“Soyuq əllər, isti ürək”də Anar işığı

“Nargis” jurnalının təşkil etdiyi “Soyuq əllər, isti ürək” adlı Yeni il xeyriyyə yarmarkası çərçivəsində “Qanun” Nəşrlər Evi yazıçı və şairlərin imza günlərini keçirir.

Dekabrın 17-də Azərbaycan Yazıçılar Birliyinin sədri, Xalq yazıçısı Anarın imza günü idi. Ədəbi mühitin aparıcı simalarından olan bir şəxslə ünsiyyət fürsətini, əlbəttə, bir jurnalist kimi, heç qaçırmaq istəməzdim. Digər tərəfdən, ədəbiyyat aşinası olaraq, AYB sədri, o cümlədən, kifayət qədər tanınmış yazıçı ilə görüşü göydə axtarırdım. Bir gün əvvəl baş redaktorumuz reportajı mənim yazmağımı istəyəndə sevinib, öz-özümə dedim ki, “kor nə istər...”

Saat 13:30-da artıq yarmarkadaydım. Yarmarkanın adına rəğmən hava çox xoş təsir bağışlayırdı. Sanki payız son günlərini yazdan borc almışdı...

Tez gəlməyimin verdiyi avantajdan istifadə edib yarmarkanı dolaşdım. O qədər də qələbəlik deyildi. “Qanun”un kitab stendinin qarşısında bəziləri ayaq saxlayır, çoxusa keçib gedirdi. Bir az keçmiş günün qəhrəmanı - Anar da “525-ci qəzet”in baş redaktoru, AYB katibi Rəşad Məcidlə birgə gəldi. Ədəbiyyatdan, kitaba olan münasibətdən etdiyimiz söhbət əsnasında oxucular da iki-bir, üç-bir gəlməyə başladılar. Xüsusən diqqəti cəlb edən məqam imza günündən xəbərsiz olanların gəlməsiydi. Yazıçını görüb ayaq saxlayır, ani tərəddüddən sonra yaxınlaşır, öz təəssüratlarını paylaşır, aldıqları kitabı imzaladır, şəkil çəkdirirdilər. Başqa bir maraqlı, qürurverici nüans isə valideynlərin balaca uşaqlarını da gətirmələri idi. Kitab stendinə baxır, kitablar barəsində övladlarına məlumat verir, sevgi aşılayırdılar.

İmza gününə təkcə sıravi oxucular deyil, tanınmış şəxslər də qatılmışdılar. Hamıdan əvvəl kitab alıb imzaladan Dini Qurumlarla İş üzrə Dövlət Komitəsi sədrinin birinci müavini, sabiq millət vəkili, yazıçı-publisist Səyyad Aran oldu:

“Sovet dövrü ilə müqayisədə ədəbiyyata maraq azalıb. Bu kimi təşəbbüslərsə həmin marağın geri qaytarılmasına, kitaba diqqətin artırılmasına xidmət edir. Əgər bu gün Anar müəllimə görə 50 nəfər imza gününə gəlirsə, bu, özlüyündə çox məna kəsb edir. Düzdür, gənclərin mütaliə səviyyəsi arzuolunan səviyyədə deyil. Amma Anar kimi yazıçıların, söz adamlarının sayəsində ədəbiyyatımız inkişafa doğru gedir. Müqayisə etsək, beş il əvvəllə indiki vəziyyət arasında böyük fərq var. Yaxud dünən Rəşad Məcidin imza günü idi. Havanın soyuq və yağışlı olmasına baxmayaraq xeyli adam iştirak edirdi. Oxucular böyük maraq göstərirdi.

Əlbəttə, hamılıqla bu istiqamətdə daha ardıcıl şəkildə fəaliyyət göstərməli, gənclərin ədəbiyyatla daha yaxından irtibata keçməsinə yardımçı olmalıyıq”.

Bu fikirlər üçün Səyyad Arana təşəkkür edib qələbəliyin arasına girirəm. Hər nəsildən adam görmək mümkündür - qoca, gənc, uşaq...

İki ahıl kişinin söhbətinə qeyri-ixtiyari qulaq müsafiri oluram:

- Bu Anar “Təhminə”ni yazandı, hə?

- Yox, o, filmin adıdı. Əsərin adı ayrıdı. Budee bu kitabı demirsən? - “Beşmərtəbəli evin altıncı mərtəbəsi” kitabını göstərir.

