Kamran Nəzirlinin yeni romanı çapdan çıxıb

 

 

"Mütərcim" nəşriyyatı yazıçı Kamran Nəzirlinin yeni kitabını - "Dördüncü möhür" romanını çap edib. Bu, qısa hekayələr müəllifi kimi tanınan müəllifin ilk irihəcmli əsəridir.

 

Roman 33 fəsil, 464 səhifədən ibarətdir. Maraqlı süjet xətti olan bədii-fəlsəfi-psixoloji məzmuna malik bu əsərdə yazıçı tarixi faktlardan sənədlərdən istifadə edib.

 

Romanın əsas qəhrəmanı Banu iki dəfə qaçqınlıq həyatı yaşamış gənc azərbaycanlı qızdır. Yeniyetməlik çağlarından bəri taleyin bütün ağır zərbələrini - baba, ata, əmi, oğul digər qohumların itkisini yaşamış bu gənc qız sınmır, Türkiyədə tibbi təhsil alır, Vətənə dönür, klinikada işə düzəlir, inadla elmin dalınca düşür; birinci evlilik həyatı, sevgisi uğursuz olur, doğma balasını itirir...Taleyin yeni zərbələri onun elmi araşdırmalarına mane olmur... dünyanın qibtə edə biləcəyi həkim-psixiatr kimi tanınır. Bundan sonra o, anlayır ki, insanların psixoloji durumunda böyük problem var, dünya əhalisinin yarıdan çoxunun psixoloji durumu acınacaqlıdır... müharibələr, etnik münaqişələr, qaçqınlıq, xəstəliklər, terrorlar... bəlkə elə bütün bunlar psixoloji pozuntularla bağlıdır? Bu qlobal problemi aradan qaldırmaq üçün gənc alim qız yollar axtarır, təlim proqramı hazırlayır. Onun psixo-analitik mülahizələri yenidir, dünya alimləri tərəfindən maraqla qarşılanır. O, dünyanın xilas olunmasının yollarını göstərməyə çalışır. Bunlar nədən ibarətdir? Ümumiyyətlə, bu mümkündürmü?

 

Romanda bu suallara cavab tapmaq olar. Əsərdə yenilik bir bundan ibarətdir ki,  Qarabağ müharibəsi təkcə səngərdə yox, həm çöldə-bayırda, küçədə, evdə, ailələrin, insanların içində, beynində, qəlblərində, psixoloji durumlarında, hərəkət davranışlarında qələmə alınır, irreal real tarixi hadisələr bir-biriylə harmonik vəhdətdə təsvir edilir.

 

Kitabı Bakı Kitab Klubundan əldə etmək olar.

 

525-ci qəzet.- 2015.- 23 dekabr.- S.7