Aşıq Əhlimanın 60 illiyi qeyd olunub - Fotoreportaj

R. Behbudov adına Dövlət Mahnı Teatrında Azərbaycan aşıq sənətinin tanınmış nümayəndələrindən biri, Şirvan aşıq mühitinin yetirməsi, əməkdar mədəniyyət işçisi, sənətşünaslıq üzrə fəlsəfə doktoru, Dövlət Mədəniyyət və İncəsənət Universitetinin aşıq sənəti kafedrasının müdiri Əhliman Rəhimovun 60 illik yubileyi qeyd olunub.

Tədbir Mədəniyyət və Turizm Nazirliyinin və Azərbaycan Aşıqlar Birliyinin birgə təşkilatçılığı ilə reallaşıb.

Tədbirdə Azərbaycan Aşıqlar Birliyinin sədri, Xalq şairi Zəlimxan Yaqub Aşıq Əhlimanı 60 illik yubileyi münasibətilə təbrik edərək ona yeni yaradıcılıq uğurları arzulayıb: " Əhliman Rəhimov aşıq sənətinə hörmət gətirən, onu zənginləşdirən, bu sənətin inkişafına böyük təkan verən ifaçılardandır".

Qeyd edilib ki, Ə.Rəhimov 1955-ci il martın 10-da Ucar rayonunun Bərgüşad kəndində anadan olub. Hazırda vaxtilə təhsil aldığı Azərbaycan Dövlət Mədəniyyət və İncəsənət Universitetində aşıq sənətini elmi əsaslarla tədris edir.

Şirvan aşıq məktəbinin qədim ənənəl

ərindən söz açan Zəlimxan Yaqub deyib ki, bu ənənələr Aşıq Əhliman kimi sənət adamlarının timsalında yüksək səviyyədə, ləyaqətlə qorunur və davam etdirilir.

Aşıqlar Birliyinin sədri əminliklə vurğulayıb ki, yubilyar hələ qarşıdakı neçə-neçə onilliklərdə Dədə Qorqud yadigarı olan qədim saz-söz sənətimizin inkişafına, gələcək nəsillərə çatdırılmasına töhfələr verəcək.

Tədbirin aparıcısı, professor Qəzənfər Paşayev Aşıq Əhliman Rəhimovun sənət yolundan, ifaçılıq məharətindən, gənc aşıqların yetişməsindəki xidmətlərindən söz açıb. Bildirib ki, o, bir alim kimi də bu sənətin təbliğinə, inkişafına yardımçı olur. Belə ki, aşıq-alimin gərgin axtarışları sayəsində ərsəyə gətirdiyi kitablar Şirvan aşıq mühitinin neçə-neçə yaradıcı simasının daha geniş auditoriyaya təqdim olunmasına, onların yaradıcılıq irsinin tədqiqinə təkan verib.

Gecədə akademik Vasim Məmmədəliyev, professor Məhərrəm Qasımlı və başqaları çıxış edərək yubilyara ən xoş arzularını çatdırıblar.

Vurğulanıb ki, şirin nəğmələri ilə qəlbləri fəth edən Aşıq Əhlimanın sənətinin gücü həm də sadə, təvazökar və təbii danışığında, səmimi insani münasibətindədir. Aşıq Əhliman özünün açdığı cığırla gedən el sənətkarıdır. Oxuduğu qoşmalar, gəraylılar, müxəmməslər, təcnislərin hamısı sazın qəlbləri ovsunlayan cingiltisi ilə gözəl səsin sehrinə qarışır. Əslində haray qoparan, cansız taxta parçası və yaxud ona bənd edilmiş simlər deyil, aşığın yanar qəlbinin səsidir.

Tədbirdə ustad aşığın sənət dostları, tələbələri çıxış edərək, onun sözlərinə bəstələnmiş mahnıları səsləndiriblər.

İrandan gəlmiş aşıqlar da ifaları ilə yubilyarı təbrik ediblər.

S.ABDULLAYEVA

525-ci qəzet.- 2015.- 11 mart.- S7