- Eynəksiz oxuya bilirəm ki...

lll

AYB-nin katibi, yazıçı İlqar Fəhmiyə yaxınlaşıram: “Düşünürəm ki, sözə, ədəbiyyata, kitab təbliğatına, ümumiyyətlə işığa xidmət edən istənilən addıma dəstək vermək lazımdır. Mədəniyyət və Turizm Nazirliyi də, Yazıçılar Birliyi də bu yöndə əlindən gələni edir”.

Bu əsnada imza günü davam edir. Bakı Dövlət Universitetinin, Azərbaycan Dövlət Pedaqoji Universitetinin tələbələri, Texniki Universitetin türkiyəli tələbəsi, italiyalı turist, daha kimlər, kimlər gəlir...

İmza gününün təşkilatçısı, “Qanun” nəşriyyatının direktoru Şahbaz Xuduoğlu bu cür tədbirləri vacib hesab edir:

“İmza günləri oxucu ilə yazar arasında körpü rolunu oynayır. Ünsiyyət üçün lazımlı addımdır. Eyni zamanda kitabın reklam olunmasında, tanıdılmasında həyatımıza adaptasiya edilməsində müəyyən kömək olur”.

Sözügedən nəşriyyatın kitablarının keyfiyyətinin aşağı olması ilə bağlı suala Şahbaz bəy belə cavab verir:

“İstənilən kitaba baxa bilərsiz. Kifayət qədər keyfiyyətli çap olunub”.

- Yəni keyfiyyəti yaxşılaşdırmısız?

- Bilirsinizmi, əvvəllər kifayət qədər vəsait yox idi. Ölkədə kitab çapı kütləviləşməmişdi. Texnikalarımız köhnəydi, amma indi bütün proses son texnologiya ilə aparılır. Kitablarımızın keyfiyyəti dünyanın istənilən aparıcı nəşriyyatının çap məhsulu ilə yarışa biləcək səviyyədədir”.

Gənc yazıçı Pərvin də imza gününə gələnlər sırasındadır:

“Bu cür imza günlərinin keçirilməsi çox tədqirəlayiq haldır. Bir neçə gün əvvəl mənim, dünənsə Rəşad Məcidin imza günü keçirildi. Oxucuların marağını görmək çox xoş hissdir. Tədbirdən xəbərdar olanlardan savayı, təsadüfən görənlərin reaksiyası da maraqlıdır. Anar müəllimi görüb sevinirlər, yaxınlaşıb kitab alırlar. Yəqin bunun özü də zamanın, müasirliyin tələbidir. İmza günlərinin keçirilməsi dünya təcrübəsində də böyük uğur qazanıb. Müəllif özü öz kitabını reklam edir. Ondan sitatlar gətirir, yaxud hissələr oxuyur. Bunun Azərbaycanda da təşəkkül tapmasına yalnız sevinmək olar. İstərdik ki, bu işə təkcə “Qanun” deyil, digər nəşriyyatlar da qoşulsunlar”.

Rəşad Məcid isə imza günlərinin keçirilməsi tarixinə ekskurs edir:

“Ümumiyyətlə, ilk dəfə imza günlərinin keçirilməsi Anar müəllimin təşəbbüsü ilə olub. “Bayatı” kitab evində, eləcə də ölkə xaricində bir sıra tədbirlərimiz keçirilib. Beləcə, bu, bir növ ənənə halını aldı. İndi də gördüyünüz kimi bu işi “Qanun” uğurla davam etdirir.

Xalq yazıçısı Anar imza gününün təşkili, ümumiyyətlə, kitab təbliğatı ilə məşğul olduğu üçün sözügedən nəşriyyata təşəkkürünü bildirir və bir yazıçı, həm də AYB sədri kimi bu işlərə dəstək verməyə hər zaman hazır olduğunu söyləyir:

“Bundan sonra da oxşar formatlarda imza günləri təşkil olunacaq, tədbirlər keçiriləcək, layihələr yerinə yetiriləcək. Ədəbiyyatın inkişafı və təbliği üçün əlimizdən gələni edəcəyik”.

İmza günündə həmçinin Dialoq Avrasiya təşkilatının Azərbaycan üzrə nümayəndəliyinin rəhbəri Cəlil Ərdəm, şair-həkim, müxtəlif hərbi vətənpərvərlik mahnılarının sözlərinin müəllifi Şahin Musaoğlu, eləcə də digər tanınmış qələm və söz adamları iştirak ediblər.

Cavid QƏDİR

525-ci qəzet.- 2015.- 19 dekabr.- S.21