Şahmat dünyası və ilahə
Kaissanın kahinləri
ŞAHMAT: MƏNŞƏYİ VƏ İNKİŞAFI. OYUN QAYDALARI
(Əvvəli ötən şənbə saylarımızda)
XX əsr - şahmat əsri kimi
Şahmat üzrə ilk dünya çempionu adı hələ 1886-cı ildə
verilsə də, XX əsr böyük proqress əsri olduğu kimi bu oyunun inkişafında
və populyarlaşmasında
da böyük rol oynamışdır. İlk dünya çempionluğu
qazanan Vilhelm Steynits bu adı
səkkiz il
ərzində saxladığı
halda, ikinci dünya çempionu olan Emmanuel Laskerin əldə etdiyi həmin fəxri titul 27 il davam
etmişdir və onun iki onilliyi
məhz XX əsrə
təsadüf etmişdi.
Bu əsrin ilk illərində Qərb yarımkürəsində “Şahmat
maşını” inkişaf
etməyə başladı.
Havanadan olan Xose Raul Kapablanka 13 yaşında olarkən Kubanın aparıcı ustası C.Korsonu məğlub etmişdi, 1921-ci ildə isə dünya çempionluğunu Laskerdən
aldı. Altı ildən
sonra isə şahmat dahisi kimi meydana çıxan
rusiyalı Aleksandr Alyoxin onu bu
addan məhrum etdi. Alyoxin 1927-1935-ci illərdə və 1937-ci ildən
1946-cı ildəki vəfatına
qədər dünya çempionu oldu, lakin həm o, həm də sonrakı böyük şahmatçılar Laskerin
çempionluğunun rekord
müddətini təzələyə
bilmədilər. Rus şahmatçısı
1920-ci illərin əvvəllərində
Fransaya mühacirət
etmişdi. Alyoxin həm
də gözübağlı
şahmat oyununda fenomenal nəticə göstərirdi. II Dünya müharibəsi illərində alman ordusunun zabitləri ilə Vyanada 52 taxtada gözübağlı
oyun oynamaqla, əksəriyyətində qalib
gəlmişdi.
Alyoxinin ana vətənində şahmat geniş yayılmağa başlandı. II Dünya
müharibəsinə qədər
Sovet İttifaqında
artıq beş
qrossmeyster var idi, müharibədən sonra isə ölkə dünya şahmatında aparıcı
mövqeyə çıxdı.
Sovet qrossmeysterləri yarım əsrə yaxın bir müddətdə dünya çempionu adını qazandılar.
Alyoxinin ölümündən
iki il
sonra, 1948-ci ildə beş aparıcı şahmatçının iştirakı
ilə keçirilən
turnirdə Mixail Botvinnik dünya çempionu oldu və bu ənənə
dörd onillik ərzində pozulmadı.
1970-ci ildə dünyanın
qalan hissəsinin şahmatçıları ilə
SSRİ komandası arasında
Belqradda keçirilən
yarışda Sovet şahmatçıları 20,5:19,5
hesabı ilə qalib gəldi. Hər komandadan rəqib oyunçu öz rəqibinə qarşı
4 oyun oynamalı idi. Lakin matçın qəhrəmanı
gənc amerikan qrossmeysteri Robert Fişer oldu. O, keçmiş
dünya çempionu Tiqran Petrosyanı 3:1 hesabı ilə uddu.
20 yaşlı Robert Fişer
1963-cü ildəki ABŞ çempionatında
özü də daxil olmaqla 12 iştirakçı arasında
11 mümkün uduş
xalından 11-ni qazanmışdı. O, 1970-ci ildə
Zaqrebdə, Palmada və Buenos-Ayresdə dünyanın aparıcı
oyunçularının iştirakı
ilə keçirilən
turnirlərdə də
oyunları böyük
üstünlüklə başa
vurmuşdu. Bu, onun şahmat üzrə dünya çempionluğuna irəliləməsinin
təzahürü idi.
O, 1971-ci ildə SSRİ-dən
olan qrossmeyster Mark Taymanovu 6:0 hesabı ilə, danimarkalı Bent Larseni də eyni nəticə ilə uddu. Petrosyana qarşı final iddiaçı matçını
6,5:2,5 nisbəti ilə başa çatdırdı. Bu oyun 1971-ci ildə Buenos-Ayresdə keçirilirdi, şəhərin erməni
sakinləri Fişeri çaşdırmaq üçün
salonda hay-küy salır, ona təsir göstərməyə
çalışırdılar. Lakin bu canfəşanlıq fayda vermədi, kumirləri saydıqları
keçmiş dünya
çempionu hələ
bu ada iddiaçı
olmağa cəhd edən amerikan şahmatçısına ona
şərəf gətirməyən
bir hesabla uduzdu. Bu qələbə
artıq dünya çempionunun özünə
onun meydan oxumasına yol açırdı. İslandiyanın
paytaxtı Reykyavikdə
1972-ci ildə dünya
çempionu Boris Spasski
ilə keçirilən
matçda 12,5:8,5 hesabı ilə qalib gələn Fişer bu adı
ondan aldı. Matç nəzərdə
tutulandan üç oyun az olmaqla başa çatmışdı, Fişer
7 oyunu udmuş, 11 oyun isə heç-heçə
başa çatmışdı.
