Türk dünyası mədəniyyətinin təbliğində önəmli addım: "Mahnıdan Şarkıya"

"Mahnıdan Şarkıya" - bu, Azərbaycandan başlayıb, türk dünyasına uzanan möhtəşəm bir proyektin adıdır.

Bütün qardaş türk dünyasının qəlbinin şeirlərlə, mahnılarla, şarkılarla bir vurduğu nəhəng proyekti həyata keçirən Azərbaycan Bəstəkarlar İttifaqı, Azərbaycan Yazıçılar Birliyi və Türkiyə Elm və Ədəbiyyat Əsəri Sahibləri Məslək Birliyinin (İLESAM) bu ilk birgə addımı çox maraqlı və uğurlu olub.

Türk qardaşlarımızdan gələn dəvət-təklifə görə, altı türk şairinin sözlərinə, altı azərbaycanlı bəstəkar mahnı yazmalı və altı azərbaycanlı şairin sözlərinə altı türk bəstəkarı şarkılar bəstələməliydi. Hər zamankı kimi Azərbaycan Bəstəkarlar İttifaqı qarşısına gələn təklifləri qəbul edib, dəyərləndirəndən sonra hər iki qurum arasında işbirliyi sazişini təsdiqləyərək, Azərbaycanda ilk belə bir proyektin üzərində işə başlandı. Əlbəttə, belə bir qarşılıqlı əməkdaşlığın nə qədər önəmli olduğunu əvvəlcədən görən və uzun ömürlü iş birliyi, perspektiv əhəmiyyəti Bəstəkarlar İttifaqı bu addımı atmağı vacib bildi. Bu işbirliyinin içində Azərbaycan bəstəkarları və şairlərinin türk dünyasında bir daha tanınması var idi.

Dəyərli türk şairləri Nedim Uçar, Eklem Yalbuz, Sərdar Öncül, Durmuş Kaya, Sevinc Atan, Sevim Yakıcı öz şeirlərini Azərbaycan Bəstəkarlar İttifaqına göndərdikdən sonra bizim bəstəkarlardan Firəngiz Əlizadə, Sərdar Fərəcov, Cavanşir Quliyev, Həsən Adıgözəlzadə, Elza Seyidcahan və Cəlal Abbasov bu şeirlər üzərində işləyib mahnılarını yazdılar.

Qarşılıqlı olaraq Azərbaycan tərəfi tanınmış şairlərimiz Əhməd Cavad, Rəsul Rza, Nigar Rəfibəyli, Məmməd Araz, Zəlimxan Yaqub, Nəriman Həsənzadənin gözəl şeirlərini türk musiqiçilərinə təqdim edəndən sonra, onlardan Faruk Şahin, Özgen Gürbüz, Zekai Tunca, Yaşar Bedük, Pınar Köksal, Uğur Top bir-birindən gözəl şarkılar hazırladılar.

Sözləşməyə görə bu mahnı və şarkılar "Türk dünyası konsertlər silsiləsi" başlığı altında türksoylu ölkələrin hamısında bir-bir təqdim olunmalıydı və türk dünyası konsertlər silsiləsi "Mahnıdan Şarkıya"nın ilk təqdimatı Bakıda "Muğam Mərkəzində" böyük müvəffəqiyyətlə keçdikdən sonra növbəti çıxış Ankarada oldu. Bakıdan Ankaraya uzanan konsert proqramı ulu öndərimiz Heydər Əliyevin "İki dövlət - bir millət" mesajını verirdi.

Noyabr ayının 18-dən 21-nə qədər uzanan bu tədbirdə iştirak etmək üçün başda Azərbaycan Bəstəkarlar İttifaqının sədri Firəngiz Əlizadə olmaqla İttifaqın bir qrup üzvü və Azərbaycan Yazıçılar Birliyinin mətbuat katibi, İLESAM-ın Bakı təmsilçisi Xəyal Rza "Mahnıdan Şarkıya" proqramlarında iştirak etmək üçün Ankaraya gəldilər.

Əlbəttə ki, ənənəyə görə tədbirlərə başlamazdan öncə hər iki öndərin, əvvəlcə Bakıda Heydər Əliyevin, sonra isə Ankarada Mustafa Kamal Atatürkün məzarlarını ziyarət etmək sənət adamlarının dahi insanlar qarşısında vəfa borcu idi və Ankara ziyarəti də məhz Anıtqəbirə çələng qoyma mərasimiylə başladı.

