Qüdsdə düşüncələr

PEYĞƏMBƏRİN MERACI VƏ İLK NAMAZI

Peyğəmbərlər yetirən

Pak diyarda – Qüdsdə,

Yer üzünün gözü üstə;

Uzanmışdı Məhəmməd.

Hələ özü bilmirdi,

Peyğəmbərlik haqqını

Qazanmışdı Məhəmməd.

Allah eşqi qanında,

Yaşıl işıq qoynunda,

İndi merac edirdi;

Göyün hər bir qatında

Bir peyğəmbər dururdu,

Xoşgəldin – ovqatında:

Onu salamlayırdı,

Onu uğurlayırdı.

Allah astanasında

Aləm nura boyandı.

Onun gözü qamaşdı,

Səcdə qıldı, dayandı.

Qəlbində səs eşitdi

–Nə istəyirsən dilə.

–Allahım, sən alisən

Hümmətimə rəhm elə...

–Aləmə ümid olur

Yanan balaca bir şam.

Mən tövbə qapıların

Sizə açıq qoymuşam...

O ilk dəfə eşitdi

Ulduzlar arasından

Bir azan avazını,

Göyə Məhəmməd getdi,

Yerə peyğəmbər endi,

Qıldı ilk namazını.

SƏBR VƏ DÖZÜM ALLAH YOLUDUR

Ekizdilər xeyirlə-şər,

İkisi də dəymədüşər.

Onlar deyir bu dünyanı

Düzəltmək də bizə düşər.

Gecə-gündüz hey döyüşər,

Döyüşlərdə yer dəyişər.

Biri deyər qarnım acdı,

Biri deyər ruhum acdı.

Deyən olmaz gözlə, bişər...

İnsan kamala yetməyib;

Yetişməyib hələ bəşər.

Heç kəs heç vaxt deməsin ki,

Bütün vədlər yalan oldu.

Zor ağıla qalib gəldi,

Mədəviyyat plan oldu,

Mənəviyyat talan oldu.

Azadlığı satan oldu,

Azadığı alan oldu.

Gələn gəldi, gedən getdi,

Qalan qaldı, olan oldu.

İnsan ağlı çox cavandı,

Qoca dünya köhnə yoldu.

Ağlımızın yolu zaman.

Bu zamanda ömür bir an.

Ha qışqır ki, “zaman dayan!”

Hələ ağla dolmamışam,

Hələ adam olmamışam,

Nə dayanar, nə gözləyər

“Vallah-billah bu ağılla

Qorxuram bizə göz dəyər”.

Yaxşı olmaq istəyənlər

Hər zaman yaxşı söz deyər.

Döymə səndən aşağını,

Söymə səndən yuxarını.

Zaman diri su kimidi

Zaman tapar axarını.

Çalış bir az da döz – deyər.

ALLAHIN MUSAYA ZARAFATI

Musa peyğəmbər qırx il

yəhudiləri gəzdirdi,

Səhraları, çölləri,

sahilləri bezdirdi.

O yerləri bəyənmədilər

Bura pis qoxuyur – dedilər,

dayanmadılar.

Üç min il sonra

Onun neft qoxusu

olduğunu anladılar.

Özlərini, talelərini danladılar.

O zaman bir ölü balığın

dirildiyi yerdə

məskən salmışdılar.

Kök salıb qalmışdılar

Bu dəfə dəniz

ölü dəniz çıxmışdı.

Dənizdən balıq, su əvəzinə

duz çıxmışdı.

Üç min ildir dünyanı dolanır,

yenə o sahilə gəlir

yəhudilər.

Yaradanın bu zarafatına

hələ də ağlayır, gülür yəhudilər.

Fikrət QOCA

525-ci qəzet.- 2013.- 17 may.- S.7.