Spasskinin
isə 3 qələbə
xalı var idi. Bunlardan biri rəqibinə
cərimə şəklində
ona verilmişdi.
Şahmat oyunundakı dolambaclar Fişeri dünyada ən məşhur adama çevirdi. Hətta Cpasski də Fişerin dühasına böyük ehtiram göstərərək, onun altıncı partiyadakı qələbəsinə salondakılarla birlikdə əl çaldı. Bu jest general Baqrationun 1812-ci ildəki Borodino döyüşündə güllə yağışı altında ölümdən qorxmadan təpəyə dırmaşan fransız döyüşçülərini “Əhsən, fransızlar” deyə alqışladığını yada salır. General igid adam olduğundan, yadların da rəşadətini qiymətləndirməyi bacarmışdı. Spasski də rəqibinin şahmat məharətinə biganə qalmamışdı. Rus şahmatçısı bənzərsiz oyunçu olsa da, amerikalı bu vaxt həqiqi dahi olduğunu göstərmişdi. Fişer yüksək kreativliyə və dühaya malik olmaqla çoxlarla insanı şahmat vasitəsilə ilhamlandırdı.
Heç şübhəsiz, Fişer Sovetlərin şahmat nüfuzuna ağır zərbə vurmuşdu. Lakin həmin ölkənin şahmatdakı bu uğursuzluğu uzun çəkmədi və Fişerin əllaməlikləri buna şərait yaratmağa kömək etdi. O, öz titulunu qoruyub saxlamaqdan əslində imtina etdikdə, meydana yenidən Sovet şahmatçıları çıxdı. FIDE ilə uzun sürən danışıqlardan sonra Fişer iddiaçı ilə oynamaqdan imtina etdi. 1973-cü ildə Anatoli Karpov iddiaçıların final matçında V. Korçnoyu məğlub etmişdi. Ona görə də 1975-ci ildə FİDE prezidenti Maks Eyve Karpovu dünya çempionu elan etdi. Sonrakı turnirlərdə Karpov bu şərəfə layiq olduğunu öz yüksək nəticələri ilə təsdiq etdi. 1978 və 1981-ci illərdə Karpov Baqioda və Meranoda keçirilən matçlarda Korçnoyu məğlub edib, öz ali titulunu qoruyub saxladı. On il ərzində o, dünya şahmat aləmində ən nüfuzlu idmançıya çevrildi və ona layiqli rəqabət göstərən bir adam yox idi.
Əlbəttə, SSRİ-də şahmat çox geniş yayılmışdı və bu kütləvilik yeni istedadların meydana çıxmasına şərait yaratdı. Sovet Şahmat Federasiyası ilə digər ölkələrin federasiyaları arasında dərin uçurum var idi. Sovet İttifaqında əgər federasiya 3,2 milyon nəfəri birləşdirirdisə, həmin vaxt Birləşmiş Ştatlarda federasiyanın 15 min, Böyük Britaniyada isə 8 min üzvü var idi. Qərbi Almaniyada üzvlərin sayı 1970-ci illərdə 50 min, Niderlandda isə 16 min nəfər idi. Mübaliğəsiz demək lazımdır ki, SSRİ-də şahmat milli idman növü idi. Burada sadə adamlar şahmat oyununun anadangəlmə gözəlliyini qiymətləndirə və başa düşə bilirdi.
Yəqin ki, heç kəs belə bir faktı inkar edə bilməz ki, ümumiyyətlə, XX əsrdə idman böyük cazibə qüvvəsinə və bunun nəticəsi kimi kütləviliyə yiyələndi. Professional idmanda isə ad-san qazanmaq heç də asan məsələ deyildir, bu, adətən böyük istedadın, ağır zəhmətin, güclü ağlın, dözümlülüyün və iradənin, bəzən isə bəxti gətirmənin nəticəsi kimi meydana çıxır. İdman növlərində “yüngül” (yüngül atletika), “bədii” (bədii gimnastika) sözləri işlənsə də, bu sözlər adətən onun zahiri, fərqli görüşünü bildirir, onun zirvəsinə yüksəlməkdə heç bir yüngül yol yoxdur.
İdman həyatı ağır sınaqları, cana doyduran məşqləri ilə romantikadan da çox uzaqdır. Hər bir idman növü özünəməxsus olan ağır yükə, bədəni və bəzən ruhu da taqətdən salan zəhmətə dözməyi tələb edir. İdmançılar daim bir alətdə çalmaqdan yorulmayan, bu yolla sənətkarlığını artıran, virtuozluğa yiyələnməyə çalışan musiqiçiləri xatırladırlar. İdman insanda yeni fiziki və əqli imkanlar açır, əsasən yüksək əxlaqi keyfiyyətlər formalaşdırır.
