İstedadlı ifaçının ilk uğurları

Üzeyir Hacıbəyli adına Qarabağ Muğam Mərkəzində istedadlı muğam ifaçıları nəsli yetişir. Onların arasında 12 yaşlı Nəcibə Məmmədovanın adı xüsusi yer tutur.

C.İbrahimov adına Ağcabədi şəhər 8 saylı tam orta məktəbinin VII sinif şagirdi olan bu istedadlı qız hələ kiçik yaşlarında ikən məlahətli səsi, şirin avazı ilə valdeynlərinin və müəllimlərinin diqqətini çəkib. Atası Faiq ona Qarabağ Muğam Mərkəzində təhsil almağı məsləhət bilib. Nəcibə ötən il müsabiqə yolu ilə adıçəkilən mədəniyyət müəssisəsinin muğam şöbəsinə qəbul olunub. Maraqlıdır ki, onun qardaşı Hafiz Məmmədov da həmin şöbənin III sinfində musiqi təhsili alır.

Nəcibə Məmmədova Muğam Mərkəzində müəllimi İsa Məmmədov və tanınmış xanəndə Qəzənfər Abbasovdan muğam sənətinin sirlərini öyrənir, ustad dərsləri alır.

Gənc ifaçının dediyi kimi, ilk dəfə oxuduğu "Anacan" xalq mahnısı uğurlu alınıb və müəllimləri tərəfindən çox bəyənilib. Bu ifa onun özünə olan inamını daha da artırıb. Təsadüfi deyildir ki, qısa müddət ərzində Nəcibə muğamlarımızı, xalq mahnılarımızı məharətlə ifa etməyə başlayıb. Onun səsləndirdiyi "Şahnaz", "Bayatı-kürd", "Qatar" muğamları, "Qarabağ şikəstəsi" və "Heyratı" zərb-muğamları, "Elə bəndəm", "Bəh-bəh, "İrəvanda xal qalmadı", "Bəri bax" və sair xalq mahnıları rəğbətlə qarşılanıb.

Yüksək səs tembrinə, ifaçılıq qabiliyyətinə, şaqraq zəngulələrə malik Nəcibə Məmmədova Qarabağ Muğam Mərkəzinin "Aysel" uşaq özfəaliyyət ansamblının müşayiəti ilə tarixi günlərdə, bayram tədbirlərində, şənliklərdə təşkil olunan konsert proqramlarında da tez-tez çıxışlar edir. Onun sərgilədiyi yaşına uyğun gəlməyən gözəl ifalar tamaşaçılara xoş ovqat, yüksək əhval-ruhiyyə bəxş edir. Bu yaxınlarda "El" TV kanalında canlı yayımla ifa etdiyi "Şahnaz" muğamı və "Vətən yaxşıdır" mahnısının ifası da Nəcibəyə uğur qazandırıb.

Şübhəsiz, bu uğurlu çıxışlar istedadlı gəncin gələcək karyerasından xəbər verir. Gələcəkdə məşhur xanəndə olmaq istəyini gizlətməyən gənc ifaçı Muğam Mərkəzində təhsilini başa vurduqdan sonra, hazırlığını davam etdirmək, ali təhsil almaq fikrindədir. Bu məqsədlə o müəllimləri tərəfindən verilən tapşırıqları böyük həvəs və şövqlə yerinə yetirir, onların məsləhətlərini dinləyir, muğam sənətinə dərindən yiyələnməyə can atır.

Balaca xanəndə gələn il keçiriləcək televiziya muğam müsabiqəsinə və Qara Qarayev adına Beynəlxalq Musiqi Festivalına qatılmaq niyyətindədir. O, öz imkanlarını nəzərə alaraq, daim ciddi hazırlaşır, repertuarını zənginləşdirir. Elə bu səbəbdən də sözügedən respublika televiziya müsabiqəsi və musiqi festivalının finalında iştirak edəcəyinə inanır. Nəcibənin uğurlarını yüksək dəyərləndirən Ü.Hacıbəyli adına Qarabağ Muğam Mərkəzinin direktoru Tofiq Cəfərovun dediklərinə görə, onunla birlikdə növbəti respublika televiziya muğam müsabiqəsində Muğam Mərkəzinin digər istedadlı yetirmələri, Ceyhunə Şirəliyeva, Nərmin Sultanova və Zəhra Məmmədova da iştirak edəcəklər.

Yəhya PAŞAZADƏ

525-ci qəzet.- 2015.- 15 dekabr.- S.7.