Yunanıstanda Azərbaycan Mədəniyyəti Günləri uğurla keçib

Ölkəmizi dünyaya tanıtmaq üçün Heydər Əliyev Fondunun dəstəyi ilə müxtəlif ölkələrdə keçirilən Azərbaycan mədəniyyəti günləri bu il Yunanıstanın paytaxtı Afinada təşkil olunub. Tədbirlər çərçivəsində Azərbaycanın tarixi-mədəni irsinin təbliği, iki ölkə arasında əlaqələrin genişləndirilməsi məqsədilə proqramlar tərtib edilib.

"Baku-2015" Birinci Avropa Oyunları ilə bağlı təqdimat, Bakının Avropa Oyunlarına hazırlıqlarını əks etdirən filmin nümayişi, Azərbaycan Dövlət Simfonik Orkestri və Dövlət Rəqs Ansamblının çıxışı afinalılar və digər ölkələrdən gələn qonaqlar üçün böyük maraq doğurub. Heydər Əliyev Fondu, Azərbaycanın Yunanıstandakı səfirliyi və Yunanıstanın Marianna V.Vardinoyannis Fondunun birgə təşkilatçılığı ilə keçirilmiş konsert təhsilə dəstək layihəsinə yardım xarakteri daşıyıb. Xeyriyyə konserti beş min tamaşaçı tutumu olan Afinanın qədim məkanlarından biri - "İrodio" Teatrında keçirilib. Konsertdə Azərbaycanın birinci xanımı, Heydər Əliyev Fondunun prezidenti Mehriban Əliyeva, UNESCO-nun xoşməramlı səfiri Marianna Vardinoyannis, Yunanıstanın ictimai-siyasi və mədəni dairələrinin nüfuzlu şəxsləri, Afina sakinləri və turistlər iştirak ediblər. Tədbirin aparıcısı Heydər Əliyev Fondu və onun prezidenti Mehriban Əliyevanın fəaliyyəti barədə məlumat verib. Bildirilib ki, beynəlxalq aləmdə böyük nüfuza malik olan Fond dünyanın bir çox ölkələrində müxtəlif sahələrlə bağlı layihələr həyata keçirir.

Daha sonra çıxış edən Azərbaycanın Yunanıstandakı səfiri Rəhman Mustafayev ölkələr arasında bütün sahələrdə əlaqələrin inkişaf etdiyini, siyasi münasibətlərin yüksək səviyyədə olduğunu, mədəni əməkdaşlığın isə xüsusi yer tutduğunu qeyd edib. Səfir Yunanıstanda ölkəmizlə bağlı dolğun məlumatın olduğunu deyərək bu tədbirin də Azərbaycanı daha yaxşı tanıtmaqda mühüm rol oynayacağını vurğulayıb və bu işə verdiyi dəstəyə görə Heydər Əliyev Fondunun prezidenti Mehriban Əliyevaya təşəkkürünü bildirib.

Çıxışlardan sonra konsert başlayıb. Afina tamaşaçılarının qarşısına Əməkdar incəsənət xadimi Fəxrəddin Kərimovun dirijorluğu ilə Üzeyir Hacıbəyli adına Dövlət Simfonik Orkestri və Dövlət Rəqs Ansamblı çıxıblar. Konsertdə həmçinin, xalqımızın mədəni ənənələrində və tarixində dərin köklərə malik olan muğam da səslənib. Yunanıstanda keçirilmiş mədəniyyət günlərində nümayəndə heyətinin tərkibində iştirak edən Xalq artisti, Azərbaycan Dövlət Simfonik Orkestrinin direktoru və Bakı Musiqi Akademiyasının dosenti Şükür Səmədov öz səfər təəssüratlarını belə bölüşüb: "Biz Dövlət Simfonik orkestrinin tərkibində Heydər Əliyev Fondunun təşkilatçılığı ilə bir çox ölkələrdə qastrol səfərlərində olmuşuq. Bu səfərlərdə Azərbaycan mədəniyyəti günlərinin təşkil olunması ölkəmizin mədəni irsinin dünyada tanınması miqyasında çox mühüm addımdır. Yunanıstan səfərimiz də bizim üçün çox yaddaqalan oldu. Xüsusən də Afina şəhər sakinlərinin və turistlərin məşqlərimizi maraqla izləmələri, alqışlamaları bizim üçün böyük fəxr idi. Sentyabrın 28-də baş tutmuş konsertdə isə Azərbaycan Dövlət Simfonik Orkestri və Azərbaycan Dövlət Rəqs Ansamblı çox möhtəşəm bir proqramla tamaşaçıların qarşısına çıxdı. Konsertdə Ü.Hacıbəylinin "Koroğlu" uvertürası, Qara Qarayevin "Yeddi gözəl" əsərindən parçalar, S.Hacıbəylinin "Karvan" simfonik lövhəsi, F.Əmirovun "Azərbaycan kapriççosu", Niyazidən "Qaytağı", Rəqs Ansamblı ilə birgə isə "Koroğlu" operasından "Cəngi", "İgidlər" və "Qızlar" rəqsi, Eldar Mansurovun "Odlar yurdu" əsəri səsləndi. Hər kəs tərəfindən maraqla qarşılanan ifa isə Azərbaycan muğamları ilə yunan xalq rəqsi "Sertaki"nin sintezindən ibarət kompozisiya oldu. İstedadlı tenor Yusif Eyvazovun ifasında italyan musiqiləri də rəğbət doğurub".

Azərbaycan mədəniyyəti günlərinə Yunanıstan mətbuatında da geniş yer ayırılıb. Heydər Əliyev Fondundan alınan məlumata görə, ölkənin kütləvi informasiya vasitələrində Afinada keçirilmiş tədbirlər barədə bir çox məlumatlar verilib. Bildirilib ki, bu mədəniyyət günləri yunan xalqına Azərbaycanı daha da yaxından tanıtmaq imkanı qazandıracaq. "Egiakoumis.gr" saytında dərc olunan "Mədəniyyət və incəsənət Yunanıstanla Azərbaycanı birləşdirir" adlı məqalədə deyilir ki, 2014-cü ilin aprelində Afinada Bakı Musiqi Akademiyası, iyun ayında isə Heydər Əliyev Fondunun təşəbbüsü ilə Azərbaycanın Dövlət Kamera Orkestri böyük tamaşaçı auditoriyası üçün konsert verib. Fondun prezidenti, Azərbaycanın birinci xanımı Mehriban Əliyeva bununla kifayətlənməyərək Yunanıstana Azərbaycan mədəniyyətinin digər sahələrini də təqdim etmək niyyətindədir. Xatırladaq ki, Heydər Əliyev Fondu ölkələr və xalqlar arasında əlaqələrin genişləndirilməsi, Azərbaycan mədəniyyətinin təbliği məqsədi ilə bu günədək Rusiya, Almaniya, Fransa, İtaliya, Yunanıstan və digər ölkələrdə bir sıra tədbirlər, müxtəlif layihələr həyata keçirib".

Nigar SƏMƏDLİ

525-ci qəzet.- 2014.- 9 oktyabr.- S.7.