Ağalar Bayramov – sözü ruzi-bərəkət rəmzi kimi daşıyan sənətkar

Tanınmış bədii qiraət ustası Ağalar Bayramov poeziyanı şeirə ruhunu qataraq sevənlərdəndir. Onun səsindəki bənzərsiz ahəng, emosiya ən zəif şeirə belə ruh və həyat bəxş etmək gücünə qadirdir. Mən də poeziyanı, şeiri dinləyərək sevənlərdənəm. Yüzlərlə tamaşaçı kimi onun səsini, ya mavi ekrandan, ya da radio dalğalarından dinləmişəm hər zaman. Bu yaxınlarda isə unudulmaz şairimiz Şahmar Əkbərzadənin 70 illik yubiley tədbirində mən onun canlı ifasını eşitmək şərəfinə nail oldum. Şairin “48 ölçülü qadın paltarı” şeirini səsləndirdi Ağalar Bayramov. Həmin şeiri dəfələrlə oxumağıma baxmayaraq, ordakı misraları Ağalar Bayramov kimi ruhuma yaya bilməmişdim. Mən şeir kimi oxuyub keçmişdim, amma Ağalar Bayramov öz səsində “48 ölçülü qadın paltarı”nı təsirli bir filmə çevirdi. Sözün gücü ilə səsin gücünun qovuşduğu həmin an ətrafımdakı insanlara bir nəzər saldım. Göz yaşlarının yanaqlarından necə süzüldüyünün fərqində olmadan hamının o səsə kilidləndiyini gördüm. O səs insanları poeziyanın zirvəsinə qaldırmışdı.

Şeirin yazılması qədər onun təbliği də çox mühümdür. Ağalar Bayramov bu mühüm vəzifəni yerinə yetirən, sözün dəyərinin artırılmasına xidmət edən bir insandır. Şeir yazmaq kimi yaddaşla səs də Allah vergisidi, ancaq bədii qiraət sənəti ilə məşğul olmaq üçün yalnız ahəngdar səs, yaddaş yetərli deyil. Bu sahədə gərək ifa məharəti də olsun. Çünki qiraətçi şeiri səsləndirərkən, həm vəsf edənin, həm vəsf olunanın, həm də özünün obrazını yaratmalıdır. Ağalar Bayramov bu baxımdan həm də istedadlı bir ifaçıdır – əsl aktyordur. Buna baxmayaraq, biz onu teatr səhnəsində, təəssüf ki, görə bilmirik. “Mənim üçün müsbət qəhrəman obrazları, nadanlığa, cəhalətə, savadsızlığa, qeyri-insani hərəkətlərə qarşı üsyan edən obrazlar var ki, onları çox sevirəm. Onların həsrətini çəkmişəm” – deyən sənətkarın teatr səhnəsində yaratmaq istədiyi belə müsbət xarakterlərdən biri də Kefli İsgəndərdir.

Amma Ağalar Bayramov artıq neçə illərdir ki, bütün müsbət obrazları öz ruhunda birləşdirərək bizə onları yalnız poeziya nümunələrinin ifası vasitəsilə çatdırır.

Şeiri tamaşaçıya sevdirmək, insanlarda həmin şeiri yenidən eşitmək arzusu yaratmaq bir bədii qiraət ustası üçün çox mühümdür. Səsinin sehri ilə Ağalar Bayramov bunun öhdəsindən müvəffəqiyyətlə gəlir. Təpədən dırnağa poeziya ruhu daşıyan Ağalar Bayramov 30 ilə yaxındır ki, bədii qiraətlə məşğuldur. Özünün də dediyi kimi, “bədii qiraətçi daxilən boğazdanyuxarı danışırsa, ürəyi yoxdursa, onda bu sənətin yolçusu olmaq alınmayacaq. Çünki bu sənət həm də ürəyi sevir”. Onun səsi təkcə sevgi, məhəbbət qığılcımları saçmır, həm də vətənə sevgi toxumları səpir, qələbəyə inam şövqü alovlandırır qəlblərdə. Onun ifasında Əjdər Olun “Kim nə deyir, qoy desin, Səni sevib-seçmişəm” misraları sevginin nə qədər ülvi olduğunu bəyan edirsə, Məmməd Arazın “Azərbaycan – dünyam mənim”, “Ayağa dur, Azərbaycan!” şeirləri də bir o qədər vətən sevgisini insanın ruhuna toxuyur. Vətənə sevgi, qələbəyə inam onun təkcə dilində yox, həm də ürəyindədir.

“Mənim üçün ən qiymətli mükafat təmənnasız ülfətdir. Ürəkdən gələn, məhəbbətlə, sevgiylə dolu söz mənə verilən ən böyük dəyərdir” – deyən əməkdar artist bu günlərdə növbəti doğum gününü qeyd edib. Ağalar müəllimin bu sözlərini nəzərə alıb düşündüm ki, səmimi bir insan, sənətkar üçün səmimi qəlbdən gələn xoş kəlmələrdən dəyərli heç nə ola bilməz. Elə bu fikirlə də onu sevən dostların, insanların onun haqqında olan düşüncələrini bir doğum günü hədiyyəsi kimi həm dəyərli sənətkarımızın özünün, həm də oxucularımızın, poeziyasevərlərin, bədii qiraət vurğunlarının diqqətinə çatdırırıq.