Əvvəlcədən demək istərdim ki, türk dostlarımız çox gərgin iş planı tərtib etmişdilər. Bu tədbirlər içərisində Türkiyədə yerləşən Qazaxıstan səfirliyində, Azərbaycan Böyük Elçiliyində və TÜRKSOY-da görüşlər də nəzərə alınmışdı. Əlbəttə, yadda qalan görüşlərdən biri də bizim Azərbaycan Səfirliyində olan görüşümüz idi. Azərbaycanın Türkiyədəki səfiri Faiq Bağırov iki plkənin qardaşlıq əlaqələrini vurğulayaraq, azərbaycanlı musiqiçilərin Türkiyənin incəsənətinə, musiqi təhsilinə gətirdiyi töhfələrdən danışdı. F.Əlizadənin Mersin şəhərinin Opera və Balet Teatrı üçün yazdığı "Boş beşik" baletini xüsusilə qeyd etdi. Firəngiz xanım da Azərbaycan Bəstəkarlar İttifaqında görülən işlər barədə səfirliyə toplaşanlara, türkiyəli dostlarımıza məlumat verdi. Ən yadda qalan görüşlərdən biri də Ankarada TÜRKSOY-un qərargahında olan görüş idi. TÜRKSOY-un sədri Düseyin Kaseinov, demək olar ki, xarici səfərindən birbaşa bizim heyətlə görüşə gəlmişdi. Maraqlı keçən görüş zamanı TÜRKSOY-un son vaxtlarda gördüyü işlər barədə videoçarx nümayiş etdirildi. Bir də bizim üçün ən sevindirici hal Xalq şairi Bəxtiyar Vahabzadənin şeirlərinin türkdilli xalqların dilində yenicə çıxan nüsxələrinin təqdimatı oldu.

Nəhayət, noyabrın 19-da Ankarada TRT Avaz kanalında baş tutan möhtəşəm canlı yayım konserti olduqca uğurla, böyük ruh yüksəkliyilə təşkil olunmuşdu. Konsertdən öncə səhnəyə çıxan İLESAM Genel Başkanı Mehmet Nuri Parmaksız türksoylu ölkələrin tarixən mədəni irslərinin biri-birinə bağlılığını göstərmək və bunu gələcək nəsillərə ötürmək amacıyla belə bir proyekti, yardımçısı tanınmış şairə İlter xanım Yaşılayla birlikdə hazırlayıb azərbaycanlı dostların dəstəyiylə həyata keçirməkdən qürur duyduğunu qeyd etdi və bu konsertin araya-ərsəyə gəlməsində əməyi keçən hər kəsə təşəkkürünü bildirdi.

Daha sonra Azərbaycan Bəstəkarlar İttifaqının sədri Firəngiz Əlizadə öz çıxışında iki ölkə arasında qardaşlıq, bərabərliklə yanaşı, sənət birliyinin əhəmiyyətini xüsusi vurğulayaraq ortaq türk mədəniyyətinin inkişafına uğurlar arzuladı.

Təşkilatçılığın yüksək səviyyədə olması, Azərbaycanın səfirinin, Türkiyənin o günlərdəki mədəniyyət və türizm naziri - hörmətli Yalçın Topçunun konsertdə iştirak etməsi buna bir daha dəlalət edirdi. Nazir öz çıxışında bütün türk dünyasının, islam aləminin hər gecəsinin belə şeirlə musiqinin vəhdətində keçməyini arzuladı.

Əlbəttə, konsertin müvəffəqiyyətlə keçməsində TRT-nin musiqi kollektivlərinin xorun, solistlərin, orkestrin əməyini xüsusiylə qeyd etmək lazımdır. Kollektivə rəhbərlik edən həmyerlimiz Abdulla Gurlakini, bəstəkar və Koro Şefi Özgen Gürbüz, solistlərdən Çigdem Gürdal, Elif Güreşçi, Suat Kılıç öz çıxışlarıyla dinləyiciləri feyziyab etdilər.

Konsertin sonunda bütün iştirakçılar, qonaqlar, təşkilatçılar səhnəyə dəvət olundu və demək olar ki, konsert təzədən başladı. Yəni, TRT sənətçiləriylə birlikdə türk şarkılarından ibarət geniş on beş dəqiqəlik mahnı çələngi gecənin son nöqtəsini qoydu.

Beləcə, 2016-cı ildə Qazaxıstanda görüşmək ümidiylə böyük proyektin birinci bölümünü yekunlaşdırdıq.

Həcər BABAYEVA

Əməkdar incəsənət xadimi

525-ci qəzet.- 2015.- 11 dekabr.- S.6.