Beynəlxalq Kitab Sərgi-Yarmarkasında “Qızıl Kəlmə” mükafatçıları ilə görüş olub

Ötən gün III Bakı Beynəlxalq Kitab Sərgi –Yarmarkası çərçivəsində Mədəniyyət və Turizm Nazirliyinin “Qızıl Kəlmə” mükafatının builki laureatları ilə görüş və “Müəllif günü” keçirilib. Nazirliyin təmsilçisi, şair Çingiz Əlioğlu tədbiri açaraq kitab–sərgi yarmarkasının möhtəşəm təşkilindən, bu çərçivədə keçirilən silsliə maraqlı tədbirlərdən bəhs edib. Bu ilin “Qızıl Kəlmə” mükafatı laureatlarının yaradıcılıqlarını yüksək dəyərləndirən nazirlik rəsmisi onları çağdaş Azərbaycan ədəbiyyatının siması adlandırıb: “Bu müsabiqə, bu mükafatlar həqiqətən də bu gün Azərbaycan ədəbiyyatında-nəsrində, poeziyasında, ədəbi tənqidində seçilən, öz maraqlı, uğurlu axtarışları, əsərləri ilə fərqlənən yaradıcı insanlara təqdim edilir”.

Tədbirdə çıxış edən şair Əjdər Ol sərgi-yarmarka çərçivəsində keçirilən tədbirləri yüksək qiymətləndirib. Mədəniyyət və Turizm Nazirliyinin təsis etdiyi “Qızıl Kəlmə”nin mötəbər mükafat olduğunu bildirən Əjdər Ol ödülün layiqli sahiblərini tapdığını deyib və bu ənənənin gələcəkdə də davam edəcəyinə əminliyinin ifadə edib.

Mükafatın şeir nominasiyasında qalib olmuş şair Adil Cəmil “Yurd yerim-dərd yerim” kitabına görə laureat seçildiyini vurğulayıb: “Bu kitabda birinci səhifədən axıra kimi bir yurd yanğısı var. Yəni mənim itirdiyim yurd yerləri, uşaqlıq xatirələrim burada öz əksini tapıb. O nisgil, o hisslər həmişə mənimlədir. Nədən yazıramsa yazım, yenə o hisslərə qayıtmağa məhkumam”. Şair çıxışını “Yaşamadım” şeiri ilə yekunlaşdırıb.

Nəsr nominasiyasında laureatlardan olan Mustafa Çəmənli “Qızıl Kəlmə” ilə “Ölüm mələyi” tarixi romanına görə mükafatlandırıldığını deyərək, kitabın ərsəyə gəlməsində əməyi olanlara və mükafatı təqdim edən nazirliyə minnətdarlığını bildirib: “Fürsətdən istifadə edərək demək istəyirəm ki, “Öülm mələyi” sayca mənim ikinci tarixi romanımdı. Hələ sovet hökumətinin dağılmasına inanmadığım bir dövrdə ilk dəfə olaraq Qarabağ xanlığının tarixindən yazmışam. Bunu deməkdə məqsədim odur ki, tarixdən yazmaq çox məsuliyyətli işdir. 500 il bundan qabaq yaşamış hansısa tarixi şəxsiyyət haqqında yazan yazıçı bu məsuliyyəti dərk eləməlidir. Tarixdən yazan yazıçının yalan yazmağa, uydurmağa mənəvi haqqı yoxdur”.

Mükafatın daha bir nominantı şair Elçin İsgəndərzadə də çıxışını şeir üzərində qurub.

Avrasiya Yazarlar Yaqub Öməroğlu tədbirdə iştirakından məmnunluğunu ifadə edib, “Qızıl kəlmə” mükafatı laureatlarının bəzilərini şəxsən tanıdığını, yaradıcılıqlarına bələd olduğunu, onların ədəbi nümunələrinin “Qardaş qələmlər” dərgisində yayımlandığını bildirib. Mükafat sahiblərini gələcəkdə də nüfuzlu ödüllərə sahib olmasını arzulayıb.

