Sənətə məhəbbətlə

(Ramiz Əzizbəyli-65)

Bu gün respublikanın Xalq artisti Ramiz Əzizbəylinin 65 yaşı tamam olur.Çox nadir xüsusiyyətə malik olan fitri, parlaq istedadı, eyni zamanda ən gənc yaşlarından yazıb-yaratmaq həvəsi onu tez bir zamanda xalqımızın sevimlisinə çevirdi.

Ramiz Əzizbəylinin səhnəyə ilk gəlişi 9 yaşında uşaq televiziya verilişlərində Buratino ilə olub. Həmin gün onun bəxt ulduzu böyük bir parıltı əmələ gətirdi və indiyə qədər də öz parıltısını itirməyib.

Var sənət üçün yarananlar, bir də var sonradan sənəti sevib seçənlər. Ramiz Əzizbəyli sənət üçün yaranıb. O həyata istedadı ilə, bacarığı ilə birgə bəxş olunub. Allah ona o qədər enerji, o qədər yaşayıb-yaratmaq həvəsi verib ki, sanki bu enerji heç vaxt tükənməyəcək. Yaş üstə yaş gəldikcə bu həvəs, bu imkan daha da artır, püxtələşir.

Ramiz Əzizbəylinin yaradıcılığı çoxşaxəlidir, genişdir, onun yaradıcılığı bir dəryadır. O, istedadlı aktyordur, həm komik, həm də tragik rolların gözəl ifaçısıdır. ?stedadl? kinorejissordur. Çəkdiyi “Bəxt üzüyü”, “Pirverdinin xoruzu”, “Yalan” filmləri geniş tamaşaçı rəğbəti qazanıb, o filmlərə baxdıqca doymaq olmur. Çoxu bilmir ki, onun necə rəssamlıq qabiliyyəti var. Hələ şeirləri, qəzəlləri, mənsur hekayələri.... Yazıçılar Birliyinin üzvüdür, iki kitabı çap olunub. Eyni zamanda həddindən artıq məlahətli, ürəyəyatan xoş səsi var.

O, həm də maraqlı həmsöhbətdir. Onunla bir dəfə ünsiyyətdə olan şəxs, daim onun əhatəsində olmağa çalışır, duzlu, məzəli, ən çox da mənalı söhbətlərini dinləmək istəyir. Daxilindəki sənət eşqi o qədər aşıb-daşır ki, ətrafdakılar sanki onun sehrinə düşürlər.

Ramiz Əzizbəylinin dünyagörüşü, intellekt səviyyəsi, savad dairəsi olduqca zəngindir. Odur ki, onunla ünsiyyətdə olmaq, bir masa arxasında oturmaq, eyni məclisdə iştirak etmək hamıya zövq verir.

İlk addımlarını Həmkarlar İttifaqlarının Mədəniyyət Sarayında atan Ramiz Əzizbəyli indi də həmkarlar ittifaqları ilə sıx əlaqədədir, AHİKin tədbirlərinin fəal iştirakçısıdır. O, öz təcrübəsini həmkarlar ittifaqlarının klub müəssisələrində fəaliyyət göstərən xalq teatrının gənc aktyorları, dərnək rəhbərləri ilə bölüşür. Gərgin iş qrafikinə baxmayaraq, o, dəfələrlə həmkarlar ittifaqlarının mədəniyyət ocaqlarında keçirilən mədəni-kütləvi tədbirlərin rejissoru, aparıcısı olub, AHİk-in hamiliyə götürdüyü U.Naxçıvanski adına hərbi liseydə keçirilən müsabiqələrdə münsiflər heyətinin sədri kimi vətənpərvər gənclərə dəyərli məsləhətlər verib.

Artıq neçə illərdir ki, Ramiz Əzizbəyli Azərbaycan Dövlət Mədəniyyət və İncəsənət Universitetində dərs deyir, estrada və musiqili teatr rejissorluğu kafedrasının müdirdir, professordur. O, bütün enercisini, biliyini, qəlbinin hərarətini gənclərə həsr edir. Ramiz müəllim gənclərin estetik tərbiyəsi ilə məşğul olur, onları teatr sənətinin sirləri ilə tanış edir, onlarda teatr sənətinə məhəbbət oyadır. Gələcəkdə bu gənclərin hamısı teatr səhnəsində çalışmasalar da, onlar mənəvi cəhətdən zənginləşirlər.

O, ailəsində qayğıkeş ata, mehriban baba, sədaqətli ailə başçısı, dostları üçün əsl dost, təvazökar insan olmaqla bərabər həm də azəri xalqının istedadlı oğludur. Onun yaratdığı hər obraz, çəkdiyi filmlər, şeirlər, yetişdirdiyi tələbələr, sevə-sevə gördüyü bütün işlər – Azərbaycan xalqına verdiyi böyük töhfədir. Ramiz Əzizbəyli incəsənət və mədəniyyət tariximizdə öz izini qoyan sənətkarlardandır.

65 yaşını qeyd edən Ramiz Əzizbəylinin həqiqətən yaşadığı həyatı ilə fəxr etməyə haqqı var. Çünki o, insanların qəlbinə yol taparaq, onların sevimlisinə çevril? bilib. İndi ölkə həyatının başqa sahələrində olduğu kimi mədəniyyət və incəsənət qarşısında da geniş üfüqlər açılıb. Əminik ki, bu istiqamətdə o, yenə də qüvvə və bacarığını əsirgəməyəcək, hər zaman ön sıralarda olacaq.

Həyatının bu şərəfli ad günündə onu Azərbaycan Həmkarlar İttifaqları Konfederasiyası adından yaxın dostları, tanışları, bütün Ramizsevərlər adından təbrik edir, ona can sağlığı və yaradıcılıq uğurları arzu edirik.

Tanrıdan arzu edək ki, daha uzun illər qisməti olsun. Xalqımızın, millətimizin sənətkarına olan sevgisi heç vaxt solmasın. Və bu yazını Ramiz Əzizbəylinin ürəyindən gələn misraları ilə bitirmək istəyirəm.

“Məni bu dünyada yaşadan əlbət,

Eşqdir, Vətəndir, bir də ki sənət!”

Xoşqədəm Bağırova

Azərbaycan Həmkarlar İttifaqları

Konfederasiyasının mütəxəssisi

Təbrikə qoşulurlar:

Məhərrəm Bədirzadə, İbrahim Əliyev, Mina Bayramova, Firəngiz Cəfərova, Babakişi Məmmədov, İlham Namiq Kamal, Məmməd Mahmudov, Qəmər Məmmədova, Məhəmmədəli Abdullayev, Nazim Bəykişiyev.

525-ci qəzet.- 2013.- 20 iyul.- S.25.