Azərbaycan muğamı Qüdsdə

Qüds şəhərində keçirilən ənənəvi XV Beynəlxalq "Ud" festivalı çərçivəsində "Azərbaycan Muğamı" konserti olub.

Azərbaycan-İsrail Beynəlxalq Assosiasiyası (Azİz) nəzdindəki Azərbaycan Mədəniyyəti Mərkəzinin direktoru Yeganə Salmanın "525"ə bildirdiyinə görə, Qüds teatrının salonu tanınmış xanəndə Qoçaq Əsgərovun ifasında Azərbaycan muğamını dinləməyə gələn insanlarla dolu olub:

"Salondakılar elə muğamın ilk sədalarından Q.Əsgərovun bənzərsiz səsinin sehrinə bürünüblər. Tondan-tona keçən ecazkar musiqi dinləyiciləri ovsunlayıb. Salondakılar təkcə virtuoz muğam ifası dinləməyiblər, sanki Azərbaycan ab-havasına köklənib, ölkəmizin təbiətinin qoynuna gəzintiyə çıxıblar. Onlar musiqinin dili ilə bülbülün nəğməsini, ağacların kölgəsi altından axan sərin bulaqların şırıltısını və hətta Bakı küləyinin vıyıltısını dinləyiblər...

Dinləyicilər muğamın sehrinə elə dalıblar ki, hətta musiqiçilər səhnəni tərk edəndə belə salonda tam sükut hökm sürüb. Lakin qəflətən qoparaq salonun divarlarını lərzəyə gətirən gurultulu alqışlar yalnız Azərbaycan xalq çalğı alətlərinin mahir ifaçılarının ifasında ecazkar melodiya yenidən səslənəndə səngiyib. Alqış sədaları arabir melodiyanı kəsib, zərb aləti isə elə bir bənzərsiz ritm yaradıb ki, bu ritmi yalnız ürək döyüntüsünə - dünyanın bir çox ölkələrində konsertlər verən bu kollektivin döyünən ürəyinə bənzətmək olar". Konsertdən sonra tamaşaçılar pərdə arxasında xanəndə ilə görüşmək istəyiblər.

Onlar heyranlıqlarını bildirib, təəssüratlarını bölüşərək bu möhtəşəm konsertə görə azərbaycanlı musiqiçilərə təşəkkür ediblər.

S.ABDULLAYEVA

525-ci qəzet.- 2014.- 12 noyabr.- S.7.