Mübarək

Şair, dramaturq, ədib Ramizin

"Əməkdar mühəndis" adı mübarək!

Xoşbəxt ziyalıdır dostumuz bizim

Vətəndaş qeyrəti, andı mübarək!

Adət-ənənələr ocağındayıq,

Bakının füsunkar "Xan bağı"ndayıq;

İlin təravətli yaz çağındayıq,

Novruz tonqalımız yandı, mübarək!

Onun "Sevgi dolu gecələr"i var,

Könül dünyasının inciləri var;

Sənət butaları, qönçələri var,

Köksünün məhəbbət odu mübarək!

Duyğu dənizində canlı adadır,

Səsi məmləkətlər gəzən sədadır.

Nəğməsi ərməğan, ruhi qidadır,

Sözünün ləzzəti, dadı mübarək!

Dərdiyi gül-çiçək ətirli, incə,

Hər təzə misrası - ürəyimizcə!

Qardaş Türkiyədən, İrandan neçə

Doğmalar zəng edib dedi: "Mübarək!"

Sevir mahalını, sevir elini,

"Bahar yağışı"nı, bahar yelini.

Altı onilliyin sıxıb əlini,

Yaşının müdriklik həddi mübarək!

Qədrini bilənlər ölkədə artır,

Əmələ çevrilən söz, vədə artır;

Qələm məhsulları get-gedə artır,

Yeni əsərinin ardı mübarək,

"Əməkdar mühəndis" adı mübarək!

Oqtay Rza

əməkdar müəllim

525-ci qəzet.- 2015.- 14 aprel.- S.8.