Professor Cahangir Məmmədlinin 70 yaşı qeyd olunub

BAKI DÖVLƏT UNİVERSİTETİNDƏ KEÇİRİLƏN YUBİLEY MƏRASİMİ HƏM DƏ PROFESSORUN ELMİ-PEDAQOJİ FƏALİYYƏTİNİN 45 İLLİYİNƏ HƏSR EDİLİB

Dünən Bakı Dövlət Universitetində (BDU) universitetin kafedra müdiri, İctimai Televiziya və Radio Yayım Şurasının sədri, professor Cahangir Məmmədlinin anadan olmasının 70, elmi-pedaqoji fəaliyyətinin 45 illiyi münasibətilə tədbir keçirilib.

Cahangir Məmmədlini Azərbaycan milli jurnalistika elmi məktəbinin görkəmli nümayəndəsi, ali jurnalistika təhsilinin təşkilatçısı, görkəmli elm, təhsil və mədəniyyət xadimi kimi xarakterizə edən Abel Məhərrəmov deyib ki, professor uzun illər boyu elmin və təhsilin tərəqqisinə çalışıb, onun milli koloritlərini zənginləşdirərək beynəlxalq nüfuzunu yüksəldib, xalqımızın adını daim uca tutub. Rektorun sözlərindən məlum olub ki, C.Məmmədlinin səmərəli elmi-pedaqoji və ictimai-mədəni fəaliyyəti həm Azərbaycanda, həm də xarici ölkələrdə geniş şöhrət qazanıb. Rektor əlavə edib ki, 45 ildən artıq ki, mətbuat tarixi, jurnalistikanın nəzəriyyəsi və təcrübəsi problemləri ilə məşğul olmuş, jurnalistika məsələlərinə dair sanballı tədqiqat əsərlərinin, çoxsaylı məqalələrin müəllifi kimi tanınmış Cahangir müəllim müasir Azərbaycan peşəkar jurnalistikası konsepsiyasının əsaslarının formalaşdırılmasında, bununla da bu elmin inkişafında və böyük bir jurnalistlər nəslinin yetişməsində müstəsna xidmətlər göstərib. Rektor deyib ki, Cahangir Məmmədlinin vətən və cəmiyyət, elm, mədəniyyət və təhsilin inkişafındakı böyük xidmətləri universitet kollektivində nüfuzunuzu yüksəldib, həm də hər zaman dövlətimizin diqqətində olub.

Jurnalistika fakültəsinin dekanı, professor Yalçın Əlizadə də yubilyarın fəaliyyətini yüksək dəyərləndirib. Qeyd edib ki, Cahangir Məmmədli böyük mütəxəssis, həyatını jurnalistika fakültəsinə, ümumən universitetə bağlayan böyük alim, müəllim, tanınmış ictimai xadimdir.

Ona göstərilən diqqət və qayğıdan məmnun olduğunu söyləyən Cahangir Məmmədli təbiət etibarilə kövrək insan olduğunu və bu günün onun yaddaşında silinməz xoş izlər qoyacağını deyib. Fəaliyyətinin ən qaynar mərhələlərindən birinin Abel Məhərrəmovun rektorluq dövrünə təsadüf etdiyinin deyən professor onun universitet ziyalılarına diqqət və qayğısından, onların yubileylərinin davamlı şəkildə keçirməsindən danışıb, bildirib ki, işlərinin çoxluğuna baxmayaraq, rektorun bu münasibətinin kökündə onlara olan məhəbbət, hörmət, istək dayanır. Akademik Abel Məhərrəmov sonda bildirib ki, Cahangir Məmmədli kimi ziyalıların varlığı Bakı Dövlət Universitetinin nüfuzunu yüksəltməklə bərabər gənc nəsildə məsuliyyət hissini bir qədər də artırır, onlarda vətənə və xalqa sədaqətlə təmənnasız xidmət etmək hisslərini inkişaf etdirir.

S.QARAYEVA

525-ci qəzet.- 2012.- 26 yanvar.- S.4.