Qarabağın Muğam Mərkəzi

Üzeyir Hacıbəyli adına Qarabağ Muğam Mərkəzinin ildən-ilə şöhrəti artır, fəaliyyəti genişlənir. Bunu adıçəkilən mədəniyyət müəssisəsinin bütövlükdə Qarabağda ictimai-siyasi və mədəni həyatın canlanması, muğam ifaçılığı sənətinin təbliği və inkişaf etdirilməsi sahəsində göstərdiyi xidmətlər aydın sübut edir.

Qarabağ Muğam Mərkəzinin direktoru Tofiq Cəfərovun sözlərinə görə, bayram tədbirlərində, hərbi hissələr və ictimaiyyət qarşısında kollektiv üzvlərinin geniş proqramla çıxışları, istedadlı ifaçıları üzə çıxarmaq məqsədi ilə keçirilən muğam müsabiqələri əhali tərəfindən daim rəğbətlə qarşılanır və yüksək dəyərləndirilir. Sözün həqiqi mənasında ,müəssisə bu gün sakinlərin, xüsusilə gənclərin sevimli mədəniyyət və istirahət guşasinə çevirilib.

Muğam Mərkəzi respublika miqyaslı tədbirlərdə, muğam müsabiqələrində, festivallarda da yaxından iştirak edir, yeni -yeni uğurlara imza atır. Təsadüfi deyil ki, kollektivin yetirməsi Arzu Mahmudova ifaçıların Bülbül adına II respublika müsabiqəsində uğurlu iştirak edərək 3-cü nəticə göstərib, medal və xüsusi diplomla mükafatlandırılıb. Bununla yanaşı, digər kollektiv üzvləri Ceyhunə Şirəliyeva, Nərmin Sultanova və Zəhra Məmmədova da həmin müsabiqənin fəxri diplomlarına layiq görülüblər.

Direktor qeyd edib ki, ötən illərlə müqayisədə bu il Muğam Mərkəzində təhsil almaq istəyənlərin sayı xeyli çoxalıb. Əvvəllər müəssisəyə bu məqsədlə 15-20 nəfər müraciət etdiyi halda, indi onların sayı 70 nəfərə çatıb. Lakin şagird yerinə uyğun olaraq burada müraciət edənlərin yalnız 6 nəfəri təhsil almaq imkanı əldə edə bilər. Odur ki, qəbulun sayının artırılması üçün respublika Mədəniyyət və Turizm Nazirliyinə müraciətlər edilib.

Bu ilin əvvəlində təşkil olunmuş "Aysel" xalq çalğı alətlər özfəaliyyət ansamblı (bədii rəhbər Tural Əsədovdur) uğurlu çıxışları ilə yadda qalıb. Ansamblın tarixi günlərdə, bayramlarda, ümummilli lider Heydər Əliyevin anadan olmasının 92-ci ildönümü, Respublika və Milli Qurtuluş günlərində, İlk Avropa Oyunları məşəlinin qarşılanması mərasimində, eləcə də ümumtəhsil məktəblərində nümayiş etdirdiyi nümunəvi konsert proqramları xüsusilə diqqəti çəkib.

"Aysel" özfəaliyyət ansamblının eyni zamanda gənc ifaçıların muğam sənətinin sirrlərinə dərindən yiyələnməsi sahəsində xidmətləri də xüsusi önəm daşıyır. Qeyd olunub ki, hazırda Ağcabədi rayon İcra Hakimiyyətinin sərəncamına əsasən yay mövsümündə əhalinin asudə vaxtının və istirahətinin səmərəli təşkili məqsədi ilə Heydər Əliyev parkında sərgilənən konsertlərdə bölgənin musiqi məktəbləri ilə bərabər Muğam məktəbinin kollektivi də yaxından iştirak edir.

Konsert tamaşalarının təşkilində,tədris və ifaçılıq sahəsində qazanılan uğurlarda müəllimlərdən Arzu Abbasova, İsa Məmmədov, Fəqani Qarayev, Nazim Məmmədov, konsertmeysterlər Sahil Quliyev və Yadigar Feyziyevin gördükləri işlər təqdirəlayiqdir.

Söhbət zamanı T. Cəfərov onu da əlavə edib ki, bu günlərdə respublika Mədəniyyət və Turizm Nazirliyinin qərarı ilə Bakı şəhər Qara Qarayev adına mərkəzi incəsənət məktəbi, Gədəbəy Aşıq Məktəbi, Şamaxı şəhər incəsənət təhsil mərkəzi ilə birlikdə Üzeyir Hacıbəyli adına Qarabağ Muğam Mərkəzinə də təhsilin tənzimlənməsi, səmərəli təşkili və müstəqil inkişafı istiqamətində geniş imkanlar yaradılıb. Qərarın mühüm əhəmiyyət daşıdığını vurğulayan direktor onun kollektivinin üzərinə yüksək məsuliyyət qoyduğunu da dilə gətirib. O, göstərilən bu yüksək diqqət və qayğıya görə Mədəniyyət və Turizm Nazirliyinə minnətdarlığını bildirib.

Yəhya PAŞAZADƏ

525-ci qəzet.- 2015.- 1 iyul.- S.8.