Xalq artisti Məcnun Kərimin xatirə gecəsi keçirilib

Dövlət Musiqi Mədəniyyəti Muzeyində Qədim Musiqi Alətləri Ansamblının yaradıcısı və bədii rəhbəri, Xalq artisti, sənətşünaslıq doktoru, Bakı Musiqi Akademiyasının professoru Məcnun Kərimə həsr olunmuş xatirə gecəsi keçirilib.

Gecəni giriş sözü ilə açan Musiqi Mədəniyyəti Muzeyinin direktoru, sənətşünaslıq namizədi Alla Bayramova bildirib ki, Məcnun Kərimin musiqi ilə əməkdaşlığı ötən əsrin 80-ci illərində başlanıb: "Miniatür sənəti üzrə mahir usta olan Məcnun Kərim Azərbaycanın qədim musiqi alətlərini - rud, bərbət, çanq, Şirvan tamburu, santuru bərpa edib, daha sonra Azərbaycan Dövlət Musiqi Mədəniyyəti Muzeyi nəzdində Qədim Musiqi Alətləri Ansamblının əsasını qoyub. O, orkestrlə bərabər, orta əsrlərdə yaşayıb-yaratmış məşhur musiqiçilər və musiqi nəzəriyyəçiləri Əbdülqadir Marağai və Səfiəddin Urməvi tərəfindən yaradılıb, 14-cü əsrə aid qədim əsərləri bərpa edib. Əbdülqədir Marağaidən zəmanəmizə 34 təsnif gəlib çatıb. Ansambl bu təsniflərin üçünü ifa edir. S.Urməvidən dörd kiçik əsər qalıb, həmin əsərlər də ansamblın repertuarına daxildir. Məcnun Kərimin bərpa etdiyi 24 musiqi aləti hazırda muzeydə saxlanılır. O, dörd dildə nəşr olunmuş "Azərbaycanın musiqi alətləri" kitabının da müəllifidir.

Azərbaycan xalqının ümummilli lideri Heydər Əliyev 1996-cı ildə akademik Yusif Məmmədəliyevin yubiley gecəsində ilk dəfə Qədim Musiqi Alətləri Ansamblının ifasını dinləyib. Ertəsi gün o, ansambla dövlət statusunun verilməsi barədə Sərəncam imzalayıb.

Məcnun Kərimin musiqi alətləri dəfələrlə xarici ölkələrdə nümayiş etdirilib. O, beynəlxalq konfranslarda iştirak edib, Üzeyir Hacıbəyli adına Bakı Musiqi Akademiyası nəzdində "Qədim musiqi alətlərinin bərpası və təkmilləşdirilməsi" laboratoriyasına rəhbərlik etmiş, yeni fənnin - "alətşünaslığın" əsasını qoyub".

Mədəniyyət və Turizm Nazirliyinin mədəniyyət siyasəti şöbəsinin müdiri Fikrət Babayev, AMEA-nın müxbir üzvü, sənətşünaslıq doktoru, professor, Əməkdar İncəsənət Xadimi Zemfira Səfərova, Bakı Musiqi Akademiyasının prorektoru, professor Gülnaz Abdullayeva və başqaları Məcnun Kərimin ölkənin musiqi mədəniyyətinin inkişafına töhfəsindən danışıb, xatirələrini bölüşüblər: "Hər bir musiqi alətinin bərpasına bir neçə il vaxt sərf olunub. Məsələn, "nüsxə" adlı qədim musiqi alətinin bərpası 3 il sürüb. Ustad həmin musiqi alətlərinin təsvir olunduğu bədii ədəbiyyatı, əlyazmaları, onların texniki parametrlərini öyrənib, lazımi ağac növü seçmək üçün rayonlara səfər edib. Məcnun Kərim həmişə fəxrlə deyirdi ki, heç bir xalqın bizim xalqımız qədər zəngin orta əsrlər mədəniyyəti yoxdur. Heç bir xalqın bu qədər yaxşı saxlanılmış, bərpa edilmiş və hazırda istifadə olunan orta əsrlərə aid musiqi aləti yoxdur".

Qədim Musiqi Alətləri Ansamblına onun banisi Məcnun Kərimin adını vermək təklif olunub. Musiqi Mədəniyyəti Muzeyinin filialının direktoru Təranə Zeynalova ustadın həyat və yaradıcılığından danışmışdır. Onun çıxışı videomateriallarla müşayiət olunub.

Sonda konsert proqramı olub. Qədim Musiqi Alətləri Ansamblı öz repertuarından əsərlər ifa ediblər.

S.ABDULLAYEVA

525-ci qəzet.- 2013.- 19 noyabr.- S.7.