Qəbələdə III Beynəlxalq İncəsənət Sərgisi açılıb

Ümummilli lider Heydər Əliyevin anadan olmasının 90 illik yubileyinə həsr edilmiş Qəbələ III Beynəlxalq incəsənət sərgisi açılıb.

SalamNews xəbər verir ki, Azərbaycan Mədəniyyət Fondunun və SEBA (Seul-Baku) Azərbaycan-Koreya Mədəniyyət Mübadiləsi Assosiasiyasının birgə təşkilatçılığı ilə Qəbələ Mədəniyyət Mərkəzində keçirilən beynəlxalq sərgidə sərgidə dünyanın 23 ölkəsini təmsil edən 158 rəssamın 291 əsəri nümayiş etdirilir.

Mərasimdə çıxış edən SEBA-nın sədri Ruhəngiz Heydərova bu sərginin mədəniyyətimizin genişmiqyaslı təbliği istiqamətində reallaşdırılan layihələrin davamı olduğunu bildirib. Mərasimdə Mədəniyyət və Turizm Nazirliyinin Mədəniyyətşünaslıq üzrə Elmi-Metodik Mərkəzinin direktoru Vilayət İsmayılov, Azərbaycan Rəssamlar İttifaqının sədri, Xalq Rəssamı Fərhad Xəlilov, Azərbaycanın və Rusiyanın Xalq Rəssamı, akademik Tahir Salahov, Koreya Respublikasının ölkəmizdəki səfiri Çoi Suk-İn çıxış edərək sərginin mədəniyyətlərarası dialoqun tərkib hissələrindən biri olduğunu bildirib, bu incəsənət bayramının ənənəvi olaraq keçirilməsini arzulayıblar.

Sərgi iştirakçılarından 24 nəfər müxtəlif nominasiyalar üzrə diplomla təltif olunub.

Beynəlxalq sərgi mayın 19-dək davam edəcək.

Həmidli S.

525-ci qəzet.- 2013.- 8 may.- S. 7.