Ədəbi irsin tədqiq
və təbliğinə layiqli töhfə
NƏCƏFQULU BƏY ŞEYDA TƏZKİRƏSİNİN İLK NƏŞRİ
Təzkirələr Azərbaycan ədəbiyyatının
ən dəyərli mənbələridir. Orta əsrlərdən XX əsrə qədər tərtib edilən bu məcmuələrdə
ədiblərimizin həyat
və yaradıcılığı
barədə məlumat,
əsərlərindən nümunələr
verilir. Bir sıra şairlərimiz
barədə məlumatı
yalnız təzkirələrdən
alırıq. AMEA Məhəmməd
Füzuli adına
Əlyazmalar İnstitutunun
əməkdaşları təzkirələrin
tədqiqi, nəşri
məsələlərini həmişə
diqqət mərkəzində
saxlayıblar. İndiyədək
XVI-XVII əsrlər müəllifi
Sadiq bəy Əfşarın "Məcməül-xəvas"
təzkirəsi, həmin
dövrdə yaşamış
anonim müəllifin təzkirəsi, XIX-XX əsrlərdə
yaşamış Mir Möhsün
Nəvvabın "Təzkireyi-Nəvvab", Məhəmməd
ağa Müctəhidzadənin
"Riyazül-aşiqin" təzkirələri, "Qulam
Məmmədli təzkirəsi"
tədqiq və nəşr edilib. Şah İsmayıl Xətainin oğlu Sam Mirzənin
"Töhfeyi-Sami", A.Dövlətabadinin
"Süxənvərani-Azərbaycan"
əsərləri nəşrə
hazırlanmaqdadır. Anadilli yazılı abidələrimizin məhsuldar
tədqiqatçısı, Əlyazmalar İnstitutunun
direktor müavini, filologiya elmləri doktoru Paşa Kərimov bu yaxınlarda "Elm və
təhsil", nəşriyyatında
Nəcəfqulu bəy
Şeydanın "Gülşəni-maarif"
təzkirəsini geniş
ön sözlə nəşr etdirməklə
XIX-XX əsr ədəbiyyat
tariximizi araşdıranlara
çox dəyərli
bir qaynaq bəxş edib. İlk öncə Əlyazmalar İnstitutunda N.Şeydanın
şeirlər toplusu nəşr olunub. Məlumat üçün
deyək ki, institutun əlyazmalar xəzinəsində şairin
62 vərəqdən ibarət
dəftəri saxlanır
ki, burada onun 114 qəzəl, 2 müsəddəs, 3 qitə,
6 müxəmməs, 2 müstəzad,
86 rübai və müxtəlif məzmunlu şeirləri toplanıbr.
Müxtəlif məzmunlu
əsərlər içərisində
nəzmə çəkilmiş
hekayə və rəvayətlər, maarifçi
məzmunlu, geriliyi tənqid edən şeirlər, "Tövbənamə",
Mövlana Cəlaləddin
Rumi, Sədi, Hafiz, Vəhşi kimi Şərq şairlərinin
əsərlərindən tərcümələr,
farsca bir neçə qəzəl
var.
N. Şeydanın lirik
şeirlər toplusunun
ilk nəşrinə yazdığı
ön sözdə Paşa Kərimov qeyd edib ki,
şair şeirlərində
maarifçiliklə bərabər
vətənpərvərlik ideyalarını da təbliğ edib, çar Rusiyasının,
Sovet hakimiyyətinin işğalçı siyasətini
kəskin tənqid hədəfinə çevirib. Nəcəfqulu bəyin bir sıra şeirlərinin aşkar antisovet xarakterli olduğunu qeyd edən tədqiqatçı təəccüb
hissi ilə onun repressiya olunmadığını, əsərlərinin
məhv edilməyərək
bizə çatdığını
bildirib. Görünür ki, şair kəskin
tənqidi ruhlu şeirlərini heç kimə göstərməyib,
gizlədə bilib.
