Bakıda Qara Qarayev adına V Beynəlxalq Müasir Musiqi festivalı keçirilir

Aprelin 14-də Azərbaycan Mədəniyyət və Turizm Nazirliyinin təşkilatçılığı ilə keçirilən Qara Qarayev adına V Beynəlxalq müasir musiqi festivalı başlamışdır.

AzərTAc xəbər verir ki, Müslüm Maqomayev adına Azərbaycan Dövlət Filarmoniyasında festivalın təntənəli açılış mərasimi olmuşdur.

Mərasimdən əvvəl iştirakçılar filarmoniyanın foyesində Azərbaycan Musiqi Mədəniyyəti Dövlət Muzeyi və M.F.Axundzadə adına Azərbaycan Milli Kitabxanası tərəfindən Qara Qarayevə həsr edilən foto və kitab sərgiləri ilə tanış olmuşlar.

Açılış mərasimində çıxış edən mədəniyyət və turizm nazirinin müavini Ədalət Vəliyev Qara Qarayevin 95 illiyinə həsr olunmuş festivalın iştirakçılarını salamlayaraq demişdir: "2013-cü il "Mədəniyyət ili" kimi qeyd olunmalıdır. Ona görə ki, cari ildə xarici ölkələrdə Azərbaycan mədəniyyət günlərinin keçirilməsi, "Muğam aləmi" III Beynəlxalq muğam festivalının reallaşması, ulu öndər Heydər Əliyevin 90 illik yubileyi ilə əlaqədar təşkil olunmuş silsilə tədbirlər, həmçinin cari ildə keçiriləcək Qəbələ Beynəlxalq musiqi festivalı, Üzeyir Hacıbəyli Beynəlxalq musiqi festivalı, Beynəlxalq caz festivalı, eləcə də görkəmli incəsənət xadimlərinin və musiqiçilərin yubiley və xatirə gecələri bunu deməyə əsas verir".

Nazir müavini vurğulamışdır ki, bunlarla yanaşı, 2013-cü ilin ən önəmli hadisələrindən biri də görkəmli bəstəkar və pedaqoq, SSRİ xalq artisti Qara Qarayevin 95 illik yubileyidir. Bu münasibətlə həm ölkədə, həm də xaricdə silsilə tədbirlər keçirilir. Bu tədbirlərin sırasında Qara Qarayev adına V Beynəlxalq müasir musiqi festivalını xüsusi qeyd etmək lazımdır.

Diqqətə çatdırılmışdır ki, Qara Qarayev musiqinin bütün janrlarında əsərlər yaratmışdır. Bunlardan "Vətən" operası, "İldırımlı yollarla", "Yeddi gözəl" baletləri, "Leyli və Məcnun" simfonik poeması dahi bəstəkara dünya musiqi sənətində özünəməxsus şöhrət gətirmişdir.

Bildirilmişdir ki, Qara Qarayev dahi bəstəkar olmaqla yanaşı, həm də yaxşı pedaqoq idi. Arif Məlikov, Vasif Adıgözəlov, Fərəc Qarayev, Azər Dadaşov, Xəyyam Mirzəzadə, Firəngiz Əlizadə, Polad Bülbüloğlu və digər tanınmış bəstəkarlar Qarayev bəstəkarlıq məktəbinin yetirmələridir.

Qeyd olunmuşdur ki, yalnız müasir musiqinin səsləndiriləcəyi festivalın rəngarəng və maraqlı proqramı dinləyicilərə yüksək incəsənətlə yaxından ünsiyyət imkanı yaradacaqdır. Festivalda Azərbaycan, Almaniya, Avstriya, Fransa, Hollandiya və Rusiya müasir musiqini mükəmməl ifa edən solist və kollektivlərlə təmsil olunacaq.

Konsertlərin proqramında XX əsr musiqi təfəkkürünün inkişafında yeni yollar açmış Avropanın tanınmış bəstəkarlarının əsərləri səsləndiriləcəkdir.

Diqqətə çatdırılmışdır ki, festival çərçivəsində Muzey Mərkəzində Azərbaycan Bəstəkarlar İttifaqı və Üzeyir Hacıbəyli adına Bakı Musiqi Akademiyası tərəfindən müasir musiqinin problemlərinə həsr olunmuş elmi konfrans, Beynəlxalq Muğam Mərkəzində, Rəşid Behbudov adına Azərbaycan Dövlət Mahnı Teatrında, Müslüm Maqomayev adına Azərbaycan Dövlət Filarmoniyasında və filarmoniyanın kamera və orqan musiqisi zalında xarici və yerli musiqiçilərin, musiqi kollektivlərinin ifasında konsertlər keçiriləcəkdir.

Festivalın başqa bir orijinal layihəsi Azərbaycan Dövlət Gənc Tamaşaçılar Teatrının səhnəsində ekstravaqant klassiklərdən biri Mauricio Kagelin musiqisi əsasında "Variete" tamaşasının nümayişi olacaqdır. Əsər alman-ispan mənşəli "Avatara Dance Group" və Azərbaycandan "Con Tempo" ansamblı tərəfindən ifa ediləcəkdir.

Festivalın bədii rəhbəri əməkdar incəsənət xadimi, professor Fərəc Qarayevdir.

Açılış mərasimində xalq artisti, dirijor Rauf Abdullayevin rəhbərliyi altında Üzeyir Hacıbəyli adına Azərbaycan Dövlət Simfonik Orkestri çıxış etmişdir.

Konsert proqramında Dmitri Şostakoviçin, Qara Qarayevin, Fərəc Qarayevin, Xəyyam Mirzəzadənin və Ottorino Respiginin əsərləri səsləndirilmişdir.

Qara Qarayev adına V Beynəlxalq müasir musiqi festivalı aprelin 19-dək davam edəcək.

Günel

525-ci qəzet.- 2013.- 16 aprel.- S.7.