Gənc şair dostuma açıq məktub

Hörmətli Heydər Ələddinoğlu, şeirlərini diqqətlə oxudum. Sən şairsən, ona görə mənə şair dilində, şeirlə cavab yazıram. Özün başa düşərsən.

Dərdin çoxdu, çək azalsın,

Dərd üstünə dərd yükləmə.

Namərdlər dərd çəkən deyil,

Mərd üstünə dərd yükləmə.

Torpaq qara, səma bəyaz,

Nə “daş axtar”, nə “qəbir qaz”.

Sən rəngləri qarışdır yaz!

Şeirini yaz. Dərin-dayaz!

Yeri! Yüyür! İməkləmə!

Heydər ƏLƏDDİNOĞLU

Kül olsun dünyanın yekə başına!

Məni hədələyir bu azğın dünya,

Gözümdən süzülən yaşı da görmür.

Mən əzab elmini elə bilirəm

Ayağım biləni başı da bilmir.

Dərd-qəmi sinəmdə elə yatır ki,

Zəhəri şərbətə elə qatır ki,

Həsrət sapandıyla elə atır ki

Tökülür başıma daşı da bilmir.

Baxıb utanmayır ahıl yaşına,

Nə gəldi eləyir elə huşuna,

Kül olsun dünyanın yekə başına!

Bir şair oğlunu yaşada bilmir!..

Qəbrimə Yer boyda daş bəsləyirəm

İçdiyim kədərdir, yediyim əzab

İsti ürəyimdə qış bəsləyirəm.

Yıxılmış yurd-yuvam boş qalmamaqçın

Birtəhər bədəndə baş bəsləyirəm.

Fələkdir puç olmuş günləri sayan

Qoruyan mələksən, sən nəsən dayan!

Vüsalı dadmamış qırxa çatmayan

Ölümçün şərəfli yaş bəsləyirəm.

Uçar üstünüzə çəkilin, qaçın!

Torpağın qan olmuş ağzını açın,

Bir də bu dünyaya qayıtmamaqçın

Qəbrimə Yer boyda daş bəsləyirəm!..

Fikrət Qoca

525 -ci qəzet.- 2012.- 24 oktyabr.- S.7