Yuxarı sinfə məxsus olan gənclər bir qayda olaraq idmana maraq göstərmir, ən yaxşı halda bodibildinqlə - bədəni göz oxşayan formaya salmaq növünə üstünlük verirlər. Ona görə də idmançı karyerası onlar üçün əsasən yaddır, bu kastanın nümayəndələri daha çox qladiator oyunlarından həzz alan qədim romalılar kimi idman tamaşalarını bir əyləncə növü hesab edir, onlara yalnız bu nöqteyi-nəzərdən maraq göstərirlər. Qladiatorun vəhşi heyvan və ya rəqibi tərəfindən parçalanması da tamaşaçılarda heç bir mərhəmət hissi doğurmurdu, axı onlar qan axıdılmasına tamaşa etməkdən həzz alırdılar. Professional idmandan yuxarı dairələr, dövlət rəhbərləri öz ölkəsinin təbliğatı, reklamı üçün istifadə edirlər. İdmanın inkişafı ümumi inkişafın bir, özü də xüsusi qiymətə sahib olan cəhəti kimi nümayiş etdirilir. Beləliklə, idman cəmiyyət üçün vitrin şüşəsi rolunu oynayır.
Həyatın digər sahələrində uğur qazanmağa ümid bəsləməyənlər idmana daha çox maraq göstərirlər, ona özlərinin yaşayışı üçün bolluq yaradan “Amalteya buynuzu” kimi baxırlar və bəzən bu ümidlərində heç də yanılmırlar. Cek London özünün “Meksikalı” hekayəsində haqlı olaraq qeyd edir ki, idman yalnız kasıb, yoxsul ailələrdən olan gənclərin qismətidir. İmkansız ailələrin uşaqları yoxsulluq qurşağının amansız boğmasından qurtulmaq üçün idmanın hansısa bir növü ilə məşğul olmağı seçir. Bir çox hallarda bu, ona ən azı çörək qazanmaq imkanı verir, bəzən isə şan-şöhrətlə yanaşı, onu həm də varlı həyat sürməyə çatdırır. Amerikanın qara dərili boksçuları və ya basketbolçuları təkcə dünya şöhrətinə yiyələnməyib, həm də varlı adamlara çevrilmişlər.
Şahmat da rəqabət, yarış səhnəsi olduğuna görə idman növü hesab olunur, bu oyunda əsasən digər növlərdə olduğu kimi, qalib və ya məğlub müəyyən olunur. Qalib zirvəyə doğru irəliləməyə başlayır, istedadı ilə yanaşı, zəhməti, nəzəriyyəni yaxşı bilməsi ilə, dünyanın qabaqcıl şahmat təcrübəsinə yiyələnməklə daha böyük nailiyyətlərə imza ata bilir.
Şahmat həm də olduqca mürəkkəb oyundur, müharibədə hər qoşun növünün öz vəzifəsi və başqaları ilə öz hərəkətini əlaqələndirmə qabiliyyəti olduğu kimi, burada da piyadaların və böyük fiqurların funksiyaları, vəzifələri, hücum və müdafiə olunmaq variantları vardır. Strateji məqsəd isə aydındır - qalib gəlmək və mümkün olduqca məğlubiyyətdən yayınmaq. Tətbiq edilən taktiki gedişlər də məhz bu məqsədə xidmət etməlidir. Çin filosofu Sun-Tszının qeyd etdiyi kimi, “strategiyasız taktika - ancaq məğlubiyyətdən əvvəlki hay-küydür”.
Şahmatda yeganə bir demokratik qayda da mövcuddur, sağ qalıb səkkizinci xəttə çıxan piyada vəzir səlahiyyətlərinə yiyələnə bilir. Bu qədim çinlilərin meritokratiyasını - əyalətdən olan sadə adamın uğurlu imtahanlardan sonra imperator sarayında vəzifə tutmasını yada salır. Lakin orduda sıravi əsgər nadir hallarda rütbəcə böyüyüb, generala çevrildiyi kimi, şahmatda da bu çevrilmə olduqca az hallarda baş verir. Sıravi əsgər kimi piyadanın da xoşbəxt aqibətinə heç də addımbaşı rast gəlinmir.
Şahmat ağıl, iradə, dözümlülük, bəlkə də bir qədər müsəlmansayağı deyilsə, özünü doğruldan səbir tələb edir. Müdafiə imkanlarını hazırlamadan, bu vacib cəhətə qayğı göstərmədən hücuma atılma ehtirası uzun müddət davam edə bilmir, bir qədər sonra isə kəskin müqavimət nəticəsində sönür. Çünki zəif müdafiə hücuma keçən oyunçu üçün “Axilles dabanı” rolunu oynayır. Rəqib bu zəif mövqedən agah olduqda, əlverişli vəziyyət onun müşahidəsindən yayınmadıqda əks-hücuma keçmək fürsətini əldən vermir. Beləliklə, nəinki əvvəlki hücum qızğınlığından əsər-əlamət qalmır, həm də rəqib oyunun davamını öz xeyrinə dəyişərək, ən azı strateji və ya psixoloji üstünlüyə yiyələnir.
(Ardı var)
Telman Orucov
525-ci qəzet.- 2015.- 26 dekabr.- S.26