Ədəbi tənqid üzrə mükafat qazanmış tənqidçi Rüstəm Kamal bir daha Mədəniyyət və Turizm Nazirliyinə bununla əlaqədar minnətdarlığını bildirib: “Mənim estetikam məlum və məşhur bir hədisə söykənir. İt leşindən hamının iyrənib üzünü çevirdiyi zaman peyğəmbər deyir ki, onun ağappaq dişlərini görürsünüzmü? Bax, mənim estetikam hər bir əsərdə o gözəlliyi, o işığı görməkdi. Ümumiyyətlə, kitabda işığı görmək lazımdı. Bu da əslində çox çətindi. İşığı görmək üçün böyük könül yiyəsi olmalısan”.

Gənc yazıçı Pərvin Nurəliyeva “Qızıl Kəlmə” mükafatını alan zaman həyəcandan ürəyindəki sözlərin yarıdan çoxunu deyə bilmədiyini önə çəkərək, bu gün ondakından da həyəcanlı olduğunu bildirib: “ Qızıl Kəlmə” mükafatının təqdimatından sonra xeyli vicdan əzabı çəkirəm, çünki bir məqam var idi ki, mən onu mütləq qeyd etməliydim, amma orada deyə bilmədim. Bilirsiniz ki, hər nominasiya üzrə bu il iki nəfər mükafata layiq görülüb. Nəsr nominasiyasında mən və Mustafa Çəmənli mükafat almışıq. Bir məqamı vurğulayım ki, Mustafa müəllimin bu nominasiya üzrə mükafatı tamdır, ona görə ki, “Qar yağacaq” kitabının redaktorudur. Ona görə mən həmin təqdimatda Mustafa müəllimə təşəkkür etməyi unutdum, amma təkrarən qeyd edirəm ki, Mustafa müəllimin nəsr nominasiyası üzrə mükafatı tamdır, bütövdür”. “Qızıl Kəlmə”nin yaradıcılığında və bioqrafiyasında rolundan söz açan P.Nurəliyeva bu mükafatın onun üçün düşərli olduğunu vurğulayıb: “Ondan sonra mən Beynəlxalq Rəsul Rza mükafatı aldım, daha sonra Milli Kitab Mükafatında ikinci oldum. Mən, deyəsən, ən gənc “Qızıl Kəlmə” laureatıyam, hesab edirəm ki, bu mükafatın mənə verilməsi müasir Azərbaycan ədəbi prosesinin bir simvoludur. Deməli, müasir Azərbaycan ədəbi prosesində uğur qazanmağımıza imkan var, mətbuat da, müsabiqələr də, mükafatlar da gənclərin üzünə açıqdır”.

“Qızıl Kəlmə” mükafatı çərçivəsində “Şans” ödülünü almış tənqidçi Elnarə Akimova ədəbiyyat, ədəbi proses barəsində fikirlərini dilə gətirib: “1990-cı illər, bildiyiniz kimi, ədəbiyyatda da yeni mərhələ idi. Bədii-estetik meyarlar yeniləşmişdi, ədəbiyyata baxış tamamilə yeni meyllər formalaşdırmağı tələb edirdi. Bu baxımdan düşünürəm ki, “Qızıl Kəlmə” mükafatı çərçivəsində “Şans” ödülünə layiq görülən “Yeni təfəkkür və ədəbi tənqid” kitabım məhz həmin meylləri qabartmaq nöqteyi-nəzərindən səciyyəvi idi. Həmin kitabı dəyərləndirən Mədəniyyət və Turizm Nazirliyinə təşəkkür edirəm. Bu, gənc qələmlərə göstərilən diqqətlə bərabər, həm də ədəbiyyatımıza göstərilən qayğı və diqqətin nəticəsidir. Mükafat bizə bir stimul olmaqla bərabər, həm də çiyinlərimizə çox böyük bir məsuliyyət qoyur”.

Daha bir laureat, şair və tərcüməçi Akif Əhmədgil görüşü “Dəniz yaman şirindir” şeiri ilə yekunlaşdırıb. Sonda mükafatçılar oxucular üçün kitablarını imzalayıblar.

Sevinc MÜRVƏTQIZI

525-ci qəzet.- 2013.- 26 sentyabr.- S.7.