyanatlarının və bu bəyanatların arxasından gələcək hərəkətlərin qarşısını almaq üçün təxribatlar törədirlər.

Lakin düşünmürəm ki, bu təxribatlar ABŞ-ın münaqişənin nizama salınmasına diqqətinin artmasının qarşısını ala biləcək.

– Ümumiyyətlə, bu səfəröncəsi Azərbaycana qarşı ABŞ başda olmaqla, Qərb dairələri tərəfindən ciddi tənqidlər gəlirdi. Bu baxımdan, bu səfər Azərbaycana yönəlik tənqidləri səngidə, Azərbaycan haqqında obyektiv fikirlərin yaranmasına öz təsirini göstərə bilərmi? Eyni zamanda, bu səfər müddətində atəşkəsin pozulması ABŞ-ın Ermənistana yönəlik siyasətinə hansısa bir dəyişikliklər gətirəcəkmi?

– Mən də elə onu qeyd etmək istəyirəm ki, əgər siz diqqətlə ABŞ-dan səsləndirilən, xüsusilə son vaxtlar səsləndirilən bəyanatları nəzərdən keçirsəniz, bu bəyanatlarda kifayət qədər Azərbaycanın bölgədə, regionda, hətta beynəlxalq aləmdə roluna yüksək qiymət verilir. Digər tərəfdən, Azərbaycanın bölgə proseslərində böyük potensiala malik olduğu da açıq şəkildə vurğulanır və eyni zamanda, bu, təbiidir ki, Azərbaycanla ABŞ arasında münasibətlərin müsbət dinamikasına öz təsirini göstərir.

Amerika tərəfi bunu öz bəyanatlarında, o cümlədən də hesab edirəm ki, Amerika prezidentinin verdiyi bir neçə bəyanatda əks etdirib. O ki qaldı münasibətlərin inkişaf perspektivlərinə, bu barədə kifayət qədər ciddi əsaslar var ki, bu münasibətlər pozitiv məqamda inkişaf etsin. Bu, həm Azərbaycanın, həm bölgə ilə bağlı ABŞ-ın siyasətini həyata keçirməsinə öz müsbət təsirini göstərə bilər. Tənqidlərlə əlaqədar onu qeyd etmək istəyirəm ki, hansı tərəfdən səsləndirilməsindən asılı olmayaraq, Azərbaycan bu tənqidlərə özünün obyektiv münasibətini bildirib. O yerdə ki, Azərbaycanla bağlı səsləndirilən tənqidlərin əsasları var, obyektivliyə, reallığa söykənib, hesab edirəm ki, Azərbaycan o tənqidləri qəbul edir. O yerdə ki, tənqidlər qərəzlidir, qeyri-obyektivdir, hansısa dairələrin maraqlarına istinad edir, belə olan hallarda da mən hesab edirəm ki, Azərbaycan o tənqidlərə qarşı özünün kəskin mövqeyini ortaya qoyur. Xüsusi vurğulamaq istədiyim məqam ondan ibarətdir ki, nəticə etibarilə Azərbaycanı əsassız olaraq, qərəzli şəkildə tənqid edən tərəflər, dairələr və yaxud tutaq ki, hansısa beynəlxalq təşkilatlar nəticə etibarilə Azərbaycanın haqlı iradları ilə razılaşmağa məcbur olur və çünki Azərbaycan səsləndirilən əsassız tənqidlərin qeyri-obyektivliyini, bəzi hallarda isə qərəzli olduğunu faktlarla sübuta yetirə bilir. Ona görə biz haqlı, haqsız, qərəzli tənqidlərin olmasını istəmirik. Amma o şeylər ki, əsassızdır, fakta söykənmir və yaxud qərəzli şəkildə həyata keçirilib, gec-tez onun həqiqi mahiyyəti ortaya qoyulur və bu da Azərbaycanın haqlı olduğunu təsdiq etmiş olur. Bu mənada qeyd etmək istəyirəm ki, Azərbaycan könüllü şəkildə seçdiyi siyasəti Azərbaycan xalqının maraqlarına uyğun şəkildə ardıcıl surətdə həyata keçirir və haqq-ədalət Azərbaycanın tərəfində olduğunu dəfələrlə Azərbaycan sübuta yetirə bilib. Azərbaycana bu gün də bunu sübuta yetirir və güman edirəm ki, biz bundan sonra da haqqın, ədalətin Azərbaycanın tərəfində olduğunu sübuta yetirə biləcəyik.

Kamil HƏMZƏOĞLU

525-ci qəzet.- 2012.- 26 iyun.- S.5.