Mən kimi sevdimsə, qəlbimdə sevdim, Kimi sevdiyimi bir kimsə bilməz

Məni əvvəlimə qaytarma, Allah

 

Məni əvvəlimə qaytarma, Allah,

Əvvəlim şaxtalı, qış qoxuludu.

Qayıtsam səsimdən oyanar, vallah,

Yatıbdı, qoy yatsın- daş yuxuludu.

 

Ürək sızıldadır qara günləri,

O illər dəhşətli kitab kimidi.

Elə açılmazdı dür-düyünləri,

Hər biri indimə xitab kimidi.

 

...Yollara çıxardıq güman içində,

Bacalar yalandan tüstülənərdi.

Günəş ağarardı duman içində,

Adamlar işığa istilənərdi.

 

Bayrama dönərdi yazın gəlməsi,

Qurusu olanlar bölüşərdilər.

Lüğətdən çıxmışdı çörək kəlməsi,

Çörək istəyənə gülüşərdilər.

 

Hər fəslin özünün seçimi vardı,

Bəzən qarışardı seçim-bölümlər.

Qışda adamları don aparardı,

Yaza çıxınları - yaşıl ölümlər.

 

Qırxına qalmazdı rəngi solanlar,

Yurdu qaralardı qala yerinə.

Təzəcə-təzəcə ana olanlar,

Ümid böyüdərdi bala yerinə.

 

Bir sadiq qulunam, qıyma quluna,

Gələnə, gedənə hal qandıraram.

İmkanım olmasa işıqpuluna,

Gecələr evimdə şam yandıraram.

 

Ötənə qaraltı, qalana hayam,

Məni quzu kimi otarma, Allah!

Mən ki verdiyinə şüküranlıyam,

Məni əvvəlimə qaytarma, Allah!

 

22.12.2014

 

Vida nəğməsi

 

Qızılı payız da arxada qaldı,

Bayatı bulaqlar bəmə düşdülər.

Şaxtalı küləklər bir hava çaldı,

Yarpaqlar meydana tökülüşdülər.

 

Ağaclar soyunub lütləşir necə,

Yarpaqlar həyadan qızıllaşırlar.

Gövdəli olanlar bütləşir necə,

Şivkələr, pöhrələr sızıldaşırlar.

 

Hikkəli küləklər qamçılar çalır,

Ağaclar qol-boyun yallı gedirlər.

Yarpaqlar budaqda nigaran qalır,

Qorxudan ürəyi xallı gedirlər.

 

Baxıram, göylərdə şimşəklər çaxır,

Qopmadan, düşmədən üşənirəm mən.

Tökülən qızılı yarpağa baxır,

Qalan günlərimi düşünürəm mən.

 

İlləri yaşamış ağac kimiyəm,

Günlərim gözümdə yarpaq görünür.

Mehriban əllərə möhtac kimiyəm,

Hayana baxıram torpaq görünür...

 

Cücərən ota da səcdə qıl, əyil,

Bilirəm bu qopum, bu töküm nədir.

Tökülən yarpaqlar yarpaqlar deyil,

Bir ömrün əlvida nəğmələridir.

 

31.12.2014

 

SEVGİ... SEVGİ...

 

Bir sirri-xudadır qəlbimdə sevgim,

Bir sirri-xudadır, dilimə gəlməz.

Mən kimi sevdimsə, qəlbimdə sevdim,

Kimi sevdiyimi bir kimsə bilməz.

 

Tanışdır qurulan hər oyun mənə,

Kimim var qəlbimdən özümə yaxın.

Bir uşaq görəndə göz qoyun mənə,

Bir qoca önündə üzümə baxın.

 

Dünya da sevgidən yaranıb belə,

Tanrı sevgisidi bu dünya ancaq.

Yağışda, yağmurda aranıb belə,

Sevgisiz bu dünya bir xülya ancaq.

 

Sevgisiz bir yerə ayaq basmaram,

Sevgisiz nənəm iplik əyirməz.

Sevgisiz söhbətə qulaq asmaram,

Ha bellə, ha sula - səhra göyərməz.

