İşıq istəyirəm...

(fraqmentlər)

Qızlarıma, nəvələrimə

-1-

Ürəyimdən düşən işıq

Gözlərimə bəs eləmir.

Çəkingəndi...

Görən niyə

Yerə-göyə bəs eləyən

İşıq ilə bəhs eləmir?..

-2-

Mən ayrı Rəşid olmuşam,

Ya dünya ayrı dünyadı?!

Sayrı cana düşməz işıq,

Sağ canı sayrı dünyadı?!

İşıq istəyirəm, işıq,

İşıq verin mənə bir az.

Arzuladığım işığı

Dünyamızın dərdinə yaz.

İşıq verin mənə, işıq,

Əl saxlayın bir anlığa.

İşıqdan doğulan gözüm

Alışammır qaranlığa...

-3-

İşıq,

işıq istəyirəm!

Bir zamanlar Faxralıda

Çilik-çilik dolaşdığım

yal-yamaca,

Hər bulağa,

hər çeşməyə,

hər ağaca,

Hər dikdirə,

hər yoxuşa,

Hər kahaya,

hər koğuşa

düşən işıq!..

Böyük yola əl uzadan

Hər cığıra, hər izə də,

Ətirindən

yerlər, göylər bihuş olan

bənövşəyə, nərgizə də

düşən işıq!..

Mən Rəşiddən incik düşən

O Rəşidin

Şirin-şəkər xəyalına,

Kola-kosa ilişəndə

Əllərimin qan xalına gülənlərin

Sorğusuna-sualına düşən işıq!..

Faxralıdan Bakıyacan

yola-izə səpələnən

Hər ilinə, hər ayına,

Bir insafsız,

bir qəlbidaş qələmqaşın

ömür adlı sarayına

Bir atanın,

bir ananın

başdaşında

donub qalan harayına düşən işıq!..

-4-

Rüzgar əsdi,

gözlərimin

işıq barı töküldü.

Bir zərrəsi anamın,

Bir zərrəsi atamın

Kəfəninə büküldü.

Yun köynəyiydi sanki;

ilməsi qaçan kimi

söküldükcə söküldü...

-5-

Belə gəldi qəza-qədər,

Gözlərimdən zərrə gedib

Şəhidlərin sayı qədər...

...Belə idi məmləkətin

Can göynədən,

ruh sarsıdan mənzərəsi...

Gözlərimin işığının

Bir zərrəsi -

Şuşada Ramizin,

Tərtərdə Vəzirin,

Ağdərədə Yusifin,

Kəlbəcərdə Yaşarın,

Zəngilanda Baloğlanın,

Tərtərdə Mübarizin,..

Son nəfəsi...

Bir zərrəsi

Bağanıs - Ayrımda

yananlarla yandı,

Bir zərrəsi

Xocalıda

donanlarla dondu...

-6-

...Göz əməliyyatı...

Gecə rəngli işığın

urvatdan düşməsi,

Əl boyda

Xəcalət sarğısına bükülməsi...

Gecənin gözündən düşən

dan yerinin sökülməsi...

Ümid dünyasının

cərrahın əlləriylə

işığa bükülməsi...

Göz əməliyyatı...

Qarışıq şeytan yuxusu...

Bir də sizi bir daha

görməmək qorxusu...

-7-

Ürəyimin odundan

yanar tonqal qalayın.

İşıqlı sözlərimin

işığını gözümün

işığına calayın!..

-8-

Göy kişnəyir

Yer - daracaq,

Acım - böyük, dünya - dayaz.

İşıq, işıq istəyirəm,

İşıq verin mənə bir az!..

18.02.2015

Başına daş ələyirlər

Faxralıda XV-XVI əsrlərə aid tikiliyə

A bəxti kam, nədir suçun,

Gözündən yaş ələyirlər.

Hərdən çək-çevir eləyir,

Hərdən də çaş ələyirlər.

Gözləyirsən ki, yel kəsə,

Hayqırasan bir nəfəsə...

Rüzgar görüb təntiməsə

Yavaş-yavaş ələyirlər.

Gücsüzsən qolun bükülür,

Çalın-çəpərin sökülür...

Sinənin daşı tökülür

Başına daş ələyirlər...

Kaş ki, gerçək olaydı...

Ramazan Səməroğluna

Uzaqdan səni gördüm

Kaş ki, gerçək olaydı...

Yolu gözümə hördüm,

Kaş ki, gerçək olaydı...

Yel əsirdi...

Könlümü

yelləndirirdi yellər.

Məxməri tellərini

gülləndirirdi yellər

Kaş ki, gerçək olaydı...

Yarpaq düşdü budaqdan,

Közə döndü sözüm də.

Bir ayrı rəngə çaldı

Dünya mənim gözümdə;

Kaş ki, gerçək olaydı...

...Gedirdik...

Salxım söyüd

Budağını əyirdi.

Bizi güləriz görüb

hərdən gülümsəyirdi;

Kaş ki, gerçək olaydı...

Göylər nur kimi axdı

gözümün qarasına...

Sığınmışdın, gözəlim

Qolumun arasına-

Kaş ki, gerçək olaydı...

Söz ömürə üzəngidi

Düz olanların qaldığı

Düz ömürə üzəngidi.

Bir düzün dürüst ömürü

Yüz ömürə üzəngidi.

Gözlərimi çıraq elə,

Əllərini daraq elə,

Ürəyini ocaq elə,

Yaz ömürə üzəngidi.

Dünya sözə baxmır daha,

Baxma, batarsan günaha.

Bu günündən bax sabaha

Göz ömürə üzəngidi.

Uyma hər şirin dilə, döz.

Cihadı çıx cəbr ilə, döz.

Döz, səbr elə, səbr elə, döz -

söz ömürə üzəngidi

Rəşid FAXRALI

525-ci qəzet.- 2015.- 5 mart.- S .7.