Sənət şəxsiyyəti tamamlayanda

Haqqında danışacağım həkim akademik Zərifə Əliyeva adına Milli Oftalmologiya Mərkəzində çalışır.

İnsanlara xidmət göstərir, onların gözlərinə nur bəxş edir.

Şahin Yusif oğlu Məmmədov SSRİ dövründə həkim ailəsində dünyaya göz açıb. Atası Məmmədov Yusif nə az-nə çox, 45 illik həkimlik həyatının 30 ilini Biləsuvar rayonunda baş həkim kimi dövlət və millətə xidmət etməklə səhiyyənin keşiyində durub. Anası Məhluqə xanım da səhiyyə sahəsində uzun müddət çalışaraq bilik və bacarığını Vətənimizin inkişafına həsr etmişdir. Şahin müəllimin bacısı Vəfa xanım da 26 ildən çoxdur ki, səhiyyə sahəsində müstəqil respublikamıza fayda verməkdədir.

Şahin Məmmədov 1977-ci ildə Biləsuvar rayonunda orta məktəbi qızıl medalla bitirdikdən sonra Azərbaycan Tibb Universitetində təhsil alıb.

Universiteti bitirdikdən sonra Şahin həkim təyinatla Biləsuvar rayonuna göndərilib. 1988-ci ildə Şahin həkimin istedadı və işgüzar fəaliyyəti Səhiyyə Nazirliyi tərəfindən yüksək qiymətləndirilərək 1989-cu ildə o, respublikamızın məşhur səhiyyə ocaqlarından biri olan Zərifə Əliyeva adına Milli Oftalmologiya Mərkəzinə dəvət edilib.

O vaxtdan bəri irqindən, dinindən, milli mənsubiyyətindən asılı olmayaraq minlərlə insanın gözlərinə nur bəxş edən Şahin Məmmədov elə indinin özündə də adlı-sanlı bir oftalmoloq kimi Mərkəzdə çalışır. O, Mərkəzin direktoru Elmar Qasımovla bərabər yüzlərlə insanın gözlərini əməliyyat edərək onların görmə qabiliyyətini bərpa ediblər. Ş. Məmmədov bir sıra mükafatlara layiq görülüb.

Bu gün mən dünyaya yenidən göz açdığıma görə Şahin həkimə borcluyam. Şahin həkim deyir ki, bu gün Azərbaycanın belə inkişafı Prezidentimiz İlham Əliyevin böyük qayğısının nəticəsidir:

"Zərifə Əliyeva adına Milli Oftalmologiya Mərkəzi bu qayğının nəticəsində yaradılan çox unikal bir səhiyyə ocağıdır. Biz də çalışırıq ki, bu qayğıya, bu diqqətə görə Vətəndaşlarımıza öz köməkliyimizi göstərək".

Vaqif ABDULLAYEV

Biləsuvar rayonu Zəhmətabad kənd sakini

525-ci qəzet.- 2015.- 3 iyun.- S.8.