 

Xəstə ürəklərin sevgi davası,

Sevgidən şipşirin ayrı mət umma.

Sevgisiz ürəklər-şeytan yuvası,

Sevgisiz olandan mərhəmət umma.

 

Sevgidi dünyanı saxlayan ancaq,

Sevgiylə qoşadır vüqar dünyada.

İnsanı insana bağlayan ancaq,

Sevgidən savayı var dünyada?

 

Sevgidən başlayır gediş-gəlişim,

Sevənlər yaxınım, öz çevrəm, neylim!

Sevgisiz olanla mənim işim,

Sevgisi olanı sevirəm, neylim!

 

11.04.2015

 

QOYUN

 

Sallaqxanada bir toğlunu sürüyə gələn gördüm.

 

Atlanırsan, düşürsən,

Damağın durulubdu.

Xəbərin yox xəbərdən,

Təbilin vurulubdu.

Elə bu dar macalda

Könlündən sürək keçir.

Baxanlar gülüşürlər,

Gülüşdən ürək keçir.

Ötüb-keçən hər anı

Özünə kef bilirsən.

Kef bildiyin hər anı

Ömürdən nəf bilirsən.

Qolun sürü belində,

Oyunsan ki, oyunsan.

Bıçaq qəssab əlində,-

Qoyunsan ki, qoyunsan.

 

16.01.2015

 

GÜNAHKARIQ

 

Günahkarıq, Nuru paşa,

Günahkarıq qabağında.

Düşüncəmiz dönüb daşa,

Lalıq, karıq qabağında.

 

Qəhrəmanlıq tarixində

Sən bizlərə ad olmusan.

Doğulmusan doğulanla,

Ruhumuza dad olmusan.

 

Sinəmizdə yaraların

Qaysaqlanmır gözü, vallah!

Bir milləti xilas etmək

Bir tarixdir özü, vallah!

 

Yağıların gözlərini

Sənin kimi oymamışıq.

Qoruduğun şəhərlərdə

Sənə heykəl qoymamışıq.

 

Adın gəlir, qürrələnir,

Kürsülərə dırmaşırıq.

Boşalırıq sinə-sinə,

Elə bil ki, dağ aşırıq.

 

Günahkarıq, Nuru paşa,

Günahkarıq qabağında.

Düşüncəmiz dönüb daşa,

Lalıq, karıq qabağında.

 

Hünərinlə, zəfərinlə

Sən illəri qocaltmısan.

Biz qoyası heykəlini

Sən tarixdə ucaltmısan.

 

08.07.2014

 

NİSGİL

 

Zərif-zərif qırışlar,

Üz-gözündə yallanır.

Belə itir gözəllik,

Pərdə belə sallanır.

 

15.04.2015

 

lll

 

Bir gizli sevginin qəhrəmanıyıq,

Bir kimsə bilməyir bu sevgimizi.

Görüşük, vüsalıq, baharıq, yayıq,

Baxanlar özgələr bilirlər bizi.

 

Küçədə, bayırda qarşılaşırıq,

Ani bir təbəssüm bəs edir bizə.

Xəyal qanadlanır, dağlar aşırıq,

Quşlar nəğməsini bəhs edir bizə.

 

Bu gizli sevgini qürur sanırsan,

Sevgisiz günümdən usanır ömrüm.

Sevgimdən sən necə qürurlanırsan,

Sevgindən o qədər uzanır ömrüm.

 

Hər ötən anımız xoş xatirələr,

Sevənə özgə söz quru öyüddü.

Gözəldir necə barlı sevgilər,

Bəhərsiz sevgilər barsız söyüddü.

 

Aşkara sevənin söz deyəni çox,

Aşkara sevənlər dilə düşürlər.

Bəxtəvər deyəni, göz dəyəni çox,

Dastana dönürlər, çölə düşürlər.

 

Gün elə gündü ki, saralanda da,

Gizli saxlayırıq biz sevgimizi.

Biz ki bir yerdəyik ayrılanda da,

Nə yaxşı, özgələr bilirlər bizi.

 

 

Cavad Zeynal

525-ci qəzet.- 2015.- 16 may.- S.30.