Vüqar Əhmədov: “Azərbaycan əcnəbi tələbələr üçün kifayət qədər perspektivli ölkədir”

“Azərbaycan-Amerika Gəncləri” İctimai Birliyinin rəhbəri Vüqar Əhmədovun Gün.Az-a müsahibəsi:

- Siz həm Azərbaycan, həm də əcnəbi gənclərlə daim təmasda olursunuz. Sizcə xaricdən Azərbaycana təhsil almaq üçün gələn gənclər hansı səbəblərə görə ölkəmizi seçirlər?

- Şübhəsiz ki, son dövrlər Azərbaycanda daha çox əcnəbi tələbələrə və gənclərə rast gəlirik. Bu da ölkəmizə olan marağın artmasından xəbər verir. 10 il bundan əvvəl Bakıda beynəlxalq tədbirlər keçirilərkən xaricdən olan iştirakçıları ölkəmizə dəvət etmək çətin idi. Çünki Azərbaycan haqqında çox az məlumat eşitmişdilər. Şübhəsiz ki, təhlükəsizlik və sabitlik məsələsi də onlar üçün önəmlidir.

Lakin son dövrlər Azərbaycanın xaricdə təbliği, daha çox mədəni, sosial və humanitar layihələrdə gənclərin iştirakı ölkəmizi müsbət yöndən tanıdıb. Onlar internet vasitəsilə araşdırıb əmin olurlar ki, Azərbaycanda digər millətlərə qarşı yüksək tolerantlıq var, digər ölkələrdəki kimi milliyyətçilərlə qarşıdurmalar mövcud deyil. Bundan başqa Azərbaycanda neft mühəndisliyi, menecerlik, diplomatik sahə üzrə müasir və ən qabaqcıl standartlara uyğun təhsil müəssisələri açılır ki, bu, əcnəbi, xüsusən müsəlman ölkələri və Asiya ölkələrindən, hətta Avropa və ABŞ-dan bir sıra tələbələrin diqqətini cəlb edir.

Ümumiyyətlə, tələbələrin xaricdə təhsil seçimi zamanı universitetlə yanaşı, ölkənin də böyük rolu var. Bu gün dünyada gedən tendensiya ondan ibarətdir ki, ənənəvi qərb ölkələri ilə yanaşı, xaricdə təhsil almaq üçün yeni ölkələrə maraq artmaqdadır. Azərbaycanda təhsil almaqla yanaşı, bir çox tələbə tədqiqatçılar da gəlir və bu maraq ölkəmizin tarixi geostrateji önəmindən irəli gəlir. Bundan belə nəticəyə gəlmək olar ki, elmə və təhsilə qoyulan investisiya, yeni müasir dünya tələblərinə uyğun yeni təhsil müəssisələrinin açılması və xarici universitetlərin müəllimlərinin tədrisi ölkəmizi xarici tələbələr üçün daha cəlbedici edib.

- Bəs əcnəbi gənclər Azərbaycanda daha çox hansı problemlərlə rastlaşırlar?

- Düşünürəm ki, onların cəmiyyətimizin sosial həyatına daha çox inteqrasiya etməsi həm onların özləri, həm də cəmiyyətimiz üçün faydalı olar. Bu mənada əsas maneə onların bizim cəmiyyətə inteqrasiyası, ictimai fəaliyyətinin artırılmasıdır. Bu onların potensialından, təcrübəsindən istifadə olunması, eyni zamanda onların Azərbaycanın mədəniyyətini, adət-ənənəsini daha dərindən tanımaları baxımından çox əhəmiyyətli ola bilər. Çünki hər bir xaricdə təhsil alan tələbə qeyri-ixtiyari olaraq təhsil aldığı ölkənin mədəni səfirinə çevrilir və onun müsbət təəssüratları və fikirləri ölkəmizin müsbət təbliğ olunması baxımından xüsusi önəm kəsb edir.

Bu qənaətə gəlmək olar ki, Azərbaycanda təhsil alan əcnəbi tələbələr ciddi problemlərlə rastlaşmırlar. Yalnız onlar üçün Azərbaycan dili kursları, daha çox mədəni proqramların təşkili, eyni zamanda onların təşkilatlanması və sosial fəaliyyəti üçün mərkəzlərin yaradılması müsbət addım hesab oluna bilər.

Eyni zamanda xarici ölkələrin təcrübəsindən çıxış edərək əcnəbi tələbələr üçün təhsillə bağlı xüsusi güzəştlərin, təqaüdlərin təsis olunması, xüsusi yataqxanaların tikilməsi, onların qeydiyyatı və sənədləşmə prosedurlarının asanlaşdırılması çox yaxşı olardı.

- Xarici tələbələrin təhsillərini başa vurduqdan sonra Azərbaycanda qalıb işləmələri üçün perspektiv varmı?

- Bu gün Azərbaycanda bir çox şirkət iş yerləri təklif edir. Əgər nəzərə alsaq ki, əcnəbi tələbələr təhsil almaq üçün nisbətən daha yaxşı təhsil müəssisələrini seçirlər, onda belə qənaətə gəlmək olar ki, onların Azərbaycanda iş tapması elə də ciddi bir problem deyil. Üstəlik əgər onlar bir neçə dil və yüksək standartlara uyğun bir peşəkar mütəxəssis kimi yetişirlərsə, onların Azərbaycanda işləməsi imkanları çox genişdir.

Bu gün ölkəmizə maraq artdığından çox sayda miqrantların, Asiya ölkələrindən işçi ordusunun və qonşu ölkələrdən iş adamlarının ölkəmizə axınını müşahidə edə bilərik. Hətta hazırda Avropada böhran və işsizliyin səviyyəsi artdığından böyük iqtisadi artıma malik və peşəkar mütəxəssislərə ehtiyac duyan Azərbaycana qərb ölkələri vətəndaşları tərəfindən də böyük maraq var.

Bu baxımdan mən Azərbaycanda əcnəbi tələbələr üçün iş baxımından kifayət qədər perspektiv görürəm. Xüsusən nəzərə alsaq ki, bu gün ölkədə böyük otellərin və digər xidmət sahələrinin menecerləri əcnəbilərdir. Amma təbii ki, onların Azərbaycanda qalma səbəbləri də müxtəlif ola bilər.

Pərvanə

525-ci qəzet.- 2012.- 18 oktyabr.- S.5.