Bu kitabdan sonra N. Şeydanın xaricdə yaşayan nəvələri
P.Kərimova müraciət
etmiş, şairin
"Gülşəni-maarif" təzkirəsinin əlyazmasını
ona təqdim etmişlər. Bu hadisədən çox keçmədi ki, alim əsəri nəşr etdirərək
tədqiqatçılara və
şeirsevərlərə təqdim
etdi.
Cəsarətlə deyə bilərik ki, təzkirə XIX əsrin ikinci yarısı-XX əsrin əvvəlləri Azərbaycan
ədəbiyyatına dair
əvəzsiz mənbədir. 1935-ci ildə tamamlanmış bu təzkirədə aşağıdakı 24 şairimiz
barədə məlumat,
əsərlərindən nümunələr
toplanmışdır. Azər Buzovnalı, Əşrəf, Mir Bədrəddin
Bədri, Məhəmməd
Hadi Bakuvi Sabit, Əbdülxaliq Cənnəti, Hacıağa
Hacı, Mirzə Möhsün Xəyali, Ağa Hüseyn Rəsulzadə, Mirzə Əbdüləli Səməndər,
Həsən Səyyar,
Mir Əbdülvəhhab Seyid
Zərgər, Hacı
Səlim Səbbah, Nəcəfqulu bəy Şeyda, Mikayıl Seydi, Sadiq bəy
Sadiq, Mirzə Məhəmməd Ziya, Mirzə Həsib Qüdsi, Ağadadaş Müniri, Əliabbas Müznib, Səməd Mənsur, Əbdüləli
Hilali, Məhəmməd
Hadi Şirvani, Məhəmməd ağa Müctəhidzadə, Əbdülxaliq
Yusif. Bu ədiblər
əsasən Qarabağ,
Şirvan, Bakı, Quba və Dağıstan
ədəbi mühitinin
yetirmələridirlər. Onların içində Əşrəf, Mir Bədrəddin
Bədri, Hacıağa
Hacı, Ağa Hüseyn Rəsulzadə, Həsən Səyyar, Seyid Zərgər, Mirzə Məhəmməd
Ziya, Əbdüləli
Hilali kimi tədqiqatçılara tanış
olmayan, ya da haqqında məlumat çox az olan şairlər
vardır. Təzkirədən
öyrənirik ki, Məhəmməd Hadi adlı (bütöv adı Məhəmməd Hadi Bakuvi Sabitdir)
başqa bir istedadlı şairimiz də olmuş və o, gənc yaşlarında vətənini
tərk edib Orta Asiyaya getdikdən
sonra haqqında məlumat olmamışdır.
"Müştəri" təxəllüsü ilə
şeirlər yazan,
"Riyazül-aşiqin" təzkirəsinin müəllifi
Məhəmməd ağa
Müctəhazadənin oxuculara
cəmi bir neçə şeiri məlumdur. Şairin təzkirədəki 45 şeiri ədibin poeziyası barədə müəyyən qənaətlərə
gəlməyə imkan
verir. Təzkirəni
nəzərdən keçirərkən
görürük ki, çar Rusiyasının əfsanəvi azərbaycanlı
generalı, Azərbaycan
Xalq Cümhuriyyətinin
ilk müdafiə naziri
Səməd bəy Mehmandarovun atası Sadiq bəy də şair olmuşdur. Məhəmməd
Hadinin topluya daxil edilmiş yeddi şeirindən
ikisinə onun 1978-ci ildə "Elm" nəşriyyatında
çap edilmiş seçilmiş əsərlərində
görmürük. Görkəmli şair və ədəbiyyatşünas Əliabbas
Müznibin əsərləri
də böyük maraq doğurur. Onun burada rast
gəldiyimiz "Əfkari-pərişan,
yaxud müzlim bir xəyal" şeiri və "Hürriyyəti-bəşəriyyə: axundnümalara, cəlladlara,
irtica üyunlara təqdim olunur" başlıqlı poeması
XX əsrin böyük
şairi Məhəmməd
Hadinin təsirindən
xəbər verir. Adı çəkilən poemasında
Ə.Müznib xalqının
fəlakətli vəziyyətinin,
digər xalqlardan geridə qalmasının səbəblərini araşdırır,
cəmiyyətin bütün
təbəqələrinin nümayəndələrini-riyakar
din xadimlərini, var-dövlət
düşkünü olan
məmurları və
burjuaziya nümayəndələrini,
milli varlığını
danan ziyalıları kəskin tənqid atəşinə tutur.