Xalq şairi Fikrət Qoca: “Ağalar Bayramov bu sənətin doğma övladıdı. O, böyük sənətkarların layiqli davamçısıdı. Ağalar ürəyəyatımlı səsindən ustalıqla istifadə edir. Dinləyicisini, tamaşaçısını tez tanıyır, ona münasib şeir seçir. Ağalar Bayramovun çıxışına qulaq asmağa öz gündəlik məişət qayğıları ilə gələn tamaşaçı görüşdən dövlət, millət qayğıları ilə ayrılır”.

Şair Musa Yaqub: “Ağalar şeir deyəndə könlümüz ehtizaza gəlir, onun dilində, onun ifasında elə bil sözümüz də təzədən doğulur. Ağalar şair duyğularının sədasına təzə bir sim qoşur. Sözə təzə bədii rəng vurur. Belə bir sənətçini saxlamaq, qorumaq, qiymətləndirmək bizim mənəvi borcumuzdu”.

Şair Əjdər Ol: “Ağalar Bayramov hər zaman öz üzərində işləyən bir sənətkardır. Ümumiyyətlə, bütün istedadlı insanlar çalışqan olurlar, öz üzərlərində işləməyi sevirlər və heç nəyi diqqətdən yayındırmırlar. Ağalarda ən çox xoşuma gələn cəhətlərdən biri odur ki, o böyüklüyündən, kiçikliyindən asılı olmayaraq, bütün tədbirlərdə ürəklə iştirak edir və tədbirlərə çox hazırlıqlı gəlir. Onun deməyə hər zaman sözü olur və o sözləri hər zaman yüksək ruhla, müsbət enerjiylə insanlara çatdırır. Ağaları ona görə də çox sevirlər. Onu elə belə sevimirlər. Sevilib sevmək üçün gərək zəhmət verəsən. Çünki xalqa heç nəyi zorla sevdirmək olmaz. Ağalar istər klassiklərdən, istərsə də müasirlərdən bəhrələnən və Azərbaycan poeziyasını insanlarımıza sevdirən bir sənətkardır. Hər bir insan Azərbaycan poeziyasını sevdirmək hökmündə ola bilməz. Ağalara Allah səs verib, enerji, bitməz poeziya eşqi verib. Belə sənətkarlar da həmişə xalq tərəfindən sevilir. Kim ki, köhnə ehtiyatlarından istifadə eliyərək həmişə sənətini davam etdirmək, səhnələrdə, tribunalarda qalmağı sevir gec- tez insanları bezdirir. Səhnə yeniliyi, təzələnməyi sevir. Ağalar da hər gün dəyişən, inkişaf eləyən, özünü hər zaman formada saxlayan sənətkardır. O, gənc şairlərin də şeirlərinə müraciət edir, onların şeirlərinə də repertuarında yer verir. Bu da onu sübut edir ki, Ağalar həddindən artıq diqqətli insandır, həssas sənətkardır”.

Şair Ədalət Əsgəroğlu: “Ağalar Bayramov bizim ədəbiyyatımızın fəal təbliğatçısıdır. Mən deyərdim ki, Ağalar ədəbiyyat bilicisi, söz sərrafıdır. Ağalar Bayramov hər zaman biz şairlərin sırasındadır. Biz bilirik ki, bu gün ədəbiyyatın təbliği yolunda boşluqlar var. Bu boşluqların yarısını Ağalar Bayramov öz yaradıcılığı, ifaçılığı ilə doldurmağa müvəffəq olur. Biz Ağalar Bayramovla dəfələrlə səfərlərdə olmuşuq. Mən onu auditoriyalarda necə çılğın, emosional görmüşəmsə, elə səfərlərdə də o xarakterdə görmüşəm. Deməli, o, səmimi insandır. Ağalar Bayramov sözü ruzi-bərəkət rəmzi kimi yaşadan sənətkarlarımızdandır”.

Şair Səlim Babullaoğlu: “Ağalar Bayramov özünəməxsus sənətkarlığı olan bədii qiraət ustasıdı. Onu təkcə səsi yox, ifa tərzi, şeirə yanaşması, qiraətindəki təbiilik, səmimilik və şirinlik fərqləndirir. Vətənpərvərlik mövzusunda, milli ruhda olan şeirləri səsləndirən zaman isə onun ifasında həm əzəmətli, həm də yanıqlı məqamlar duyulur. Ağalar Bayramovun təqdimatında Məmməd Arazın və Əjdər Olun şeirlərinin səslənməsini xüsusilə bəyənirəm”.

Sevimli, dəyərli sənətkarımızı doğum günü münasibətilə, “525-ci qəzet” olaraq, biz də təbrik edir, ona cansağlığı, yeni yaradıcılıq nailiyyətləri arzulayırıq.

Günel CABİRQIZI

525-ci qəzet.- 2012.- 17 yanvar.- S.7.