O qara tellərə dən düşüb daha

Yazı yazan səni necə qarğıyım?

Hərdən ümid olmur çıxam sabaha.

Bu dərdi sinəmdə necə saxlayım?

O qara tellərə dən düşüb daha.

Hələ həyatımı başlamamışam,

Könlüm istəyəntək yaşamamışam,

Hələ bircə dəfə oxşamamışam,

O qara tellərə dən düşüb daha.

Gərək gecikməyim bu son qatara,

Bəlkə xoşbəxtliyə məni apara.

Etibar qalmayıb dövrə, həyata,

O qara tellərə dən düşüb daha.

Bu eşq məni dağa-daşa salacaq,

Məcnunlara, Fərhadlara qoşacaq.

Şahin dözmür, səni alıb qaçacaq,

O qara tellərə dən düşüb daha.

Nə susmusan, bir cavab ver, sevgilim

Ürəyində fikrin var, de bilim,

Mən istərəm sevdiyimtək sevilim.

Razı olma bu dərd altda əyilim,

Nə susmusan bir cavab ver sevgilim.

Sağ yanaqda bir xalın var, qaradır,

Gəl bax könlüm çalın-çarpaz yaradır.

Gəl özün de, qəlbinə yol hardandır,

Nə susmusan bir cavab ver sevgilim.

Şahinəm, dərd məni haldan salıbdı,

Xəstə könlüm fikir, xəyal alıbdı.

Gözüm elə qapınızda qalıbdı,

Nə susmusan, bir cavab ver sevgilim.

Şahin HƏZİLİ

525-ci qəzet.- 2015.- 13 may.- S.8