"Vətənin müdafiəsinə hazıram!" mövzulu sərgi açılıb

 

 

Səfərbərlik Hərbi Xidmətə Çağırış üzrə Dövlət Xidməti Azərbaycan Dövlət Rəssamlıq Akademiyasının təşkilatçılığı ilə "Vətənin müdafiəsinə hazıram!" mövzusunda sərginin açılışı olub.

 

Dövlət Rəssamlıq Akademiyasının Muzey Sərgi Kompleksində təşkil olunan sərgidə 400-ə yaxın rəsm əsəri nümayiş etdirilir.

 

Sərgi Səfərbərlik Hərbi Xidmətə Çağırış üzrə Dövlət Xidmətinin "Vətənin müdafiəsinə hazıram!" mövzusunda elan etdiyi rəsm müsabiqəsinin yekunu ilə əlaqədar təşkil olunub. Müsabiqəyə yaşı 18-ə qədər olan şəxslərin əsərləri təqdim edilib. Sərgidə yer alan bütün əsərlərdə vətənpərvərlik ruhu tərənnüm olunur.

 

Sərginin açılışında çıxış edən Dövlət Rəssamlıq Akademiyasının rektoru, akademik Ömər Eldarov müsabiqənin gənc nəslin milli vətənpərvərlik ruhunda tərbiyəsində böyük əhəmiyyət daşıdığını vurğulayıb qaliblərə təbriklərini çatdırıb.

 

Səfərbərlik Hərbi Xidmətə Çağırış üzrə Dövlət Xidməti rəisinin birinci müavini, polkovnik Zaur Abdullayev deyib ki, müsabiqəyə respublikanın bütün rayon şəhərlərindən iştirakçılar qatılıb. O, müsabiqənin Xidmət tərəfindən keçirilən hərbi-vətənpərvərlik tədbirlərindən biri olduğunu vurğulayıb bu işlərin intensiv xarakter aldığını bildirib.

 

"Tərxis Olunmuş Hərbçilərin Gəncləri Maarifləndirmə" İctimai Birliyinin sədri Emin Həsənli isə vurğulayıb ki, müsabiqəyə təqdim olunan əsərlərin çoxluğu, iştirakçıların hər birinin Vətən mövzusuna yanaşma tərzləri bu təşəbbüsün böyük maraq oyatdığını göstərir.

 

Bildirilib ki, müsabiqənin sərginin keçirilməsində məqsəd müstəqil dövlətçiliyimizin əsas atributlarından olan Azərbaycan Silahlı Qüvvələrinin əldə etdiyi nailiyyətlərin, güclü ordu quruculuğu prosesinin əhəmiyyətinin ictimaiyyətə çatdırılması, qəhrəmanlıq nümunələrinin təbliği, Vətənə, xalqa məhəbbət, dövlətçilik ideyalarına hörmət hisslərinin gücləndirilməsi, gənc nəslin milli vətənpərvərlik ruhunda tərbiyə olunması, doğma torpağa sədaqət hissinin möhkəmləndirilməsidir.

 

Sonra müsabiqənin qalibləri mükafatlandırılıb rəsm əsərlərindən ibarət kataloqun təqdimatı keçirilib.

 

Sərgi fevralın 14-dək davam edəcək.

 

S.ABDULLAYEVA

525-ci qəzet.- 2015.- 11 fevral.- S7.