"Azərbaycanla Yunanıstan elm və mədəniyyət işığında"

"Elm çırağı" İctimai Birliyi "Azərbaycanla Yunanıstan elm və mədəniyyət işığında" mövzulu seminar keçirib.

İctimai Birliyin sədri professor Naidə Məmmədxanova müzakirə edilən mövzunun əhəmiyyətindən danışıb: "Azərbaycan və Yunanıstan arasında əlaqələr əsrlərin dərinliklərinə gedib çıxır və müxtəlif sahələri əhatə edir. Yunan mütəfəkkirlərinin əsərləri, antik yunan ədəbiyyatı, tarixi, mədəniyyəti ölkəmizin ali məktəblərində tədris edilir. Bakı Slavyan Universitetində Müasir Yunan dili və Mədəniyyət Mərkəzi fəaliyyət göstərir. Yunanıstanda da Azərbaycanın müasir həyatının müxtəlif sahələrinə böyük maraq var. Təsadüfi deyil ki, Afinada Azərbaycan musiqisindən ibarət konsert təşkil olunub. Ədəbiyyatımızdan nümunələr yunan dilinə tərcümə edilib. Elm çırağı" İctimai Birliyinin təşkil etdiyi seminar da bu baxımdan əhəmiyyətlidir".

N.Məmmədxanova vurğulayıb ki, ümummilli lider Heydər Əliyevin uzaqgörən və müdrik siyasəti nəticəsində bu gün Azərbaycan beynəlxalq aləmdə nüfuzlu, yüksək sürətlə inkişaf edən dövlətdir və ulu öndərin siyasəti Prezident İlham Əliyev tərəfindən uğurla davam etdirilir.

"Elm çırağı" İctimai Birliyinin başlıca məqsədi cəmiyyətdə elmə və mədəniyyətə marağı artırmaq, habelə elmi seminarlar və kütləvi tədbirlər vasitəsilə əhalini maarifləndirməkdir. Birliyin məqsədləri sırasında Azərbaycanın və xarici ölkələrin təhsil, elm və mədəniyyət müəssisələri, habelə diplomatik missiyaların və diasporun nümayəndələri ilə əməkdaşlığa, istedadlı gənclərin qurumun sıralarına cəlb olunmasına, regional və beynəlxalq layihələrin həyata keçirilməsinə xüsusi yer ayrılır.

Tədbirdə çıxış edən Bakı Musiqi Akademiyasının prorektoru, professor Gülnaz Abdullazadə Yunanıstanın Avropa mədəniyyətinin beşiyi olduğunu vurğulayıb, çalışdığı bu təhsil ocağı, habelə Bakı haqqında kitabları səfirə hədiyyə edib.

Seminarda Yunanıstanın ölkəmizdəki səfiri Dimitrios Tsounqasın "Yunanıstan əsrlərin arxasından" mövzusunda məruzəsi dinlənilib. Diplomat təmsil etdiyi ölkənin tarixi, mədəniyyəti, müasir durumu haqqında geniş məlumat verib. Bildirib ki, Azərbaycan dövlət müstəqilliyini bərpa etdikdən sonra Yunanıstan bu ölkə ilə birbaşa diplomatik münasibətlər qurub. Hər iki dövlətin prezidentlərinin qarşılıqlı səfərləri bu əlaqələrin daha da genişlənməsi üçün əlverişli imkanlar yaradıb.

Səfir diqqətə çatdırıb ki, Azərbaycanda "Arqo" yunan icması fəaliyyət göstərir. Bu ölkədə yaşayan yunanlar öz milli xüsusiyyətlərini qoruyub saxlamaqla yanaşı Azərbaycan xalqının mədəniyyətinə də böyük maraq göstərirlər.

Seminarda "Yunan mentaliteti və yunan fəlsəfəsi", "Yunan mifologiyası və müasirlik", "Yunan mifologiyasında mənəviyyat məsələləri", "Azərbaycanda yunan diasporu" mövzularında məruzələr dinlənilib.

Tədbirdə mövzu ilə bağlı tətbiqi sənət əsərlərindən ibarət sərgi nümayiş olunub.

S.ABDULLAYEVA

525-ci qəzet.- 2015.- 12 mart.- S .7