Aysel Əlizadənin “Erkəklər” kitabı çapdan çıxıb

KİTABI BAKI ŞƏHƏRİNDƏKİ “ƏLİ VƏ NİNO” KİTAB MAĞAZALARINDAN ƏLDƏ ETMƏK OLAR

İstedadlı yazar Aysel Əlizadənin bugünlərdə işıq üzü görən “Erkəklər” kitabı müəllifin yaradıcılığının növbəti uğurlu təqdimatıdır. Özünün sayca üçüncü kitabı olan “Erkəklər”də A.Əlizadə çağdaş dünya insanının üz-üzə qaldığı bir çox ciddi məsələlərə, adətən, açılıb-bölüşülməsi çətin görünən mənəvi problemlərə toxunur. Kitabda bu problemlərin insan həyatında buraxdığı dərin izlər iki qəhrəmanın – yazıçı kişi ilə həkim qadının dialoqları ilə, konkret detallarla əks olunur. Klassik qadın-kişi münasibətlərinə fərqli baxış, xəyanətin insan həyatında ağrılı, silinməz izlər qoyması, çox zaman taleləri alt-üst etməsi kimi psixoloji məqamlar əsərdə qabarıq ştrixlərlə verilib. Müasir dünyadakı çeşidli proseslərin yaratdığı sosial-mənəvi sıxıntıların birbaşa insanın həyatına nüfuz etməsi, onu mürəkkəb situasiyalarla üzləşdirərək, daxili aləminə öz mənfi təsirini göstərməsi kitabda səmimi bir dillə ifadə edilib. Psixoloji təlatümlər yaşayan bir insanın taleyi, yaşamla bağlı düşüncələri “Erkəklər” əsərində dəqiq cizgilərlə qələmə alınıb. Kitab oxucuya həm də həyat barədə fərqli düşüncə tərzinə malik qəhrəmanın, amansız sınaqlar qarşısında tək qalsa belə, əyilib-sınmaması kimi nikbin bir təəssürat bağışlayır.

Qeyd edək ki, “Erkəklər” kitabı artıq satışdadır. Kitabı Bakı şəhərindəki “Əli və Nino” kitab mağazalarından əldə etmək olar.

525-ci qəzet.- 2012.- 20 yanvar.- S.28.