Azərbaycan diasporundan Ermənistana kəskin etiraz

LİTVA AZƏRBAYCANLILARI CƏMİYYƏTİNİN SƏDRİ MAHİR HƏMZƏYEV: “Ermənistanın rəsmi Vilnüsə verdiyi yalan vədlər Litvadakı Azərbaycan diasporunun kəskin etirazına səbəb olub. Bu, bizim ifşa və tənqid hədəfimizdədir”.

Bu sözləri “525”ə açıqlamasında Litva azərbaycanlıları cəmiyyətinin sədri, Litva – Azərbaycan Assosiasiyasının həmtəsisçisi Mahir Həmzəyev dilə gətirib. O, belə deyib: “Avropa İttifaqının Şərq partnyorluğu siyasəti çərçivəsində rəsmi Vilnüslə apardığı ikibaşlı siyasət və məkrli oyunlar, onun Avropa İtifaqına və Avroatlantik müdafiə strukturlarına inteqrasiya olunmaqla bağlı etdiyi imitasiyalar Litvadakı Azərbaycan diasporunun həmişə ifşa obyekti olub və indi də tənqid hədəfi olaraq qalmaqdadır. 2013-cü ildə Litvadakı Azərbaycan diasporunun təbliğat fəaliyyətində bu səmtdə görülən işlər xüsusilə geniş miqyas alıb. Ermənistan Parlamentinin başçıları, fraksiya və komissiya sədrləri, həmçinin bir sıra millət vəkilləri, Xarici işlər və Müdafiə nazirliklərinin rəhbərləri, digər dövlət rəsmiləri və çoxlu sayda erməni siyasətçiləri cari ilin birinci yarısında dəfələrlə Vilnüsə rəsmi və işgüzar səfərlər ediblər. Onlar o zaman Avropa İttifaqı Şurasında sədrlik etməyə hazırlaşan Litva Respublikasının Prezidentini, Seymin sədrini və Baş naziri “tam əmin” etmişdilər ki, Ermənistan Şərq partnyorluğu siyasətinə qatılmış dövlət başçılarının bu ilin noyabr ayında Vilnüsdə keçiriləcək sammitində mütləq yüksək səviyyədə iştirak edəcək və hətta bu zaman prezident Serj Sərkisyan Ermənistanın adından Avropa İttifaqı ilə assosiativ üzvlük və azad ticarət barədə sazişlər də paraflayacaq. Lakin, bu ölkənin Rusiyanın başçılığı ilə yaradılan Gömrük İttifaqına daxil olmaq qərarına gəlməsi ilə bağlı bu ilin sentyabrın 3-də Serj Sərkisyanın Kremldə səsləndirdiyi bəyanat hazırda Avropa İttifaqında sədrlik edən Litva dövlətinin rəhbərliyi və ölkənin bir çox siyasətçiləri üçün “soyuq duş effekti” yaratdı. Onlar digər məsələlərlə yanaşı, həm də zahirən “müstəqil dövlət” kimi təqdim olunan Ermənistanın əsil sahibinin Rusiya olmasını və məhz Rusiyanın hərtərəfli təhriki ilə Qarabağın Ermənistan tərəfindən işğal edilməsini təsdiq etməyə əsas verən faktlarla və subyektiv geosiyasi amillərlə bir daha üzləşməli oldular”. M.Həmzəyev buna baxmayaraq Litvanın bir sıra millət vəkilləri, siyasi şərhçiləri və mətbuat vasitələrinin “məzlum” Ermənistana hələ də rəhm və şəfqət hisslərini izhar etməkdə davam edirdiyini bildirib: “Onlar guya Azərbaycan və Türkiyə arasındakı “türk məngənəsində” sıxışdırılıb əzilən “biçarə” xristian Ermənistanın “digər çıxış yolu qalmaması üzündən” Rusiyaya daha da yaxın sığınmasına utanıb-qızarmadan “bəraət” qazandırırlar.

Litva azərbaycanlıları cəmiyyəti və Litva-Azərbaycan Assosiasiyası yaranmış şəraiti və qeyd olunanları nəzərə alaraq ölkədə bir sıra təbliğat işləri görür və mətbuat tədbirləri həyata keçirirlər. Həmin tədbirlər çərçivəsində Vilnüsdə litvaca nəşr olunan “Lietuvos zinios” qəzetinin 16 sentyabr 2013-cü il tarixində çıxmış sayında litvalı politoloq və naşir, Litva-Azərbaycan Assosiasiyasının İdarə Heyətinin üzvü Aydanas Praleykanın “Ermənistan özünü Rusiyanın ağuşuna atır” adlı tənqidi-analitik məqaləsi dərc olunubdur. Sözügedən qəzetin 21 sentyabr tarixli sayında isə tanınmış publisist-yazar və ictimai xadim, Litva Respublikası mədəniyyət nazirinin sabiq müavini, Litva-Azərbaycan Assosiasiyasının İdarə Heyətinin üzvü Donatas Valançyauskasın “Ermənistan çoşqa kimi iki donuzun südünü əmir?” başlıqlı pamfleti yer alıb. Bu publikasiyalarda Ermənistanın Avropa İttifaqı ilə münasibətləri genişləndirmək baxımından ikiüzlü siyasət yürütməsi, onun müstəqil dövlət yox, əslində Rusiyanın itaətkar satelliti olaraq qalması, Avropa İttifaqı institutlarına yalan vədlər verməsi, bir çox partnyorlarına arxadan qəfil zərbə vurması və etibarsızlığı üzündən “ipinin üstünə odun yığmağın” mümkün olmaması kimi xüsusiyyətlər son hadisələr və faktlar əsasında açıqlanaraq şiddətli tənqid olunub. Məqalələrdə bu baxımdan həmçinin “müstəqil” Ermənistanın Litvadakı havadarları, o cümlədən bəzi dövlət rəsmiləri satirik gülüş və qınaq obyektinə çevrilib. Dövlətlərarası münasibətlərdə hamılıqla qəbul olunmuş beynəlxalq qaydalara riayət etməyən və dinc yanaşı yaşama prinsiplərinə məhəl qoymayan təcavüzkar Ermənistanın guya Avropa İttifaqının xristian və demokratik dəyərlərinə “qatılması” üçün canfəşanlıq edən “sadəlövh litvalı xadimlər” isə istehzaya salınıb. Bununla yanaşı, həmin publikasiylar qaldırılmış mövzu ilə bağlı Litva vətəndaş cəmiyyətinin düzgün istiqamətdə maarifləndirilməsi baxımından pozitiv əhəmiyyət kəsb edir”.

525-ci qəzet.- 2013.- 4 oktyabr.