Bu fikirdəyik ki, bu əsər
XX əsrin əvvəllərində
yazılmış Azərbaycan
poemaları arasında
öz yerini tutmalıdır.
Təzkirə XX əsrin görkəmli sənətkarı Səməd
Mənsur yaradıcılığının,
xüsusilə də onun "Rəngdir" rədifli müxəmməsinin
təsirinin həmin dövrdə şairlər
arasında yayıldığını
göstərir. Məhəmməd ağa Müctəhidzadənin
bu təzkirəyə
yazılmış eyni
rədifli müxəmməsi,
forma və məzmun cəhətdən Səməd
Mənsur şeirinə
yaxındır. Qeyd
etmək istərdik ki, əsərləri son dövrlərdə nəşr
edilmiş Mirzə Həsib Qüdsi divanında (tərtibçi:
M.Əliyev) da S.Mənsur müxəmməsinə
nəzirə olaraq yazılmış iki müxəmməsə rast
gəlirik.
Nəhayət, təzkirədə müəllif
Nəcəfqulu bəy
Şeyda özü, əcdadları barədə
də maraqlı məlumatlar vermişdir. Öyrənirik
ki, ədib Baharlı elinin görkəmli dövlət
xadimi və şair, XVI əsrdə Humayın şahın, Əkbər şahın dövründə Böyük
Moğollar dövlətində,
Hindistan tarixində müəyyən rol oynamış Məhəmməd
Bayram xanın nəslindəndir. Onun babaları
XV yüzildə Azərbaycanın
cənubunda dövlət
qurmuş Qaraqoyunlu tayfa ittifaqının Baharlı oymağındandırlar.
Bu nəslin nümayəndələri
sonradan Araz çayının kənarında,
daha sonra isə,
İbrahim xanın
zamanında Qarabağda
məskunlaşıb Baharlı
kəndinin əsasını
qoymuşlar. Qasım bəy Zakir
şeirlərindən birində
Baharlıların Bayram
xanın nəslindən
olduğunu qeyd etmişdir. Təzkirədən
öyrənirik ki, Nəcəfqulu bəyin atası Mirzə Məhəmmədhəsən 1849-1859-cu illərdə Şamaxı
şəhərində yerləşən
çar Rusiyasının
jandarm idarəsində
tərcüməçi işləmiş,
1859-cu ildə Şamaxıda
baş verən zəlzələdən sonra
divanxana idarəsi ilə birlikdə Bakıya köçmüş,
beş il sonra Qubaya xidmətə
göndərilmiş və
1879-cu ildə orada vəfat etmişdir. Onun vəfatından sonra oğlu Nəcəfqulu bəy
1880-ci ildə Bakıya köçmüş, bir sıra
hökumət idarələrində işləmiş, XX əsrin
30-cu illərinin sonlarında ixtiyar yaşlarında vəfat
etmişdir.
Əminik ki, Nəcəfqulu bəy Şeydanın yeni
çapdan çıxmış "Gülşəni-maarif"
təzkirəsi XIX əsrin ikinci yarısı - XX əsrin əvvəlləri
Azərbaycan ədəbiyyatının tədqiqatçıları
üçün dəyərli qaynaqlardan biri olacaq, burada
haqqında məlumat gedən şairlər ədəbiyyat
tariximizdə layiqli yerlərini tutacaqlar.
Nailə
MUSTAFAYEVA,
filologiya üzrə fəlsəfə doktoru, dosent
525-ci qəzet.-
2014.- 25 dekabr.- S.6.