YAŞAMAQ ASANDIR, XATIRLAMAQ YOX!

Gözlərim ən yaxşı şəkilçəkəndi,

Çəkir, yaddaşına yığır, saxlayır...

Qaytar xatirəni, yad et, çək indi

Yaddaş ağrısından ruhum ağrayır...

Dözürük günləri yaşayan anda,

Ölürük qayıdıb xatırlananda.

BƏRABƏR DEYİL QADIN, KİŞİ

Bərabər deyil qadın, kişi

Hərəsinin öz işi,

öz vərdişi....

fərqlidi oturuşu, duruşu,

baxışı, yerişi.

Yüz iyirmi dörd min

peyğəmbərdən heç biri qadın olmayıb.

Bu ocaqda odun olmayıb,

Heç olmayacaq da!

Qadın evdə işıqdı,

Ailədə ocaqdı.

Müqəddəs anadı adı!

Hüququmuz bərabər deyil,

Ana bütün hüquqlardan yuxarıdadı.

O dən göyərdən,

İnsan yetirəndi.

Qadın peyğəmbər deyil!

O peyğəmbərləri dünyaya gətirəndi!

İÇƏRİ ŞƏHƏR

İçəri şəhər,

ərəb əlifbası kimi

əyri-üyrü küçələr.

Küçədən qaçıb, azıb qalanlar,

Kor-kar dalanlar...

Bir-birinə qısılmış damlar,

Pillə-pillə qır basılmış damlar,

Yayda damların üstündə,

Qışda damların altında

adamlar, adamlar...

Təsbehlər səsləşirdi hər tində,

Şimal küləkləri yorulub təslim olurdu

küçələrin labritində,

“Mən təslim oldum” deyirdi.

Zirvədən asılmış paltarları

Ağ bayraq kimi yelləyirdi.

Bəzi küçələr sahildən

Göyə dirənən nərdivandı.

Bir də gördün göy ağladı,

Küçələr sinəsini açıb

Yağışın altına uzandı...

Hər səhər

Quyular yuxu yozandı.

Hər axşam

Ulduzlar tale yazandı.

Günəş dənizdən doğan azandı,

Hər səhər uçub mənbərə qonur.

Axşam azan səsi

Günəş olub öz yatağına dönür.

İçəri şəhərin başına dolanır

zaman, ömür...

əvvəli, sonu görünmür.

Xəzərin ilk sonası

İçəri şəhər.

Böyük Bakının

Həvva anası

İçəri şəhər.

ÖLÜ DƏNİZ

Sənə ölü dəniz deyənlərin

Başına gün vurub

Sarsaqlayıblar.

Dəniz ölü ola bilməz!

Bu dənizi duza qoyub

Gələcək üçün saxlayıblar.

SƏNSƏN

Sənsiz yaşayaram, sənsiz ölmərəm,

Sənsiz ağlamaram, sənsiz gülmərəm.

Sənsiz bu dünyanı dünya bilmərəm

Dünya məhəbbətdi, sevgidi, sənsən.

Quşlar sənin üçün gəlir hər bahar,

Güllər səni görüb gülür hər bahar.

Bulaqlar bilir ki, səni sevən var

Küləklər bilir ki, tez-tez küsənsən.

Ömrümə işıqdır qara gözlərin,

Ruhumu titrədir şirin sözlərin.

Yaraşığı sənsən gülər üzlərin,

Bağlarda qərənfil, nərgiz, süsənsən.

Baxtım, varım-yoxum, qismətim mənim,

Hökmüm, ərkim, canım, ismətim mənim.

Səndədir hər sözüm, söhbətim mənim

Sən mənim sözümü tez-tez kəsənsən.

MƏN OLACAQDIM

Günəbaxan kimi mən sənə baxdım,

Ulduzam şığıdım qoynuna axdım.

Hansı səyyarədə doğulsa idin

Onu kəşf eləyən mən olacaqdım.

Fikrət QOCA

525-ci qəzet.- 2012.- 2 mart.- S.7.